News

yv subba reddy, YS Jagan అక్రమాస్తుల కేసు: వైఎస్‌కు తోడల్లుడ్ని కావడంతో ఇరికించారు.. వైవీ సుబ్బారెడ్డి – telangana high court hearing concludes on ttd chairman quash petition in indu projects


Authored by Apparo GVN | Samayam Telugu | Updated: Sep 16, 2022, 10:21 PM

సీఎం జగన్‌ అక్రమాస్తుల ఆరోపణలకు సంబంధించిన కేసుల్లో తనను అక్రమంగా ఇరికించారని టీటీడీ ఛైర్మన్‌ వైవీ సుబ్బారెడ్డి పేర్కొన్నారు. ఇందూ, హౌసింగ్‌ బోర్డు ప్రాజెక్టు సీబీఐ కేసులో తన పేరు కొట్టేయాలని 2016లోనే ఆయన హైకోర్టులో క్వాష్‌ పిటిషన్‌ దాఖలు చేశారు. దీనిపై చీఫ్‌ జస్టిస్‌ ఉజ్జల్‌ భుయాన్‌ ఏకసభ్య ధర్మాసనం విచారణ జరుపుతోంది. వైవీ తరఫున సీనియర్‌ లాయర్ వివేక్‌రెడ్డి వాదనలు వినిపించారు. గచ్చిబౌలి హౌసింగ్‌ ప్రాజెక్టుకు సంబంధించి సుబ్బారెడ్డి ప్రయోజనం పొందారన్న ఆరోపణల్లో వాస్తవం లేదని, ఆధారాలను సీబీఐ చూపించలేదని పేర్కొన్నారు.

 

ప్రధానాంశాలు:

  • ఇందూ ప్రాజెక్ట్స్‌లో క్విడ్ ప్రోకో ఆరోపణలు
  • 2016లో క్వాష్ పిటిషన్ వేసిన వైవీ సుబ్బారెడ్డి
  • లక్షలతో కోట్లు గడించారని సీబీఐ ఆరోపణ
ముఖ్యమంత్రి వైఎస్ జ‌గ‌న్మోహన్ రెడ్డి ఆదాయానికి మించి ఆస్తులు కూడ‌బెట్టార‌న్న ఆరోపణల కేసుల‌కు సంబంధించి శుక్ర‌వారం తెలంగాణ హైకోర్టులో కీల‌క విచార‌ణ జ‌రిగింది. సీఎం జగన్ అక్ర‌మాస్తుల కేసుల్లో భాగంగా ఇందూ ప్రాజెక్ట్స్‌పైనా కేసు న‌మోదైన విషయం తెలిసిందే. ఈ కేసులో జ‌గ‌న్‌తో పాటు ఆయ‌న బాబాయి, ప్ర‌స్తుతం టీటీడీ చైర్మ‌న్‌ వైవీ సుబ్బారెడ్డి పేరును కూడా సీబీఐ అధికారులు చేర్చారు. అయితే, ఈ కేసులో త‌న పేరును తొల‌గించాలంటూ ఇటీవ‌లే వైవీ సుబ్బారెడ్డి తెలంగాణ హైకోర్టులో క్వాష్ పిటిష‌న్ దాఖ‌లు చేశారు. ఈ నేపథ్యంలో పిటిష‌న్‌పై శుక్ర‌వారం హైకోర్టులో విచార‌ణ జ‌రిగింది.

ఈ సంద‌ర్భంగా వైవీ సుబ్బారెడ్డి త‌ర‌ఫు న్యాయ‌వాది వివేక్ రెడ్డి వాదనలు ధర్మాసనం ముందు వినిపిస్తూ ఓ విష‌యాన్ని ప్ర‌స్తావించారు. దివంగ‌త సీఎం వైఎస్ రాజ‌శేఖ‌ర‌రెడ్డికి తోడ‌ల్లుడు అయినందున‌నే త‌న క్లెయింట్‌ను ఈ కేసులో ఇరికించార‌ని లాయర్ తెలియజేశారు. త‌మ వాద‌న‌ను ప‌రిగ‌ణ‌న‌లోకి తీసుకుని సుబ్బారెడ్డి పేరును ఈ కేసు నుంచి తొలగించాల‌ని ఆయన కోరారు. గచ్చిబౌలి ప్రాజెక్టులో ఇందు ప్రాజెక్టుకున్న 50 శాతం వాటా పిటీషనర్ కు బదిలీ అయిందన్నదే ప్రధాన ఆరోపణగా కోర్టుకు తెలిపారు. 4.23 ఎకరాల గచ్చిబౌలి హౌసింగ్ ప్రాజెక్టును వసంత ప్రాజెక్టు దక్కించుకుందని వివరించారు.

అయితే, దీనికి సీబీఐ తరఫు న్యాయవాది కౌంటర్ ఇచ్చారు. కేవ‌లం కొన్ని ల‌క్ష‌లు పెట్టుబ‌డి పెట్టి.. వాటితో సుబ్బారెడ్డి కోట్లు గ‌డించార‌ని సీబీఐ లాయర్ ఆరోపించారు. ఈ కార‌ణంగా ఆయ‌న పేరును కేసులో నుంచి తొల‌గించ‌వ‌ద్ద‌ని కోరారు. ఇరు వ‌ర్గాల వాద‌న‌ల‌ను విన్న న్యాయమూర్తి.. విచార‌ణ ముగిసిన‌ట్లు ప్ర‌క‌టించారు. ఈ కేసులో తీర్పును రిజ‌ర్వ్ చేస్తున్న‌ట్లు చీఫ్‌ జస్టిస్‌ ఉజ్జల్‌ భుయాన్‌ వెల్లడించారు.

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.

Related Articles

Back to top button