News

rahul gandhi, KGF పాటను వాడేసిన కాంగ్రెస్.. రాహుల్ గాంధీపై కాపీరైట్ కేసు నమోదు – rahul gandhi and two congress leaders booked for copyright violation for using kgf film songs


Authored by VaraPrasad M | Samayam Telugu | Updated: 4 Nov 2022, 8:46 pm

బెంగళూరుకు చెందిన ఎంఆర్‌టీ మ్యూజిక్ కంపెనీ రాహుల్ గాంధీతో (Rahul Gandhi) పాటు మరో ఇద్దరు కాంగ్రెస్ నాయకులపై కాపీరైట్ కేసు పెట్టింది. తాము మ్యూజిక్ రైట్స్ పొందిన KGF చాప్టర్ 2 సినిమాలోని పాటలను రాహుల్ గాంధీని ఎలివేట్ చేయడానికి వాడేస్తున్నారని.. దీని కోసం తమ అనుమతి తీసుకోలేదని.. ఇది కాపీరైట్ ఉల్లంఘటన అవుతుందని కంపెనీ పేర్కొ్ంది. ఈ మేరకు బెంగళూరు సిటీ పోలీసులకు ఫిర్యాదు చేసింది. రాహుల్ గాంధీతో పాటు మరో ఇద్దరిపై బెంగళూరు సిటీ పోలీసులు కేసు నమోదు చేశారు.

 

రాహుల్ గాంధీ, యశ్

ప్రధానాంశాలు:

  • భారత్ జోడో యాత్ర వీడియోల్లో ‘కేజీఎఫ్ 2’ పాటలు
  • ముగ్గురిపై కేసు వేసిన ఎంఆర్‌టీ మ్యూజిక్
  • పొలిటికల్ పార్టీ ఇమేజ్ దెబ్బతీయడానికి కాదన్న కంపెనీ
ఎలాంటి ముందస్తు అనుమతి లేకుండా KGF 2 సినిమాలోని పాటలను భారత్ జోడో యాత్ర ప్రచారానికి వాడుకున్నందుకు దీన్ని కాపీరైట్ ఉల్లంఘనగా పరిగణిస్తూ కాంగ్రెస్ జనరల్ సెక్రటరీ జైరాం రమేష్, కాంగ్రెస్ సోషల్ మీడియా హెడ్ సుప్రియా శ్రీనటేతో పాటు అగ్రనేత రాహుల్ గాంధీపై (Rahul Gandhi) బెంగళూరు సిటీ పోలీసులు శుక్రవారం ఎఫ్ఐఆర్ నమోదు చేశారు. KGF 2 మ్యూజిక్ హక్కులను సొంతం చేసుకున్న ఎంఆర్‌టీ మ్యూజిక్ కంపెనీ ఫిర్యాదు మేరకు ఈ కాపీరైట్ ఉల్లంఘన కేసు నమోదైంది. ఈ మేరకు ఎంఆర్‌టీ మ్యూజిక్ కంపెనీ శుక్రవారం ఒక ప్రెస్ నోట్ విడుదల చేసింది.

తమ కంపెనీ 20వేలకు పైగా కన్నడ, హిందీ, తెలుగు, తమిళ పాటల మ్యూజిక్ రైట్స్‌ను కలిగి ఉందని పేర్కొన్న ఎంఆర్‌టీ మ్యూజిక్.. ఈ హక్కుల కోసం బోలెడంత డబ్బును పెట్టుబడిగా పెట్టామని వెల్లడించింది. తాము మ్యూజిక్ రైట్స్ కలిగి ఉన్న భారీ చిత్రాల్లో ‘KGF చాప్టర్ 2’ హిందీ మూవీ కూడా ఒకటని తెలిపింది. అయితే, ఇండియన్ నేషనల్ కాంగ్రెస్.. ఎంఆర్‌టీ మ్యూజిక్ నుంచి ఎలాంటి అనుమతులు కానీ, లైసెన్స్ కానీ పొందకుండా కేజీఎఫ్ చాప్టర్ 2 పాటలను వాడుకుందని పేర్కొంది. రాహుల్ గాంధీ చేస్తోన్న భారత్ జోడో యాత్ర ప్రచార వీడియోల్లో తమ పాటలను వాడారని తెలిపింది. ఇది కాపీరైట్ ఉల్లంఘన కిందికి వస్తుంది కాబట్టి తాము యశ్వంత్‌పూర్ పోలీసులకు ఫిర్యాదు చేశామని.. వారు ఐపీసీ, ఇన్ఫర్మేషన్ టెక్నాలజీ యాక్ట్ 2000తో పాటు కాపీరైట్ యాక్ట్ 1957 కింద కేసు నమోదు చేశారని వెల్లడించింది.

ఒక జాతీయ రాజకీయ పార్టీ చేసిన ఈ చట్టవిరుద్ధమైన చర్యలు.. చట్టం మీద, ప్రైవేటు వ్యక్తుల హక్కుల పట్ల ఆ పార్టీకి ఉన్న నిర్లక్ష్యాన్ని ప్రతిబింబిస్తాయని ఎంఆర్‌టీ మ్యూజిక్ కంపెనీ లీగల్ కౌన్సిల్ వెల్లడించింది. ప్రభుత్వాన్ని ఏర్పరచడానికి.. సామాన్య పౌరులు, వ్యాపారుల హక్కులను కాపాడే చట్టాలు చేయడానికి భారత్ జోడో యాత్ర నిర్వహిస్తోన్న రాజకీయ పార్టీ ఇలా చేయడం సరికాదని అభిప్రాయపడింది. తమ చట్టబద్ధమైన హక్కుల మేరకే ఎంఆర్‌టీ మ్యూజిక్ కంపెనీ కాంగ్రెస్ పార్టీపై కేసు నమోదు చేసిందని.. అందేకానీ ఏ రాజకీయ పార్టీ ప్రతిష్ఠకు భంగం కలిగించే ఉద్దేశం తమ కంపెనీకి లేదని కౌన్సిల్ పేర్కొంది.

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.

Related Articles

Back to top button