taliban cancelled divorces, Taliban: అఫ్గన్‌లో మరో అరాచకం.. మహిళల విడాకులను రద్దుచేసి.. మాజీ భర్తలతోనే ఉండాలని ఆదేశం – taliban force divorced women back to abusive ex husbands in afghanistan

విడాకులు తీసుకున్న మహిళలను వారి మాజీ భర్తలతోనే కలిసి ఉండేలని ఒత్తిడి తెస్తున్నారనే నివేదికలపై తాలిబాన్‌ ప్రతినిధులు స్పందించారు. అటువంటి ఫిర్యాదులు వస్తే దర్యాప్తు చేపట్టి, అనంతరం షరియా చట్ట ప్రకారం నిర్ణయం తీసుకుంటామని తాలిబాన్‌ అధికార ప్రతినిధి ఇనాయతుల్లా మీడియాకు వెల్లడించారు. గతంలో తీసుకున్న విడాకులను ఆమోదిస్తారా అన్న ప్రశ్నకు.. ఇది ముఖ్యమైన, సంక్లిష్టమైన సమస్య అని సమాధానం దాటవేయడం గమనార్హం.

ఓ అఫ్గన్ మహిళ ఏఎఫ్‌పీ ప్రతినిధితో మాట్లాడుతూ.. ‘తాలిబన్లు రెండోసారి అధికారం చేపట్టిన రోజున దేవుడా ఆ రాక్షసులు మళ్లీ వచ్చారని నేను, నా కుమార్తెలు ఎంతగానో ఏడ్చామని కన్నీటిపర్యంతమయ్యారు. చేతులు విరిగి, వేళ్లు పగులగొట్టి, ఇంట్లోకి లాక్కెళ్లి కొట్టిన దెబ్బలను నెలల తరబడి భరించాను.. నేను అపస్మారక స్థితిలో ఉన్న రోజులు ఉన్నాయి.. నా కుమార్తెలు నాకు ఆహారం పెట్టేవారు.. భర్త నా జుట్టు పట్టుకుని చాలా గట్టిగా ఈడ్చుకెళ్లడంతో పాక్షికంగా బట్టతల ఏర్పడింది.. క్రూరంగా హింసించాడు.. దవడలు వాయించడంతో నా దంతాలు విరిగిపోయాయి’అని భర్త పెట్టిన చిత్రహింసలను గుర్తుచేసుకుంది.

బలాన్ని కూడగట్టుకుని తన ఆరుగురు కుమార్తెలు, ఇద్దరు కుమారులతో వందల కిలోమీటర్ల దూరంలోని తన బంధువుల ఇంటికి పారిపోయామని వాపోయింది. ‘అమ్మా, మనం ఆకలితో అలమటించినా ఫర్వాలేదు. కనీసం ఆ వేధింపులనైనా వదిలించుకున్నాం’అని నా పిల్లలు అంటారు.. కానీ, ఇప్పుడు తాలిబన్లు తీసుకున్న నిర్ణయం మా జీవితాలను మళ్లీ అంధకారంలోకి నెట్టేస్తోందని వాపోయారు. అఫ్గన్‌లోని ప్రతి 10 మంది మహిళల్లో 9 మంది తమ జీవిత భాగస్వామితో శారీరక, లైంగిక, మానసిక వేధింపులను ఎదుర్కొంటున్నట్టు ఐరాస వెల్లడించింది.

Read More Latest International News And Telugu News