News

situation in old city hyderabad today, Hyderabad: పాతబస్తీలో ఉద్రిక్త పరిస్థితులు.. రాజాసింగ్‌కు వ్యతిరేకంగా ‘సర్ తాన్ సే జుడా’ స్లోగన్లు.. లాఠీఛార్జ్! – hyderabad old city remains tense but situation under controlled


మహ్మద్ ప్రవక్తపై గోషామహల్ ఎమ్మెల్యే రాజా సింగ్ వ్యాఖ్యల నేపథ్యంలో హైదరాబాద్ నగరంలో ఉద్రిక్త వాతావరణ నమోదైంది. ఓ వర్గం ఆందోళనలతో రాజాసింగ్‌పై కేసు నమోదు చేసి అరెస్ట్ చేసిన హైదరాబాద్ పోలీసులు.. తర్వాత ఆయన్ను బెయిల్ మీద విడిచిపెట్టారు. బీజేపీ సైతం ఆయన్ను పార్టీ నుంచి సస్పెండ్ చేసింది. అయినప్పటికీ ఆందోళనకారులు శాంతించలేదు. రాజాసింగ్‌కు వ్యతిరేకంగా వీధుల్లోకి వచ్చి నినాదాలు చేస్తున్నారు.

ముఖ్యంగా పాత బస్తీలో కొన్ని చోట్ల ఆందోళనకారులు హింసాత్మక ఘటనలకు పాల్పడ్డారు. పరిస్థితిని అదుపులోకి తేవడం కోసం పాత బస్తీలోని సున్నిత ప్రదేశాల్లో భారీ సంఖ్యలో పోలీసు బలగాలను మోహరించారు. నిరసన ప్రదర్శనలు చేపట్టిన వారిని చెదరగొట్టడం కోసం పోలీసులు లాఠీలకు పని చెప్పాల్సి వచ్చింది. రాత్రి సమయాల్లో యువత పెద్ద ఎత్తున వీధుల్లోకి వచ్చి నిరసన ప్రదర్శనలు చేస్తుండటంతో.. పోలీసులు అప్రమత్తమయ్యారు. మరి కొద్ది రోజుల్లో వినాయక చవితి నవరాత్రులు ప్రారంభం కానున్న నేపథ్యంలో.. నగరంలో భద్రతను కట్టుదిట్టం చేశారు.

పరిస్థితులు ఉద్రిక్తంగా మారుతుండటంతో.. మజ్లిస్ కార్పొరేటర్లు సహా పదుల సంఖ్యలో ఆందోళనకారులను పోలీసులు అదుపులోకి తీసుకున్నారు. నగరంలో పరిస్థితులు ఉద్రిక్తంగానే ఉన్నప్పటికీ.. అదుపులోనే ఉన్నాయి.

రాజాసింగ్‌కు వ్యతిరేకంగా నినాదాలు చేసిన ఆందోళనకారులు సర్ తాన్ సే జుడా అంటూ నినాదాలు చేశారు. తలను మొండెం నుంచి వేరు చేయాలని డిమాండ్ చేయడమే ఈ స్లోగన్ అర్థం. పోలీసుల ముందు కొందరే ఇలాంటి నినాదాలు చేయడం గమనార్హం.
బీజేపీ ఎమ్మెల్యేకు వ్యతిరేకంగా జరిగిన ఆందోళనలకు సయ్యద్ అబ్దాహ్ కషఫ్ అనే వ్యక్తి నేతృత్వం వహించారు. సోషల్, సివిల్ రైట్స్ యాక్టివిస్ట్‌గా చెప్పుకునే ఆయన ‘సర్ తాన్ సే జుడా’ స్లోగన్‌ను సమర్థించారు. సోమవారం రాత్రి ఆయన ట్వీట్ చేసిన వీడియోలో సయ్యద్ ఈ నినాదాలు చేశారు. సౌత్ జోన్ డీసీపీ ఆఫీసు ముందు నిర్వహించిన ఆందోళనలను కొనసాగించాలని కూడా ఆయన పిలుపునిచ్చారు.
దైవ దూషణకు వ్యతిరేకంగా తాను ‘సర్ తాన్ సో జుడా’ అని నినదించానని.. దానికి తానేం బాధపడటం లేదని సయ్యద్ చెప్పారు. ‘నిరసన ప్రదర్శనలు చేపట్టే సమయంలో నేను కూడా ఆ నినాదమిచ్చా. రాజ్యాంగానికి వ్యతిరేకంగా చేయాలనేది నా ఉద్దేశం కాదు. మహ్మద్ ప్రవక్తను కించపరిచేలా వ్యాఖ్యానించిన వ్యక్తిని శిక్షించాలనే ఉద్దేశంతోనే ఆ నినాదమిచ్చాను. అది నా మత విశ్వాసం’ అని సయ్యద్ కషఫ్ తెలిపారు.

Related Articles

Back to top button