thummala nageswara rao, తుమ్మల ఇంటికి హరీష్ రావు.. ఆ ఎమ్మెల్యేతో కలిసి, ఖమ్మంలో ఆసక్తికర పరిణామం – harish rao meets thummala nageswara rao in khammam along with sandra venkata veeraiah

ఉమ్మడి ఖమ్మం జిల్లాలో బీఆర్‌ఎస్ పార్టీ బహిరంగ సభ నేపథ్యంలో ఆసక్తికర పరిణామం చోటు చేసుకుంది. జనవరి 18న ఖమ్మంలో సీఎం కేసీఆర్ పాల్గొనే భారీ బహిరంగ సభకు సంబంధించి ఏర్పాట్లను పరిశీలించడానికి వచ్చిన మంత్రి హరీష్ రావు ఉమ్మడి ఖమ్మం జిల్లాలో సుడిగాలి పర్యటన జరుపుతున్నారు. ఇందులో భాగంగా మాజీ మంత్రి తుమ్మల నాగేశ్వరరావు నివాసానికి వెళ్లి ఆయణ్ని మర్యాదపూర్వకంగా కలిశారు. అంతకుముందు సత్తుపల్లిలో ఎమ్మెల్యే సండ్ర వెంకటవీరయ్యను కలుపుకొని తనతో పాటు తుమ్మల ఇంటికి తీసుకెళ్లారు. తుమ్మల, సండ్ర వీరయ్య మధ్య పరోక్షంగా మాటలయుద్ధం కొనసాగుతున్న వేళ, తుమ్మల బీజేపీ పార్టీలోకి వెళ్తారనే ప్రచారం జరుగుతున్న వేళ.. హరీష్ రావు మరోసారి పెద్దన్న పాత్ర పోషించారు. ఉమ్మడి ఖమ్మం జిల్లాకు చెందిన పార్టీ నేతల మధ్య విభేదాలను పరిష్కరించేందుకు కృషి చేశారు.

హరీష్ రావుతో పాటు మరో మంత్రి పువ్వాడ అజయ్ కుమార్, ఎంపీ నామా నాగేశ్వరరావు కూడా తుమ్మల నాగేశ్వరరావు నివాసానికి వచ్చారు. తుమ్మల, నామా, సండ్ర వీరయ్య పక్కపక్కనే కూర్చొని ఉన్న ఫొటో ఒకటి సోషల్ మీడియాలో వైరల్ అవుతోంది. తుమ్మల నివాసానికి వచ్చిన పార్టీ నేతలను శాలువాతో సత్కరించారు.

నూతన కలెక్టరేట్ వద్ద ఏర్పాట్లను పరిశీలించిన అనంతరం మంత్రి హరీష్ రావు దమ్మపేట మండలం గండుగులపల్లిలోని మాజీ మంత్రి తుమ్మల నాగేశ్వరరావు నివాసానికి వెళ్తూ.. మార్గమధ్యలో సత్తుపల్లిలో ఆగి ఎమ్మెల్యే సండ్ర వెంకటవీరయ్యను కలుపుకుని వెళ్లారు.

మాజీ మంత్రి తుమ్మల నాగేశ్వరరావుపై ఎమ్మెల్యే సండ్ర వెంకటవీరయ్య పరోక్షంగా వ్యాఖ్యలు చేస్తూ టార్గెట్ చేస్తున్నారు. కమ్మ సామాజిక వర్గాన్ని అడ్డంపెట్టుకుని తనపై దుష్ప్రచారం చేస్తున్నారని తుమ్మలపై పరోక్షంగా విమర్శలు చేశారు. ఈ నేపథ్యంలో మంత్రి హరీష్ రావు స్వయంగా సండ్ర వెంకటవీరయ్యను తుమ్మల నివాసానికి తీసుకువెళ్లడం ఆసక్తికరంగా మారింది.

గురువారం (జనవరి 12) కొత్తగూడెంలో, జనవరి 18న ఖమ్మంలో బీఆర్‌ఎస్ పార్టీ బహిరంగ సభలు నిర్వహించనుంది. టీఆర్‌ఎస్ పార్టీ బీఆర్‌ఎస్‌గా అవతరించిన తర్వాత తొలిసారిగా నిర్వహిస్తున్న సభలు కావడంతో పార్టీ ప్రతిష్టాత్మకంగా తీసుకుంది. బీఆర్‌ఎస్ అధినేత కేసీఆర్ పాల్గొనే ఈ సభలకు 5 లక్షల మందిని తరలించేందుకు పార్టీ శ్రేణులు ప్రయత్నిస్తున్నాయి.

సీఎం కేసీఆర్‌తో జనసేన సలహాదారు రామ్మోహన్‌రావు భేటీ.. ఏపీలో హాట్ టాపిక్