News

sanju samson, పాపం సంజూ శాంసన్.. క్రికెటర్‌ను వెంటాడుతున్న దురదృష్టం! – sanju samson likely to miss second t20i against sri lanka due to minor knee problem


సంజూ శాంసన్ అభిమానులకు బ్యాడ్ న్యూస్. గురువారం పుణే వేదికగా శ్రీలంకతో జరగనున్న రెండో టీ20లో సంజూ ఆడటం అనుమానంగా మారింది. రెండో టీ20 కోసం భారత జట్టు ముంబై నుంచి పుణే బయల్దేరి వెళ్లగా… మోకాలి నొప్పితో బాధపడుతున్న శాంసన్ స్కానింగ్ కోసం ముంబైలోనే ఉండిపోయాడు.

శ్రీలంకతో జరిగిన తొలి వన్డేలో.. ఫస్ట్ ఓవర్లోనే క్యాచ్ అందుకునే ప్రయత్నంలో శాంసన్ డైవ్ చేశాడు. బంతిని అందుకున్నప్పటికీ.. దాన్ని జాగ్రత్తగా ఒడిసిపట్టుకోలేకపోయాడు. ఆ సమయంలోనే అతడి మోకాలికి దెబ్బ తగిలినప్పటికీ.. ఫీల్డింగ్ చేశాడు. కానీ తర్వాత మోకాలు వాపు రావడంతో వైద్య సిబ్బందిని సంప్రదించాల్సి వచ్చింది.

హార్దిక్ పాండ్య బౌలింగ్‌లో లంక ఓపెనర్ పాథున్ నిస్సంక షాట్ ఆడబోయాడు. కానీ బంతి ఎడ్జ్ తీసుకోవడంతో.. మిడాఫ్ వద్ద ఫీల్డింగ్ చేస్తున్న శాంసన్.. క్యాచ్ అందుకునేందుకు ప్రయత్నించి గాయపడ్డాడు. శ్రీలంక ఇన్నింగ్స్ తొలి ఓవర్ రెండో బంతికే ఈ ఘటన చోటు చేసుకుంది.

గాయం కారణంగా రెండో మ్యాచ్‌‌లో శాంసన్ ఆడేది అనుమానంగా మారింది. మెడికల్ టీం స్కానింగ్ రిపోర్టులను పరిశీలించిన తర్వాతే మేనేజ్‌మెంట్ అతణ్ని ఆడించే విషయంలో ఓ నిర్ణయానికి రానుంది. సంజూ ముంబైలోనే ఉండిపోవడంతో.. అతడు పుణే మ్యాచ్‌కు దూరమయ్యే అవకాశాలే ఎక్కువగా ఉన్నాయి. కానీ ముంబై నుంచి 3 గంటల్లోపే పుణే చేరుకోవచ్చు. దీంతో అతడు ఆడే అవకాశాలను పూర్తిగా కొట్టిపారేయలేం.

ఒకవేళ రెండో టీ20కి శాంసన్ దూరమైతే అతడిది నిజంగా దురదృష్టమే. ఎందుకంటే.. అవకాశాల కోసం సంజూ చాలా కాలంగా ఎదురు చూస్తు్న్నాడు. ఆసియా కప్, టీ20 వరల్డ్ కప్‌ కోసం శాంసన్‌ను మేనేజ్‌మెంట్ పరిగణనలోకి తీసుకోలేదు. న్యూజిలాండ్‌తో సిరీస్‌లో ఒక్క వన్డేలో మాత్రమే అతడికి ఆడే అవకాశం లభించింది.

దీంతో రిషబ్ పంత్ పేలవ ప్రదర్శన చేస్తున్నప్పటికీ.. సంజూ శాంసన్‌ను పక్కనబెట్టి మరీ అతడికి అవకాశాలు ఇవ్వడాన్ని శాంసన్ ఫ్యాన్స్ ప్రశ్నించారు. సంజూకు వరుసగా పది మ్యాచ్‌ల్లో అవకాశం ఇచ్చి చూడాలని టీమిండియా మాజీ కోచ్ రవిశాస్త్రి సూచించారు. యువ క్రికెటర్ పట్ల బీసీసీఐ వివక్ష చూపుతోందని.. అతడు రిటైర్మెంట్ ప్రకటించి లీగ్‌ల్లో ఆడుకోవడం బెటర్ అని కొందరు సలహాలు ఇచ్చారు.

ఈ నేపథ్యంలోనే శ్రీలంకతో టీ20 సిరీస్ కోసం శాంసన్‌ను ఎంపిక చేశారు. తొలి టీ20లో ఆడే అవకాశం లభించినప్పటికీ శాంసన్ ఆకట్టుకోలేకపోయాడు. భారత జట్టు 38 పరుగులకే 2 వికెట్లు కోల్పోయిన దశలో క్రీజ్‌లో వచ్చిన శాంసన్ (6 బంతుల్లో 5 పరుగులు) నిరాశపర్చాడు. ఇప్పుడు గాయం కారణంగా రెండో టీ20కి అతడు దూరమయ్యే పరిస్థితి ఉండటంతో.. అతడి ఫ్యాన్స్ ఆందోళన చెందుతున్నారు.

సంజూ శాంసన్ రెండో మ్యాచ్‌కు దూరమైతే అతడి స్థానంలో ఆల్‌రౌండర్ వాషింగ్టన్ సుందర్ లేదా రాహుల్ త్రిపాఠిని ఆడించే అవకాశం ఉంది. మంచి ఫామ్‌లో ఉన్న త్రిపాఠి సైతం జట్టులో చోటు కోసం గత కొంత కాలంగా ఎదురు చూస్తున్నాడు.

Read More Sports News And Telugu News

Advertisement

Related Articles

Back to top button