News

sajjala ramakrishna reddy, ఎమ్మెల్సీ ఎన్నికల కౌంటింగ్‌లో అక్రమాలు.. సజ్జల రామకృష్ణారెడ్డి తీవ్ర ఆరోపణలు – ap govt advisor sajjala ramakrishna reddy comments on mlc elections counting


పశ్చిమ రాయలసీమ ఎమ్మెల్సీ ఎన్నికల కౌంటింగ్‌లో పెద్ద ఎత్తున అక్రమాలు జరిగాయని రాష్ట్ర ప్రభుత్వ సలహాదారు సజ్జల రామకృష్ణారెడ్డి ఆరోపించారు. ఎన్నికల్లో పలువురు అధికారుల తీరుపై అనుమానాలు ఉన్నాయని తెలిపారు. తెలుగు దేశం పార్టీ అధినేత చంద్రబాబునాయుడుకు వ్యవస్థలను మేనేజ్‌ చేయడం అలవాటే అని విమర్శించారు. ఈ మేరకు ఆదివారం అసెంబ్లీ మీడియా పాయింట్‌ వద్ద సజ్జల రామకృష్ణారెడ్డి మాట్లాడుతూ.. ప్రతిపక్షంలో ఉన్నా చంద్రబాబునాయుడిది దబాయింపే అని విమర్శించారు. చంద్రబాబు హయాంలో వ్యవస్థలను తొక్కిపెట్టారని.. గత ప్రభుత్వం ప్రజాస్వామ్యాన్ని హత్య చేసిందన్నారు. అర్జెంటుగా అధికారంలోకి వచ్చేయాలన్నది చంద్రబాబు ఆశ అని.. కానీ, ఆయన ఆశలు కలలుగానే మిగులుతాయన్నారు. చంద్రబాబు మళ్లీ అధికారంలోకి వచ్చే అవకాశమే లేదన్నారు.

పశ్చిమ రాయలసీమ ఎమ్మెల్సీ ఎన్నికల కౌంటింగ్‌లో పలువురు అధికారుల తీరుపై అనుమానాలున్నాయని.. ఒక్క బండిల్‌లోనే 6 ఓట్లు తేడాగా కనిపించాయని సజ్జల తెలిపారు. అన్ని బండిల్స్‌లోనూ గమనిస్తే అసలు విషయం తెలుస్తుందన్నారు. కౌంటింగ్‌ సమయంలో అధికారులు ఎలా వ్యవహరించారో చూశామని.. వైసీపీ ఓట్లను టీడీపీ ఓట్లలో కలిపేశారని ఆరోపించారు. దీనిపై కౌంటింగ్‌ అయిపోయాక అడగాలని ఆర్వో అన్నారని.. రీకౌంటింగ్‌ చేయాలని కోరడం అభ్యర్థి హక్కు అని అన్నారు.

ఇక, తెలుగుదేశం పార్టీ వైరస్‌ లాంటిదని.. అన్ని వ్యవస్థలను ఆ వైరస్‌ పాడు చేస్తుందని సజ్జల రామకృష్ణారెడ్డి అన్నారు. వైసీపీ ఎప్పుడూ ధర్మయుద్ధమే చేస్తుందని స్పష్టం చేశారు. ‘‘ప్రజలు చంద్రబాబు కోసం వేయి కళ్లతో నిరీక్షిస్తున్నారు.’’ అని ఆయన అనుకుంటే.. రాబోయే ఎన్నికల్లో 175 స్థానాలకూ పోటీ పెడతానని ఎందుకు అనలేకపోతున్నారని ప్రశ్నించారు. దత్తపుత్రడు లేకుండా అడుగు బయటకు వేయలేనని ఎందుకు అనుకుంటున్నారని నిలదీశారు. ఈ ఫలితాలు చూసి ధైర్యం వచ్చిందనుకుంటే 175 స్థానాలకూ పోటీ చేస్తామని చెప్పాలని సవాల్ విసిరారు.

రీ కౌంటింగ్‌కు, అక్రమాలపై అభ్యంతరం చెప్పడానికి అక్కడి అభ్యర్థికి హక్కు ఉందా లేదా అనేది చూడాలని సజ్జల రామకృష్ణారెడ్డి అన్నారు. నిబంధనల మేరకు ఏ అభ్యంతరం లేవనెత్తినా అధికారులు పరిష్కారం చూపాలని.. 8వ రౌండ్లో టీడీపీవి కాని ఓట్లు ఆ పార్టీకి కలిపారని అభ్యంతరం చెప్పారని గుర్తు చేశారు. పరిశీలిస్తే 6 ఓట్లు దాంట్లో బయటపడ్డాయని.. ఆర్వో కూడా నిజమేనని ఒప్పుకున్నారని పేర్కొన్నారు. అప్పటి నుంచీ వరుసగా జరిగిన కౌంటింగ్‌ తీరుపై అభ్యంతరాలు చెప్తూనే ఉన్నామని.. రిటర్నింగ్‌ అధికారి మాత్రం కౌంటింగ్‌ అయిన తర్వాత పరిశీలిద్దాం అన్నారని చెప్పారు. తాము కూడా అదే చేశామని.. కౌంటింగ్‌ ముగిశాక మళ్లీ లెటర్‌ పెట్టి రీకౌంటింగ్‌ అడిగామని, గెలిచిన అభ్యర్థికి వచ్చిన ఓట్లను మరొకసారి వెరిఫై చేయమని అడిగామని వెల్లడించారు. ఇది తమకు ఉన్న హక్కు అని.. ఈ విషయం చట్టమే చెప్తోందన్నారు.

అలాగే, కుప్పంలో తాము కొట్టిన దెబ్బ నుంచి తెరుకోలేక.. ఇప్పుడు పులివెందులలో విజయం అంటూ చంద్రబాబు చెప్పుకుంటున్నారని సజ్జల రామకృష్ణారెడ్డి ఎద్దేవా చేశారు. ఎమ్మెల్సీ కౌంటింగు మూడు జిల్లాలకు సంబంధించినదని.. ఒక్క పులివెందులదే అని ఎలా చెప్తారని ప్రశ్నించారు. కుప్పంలో ఎంపీటీసీ, జడ్పీటీసీ, మున్సిపల్‌ ఎన్నికలు స్థానికంగా ఉండేవి.. వాటన్నింట్లో తాము గెలిచామని గుర్తు చేశారు. కానీ, మూడు పాత జిల్లాలు కలిపి కౌంటింగు చేస్తే.. ఈయనకు పులివెందుల మాత్రమే కనిపించిందట అని సెటైర్లు వేశారు. పులివెందులలో అయిపోందంటూ వీళ్లే సోషల్‌ మీడియాలో నాలుగు రాసుకుని శునకానందం పొందుతుంటారని ఎద్దేవా చేశారు.

Related Articles

Back to top button