News

raghu rama krishnam raju, అదే జరిగితే నేనూ పోటీ చేస్తాను.. అప్పుడు గౌరవించి నామినేషన్ వేయలేదు: రఘురామ – mp raghu rama krishna raju respond on ysrcp permanent president post


తెలుగువారికి ఆత్మ గౌరవాన్ని తీసుకువచ్చిన వ్యక్తి ఎన్టీఆర్ అన్నారు నరసాపురం ఎంపీ రఘురామ కృష్ణరాజు (Raghu Rama Krishna Raju). ఇది ఎవరూ కాదనలేని సత్యమని.. అప్పటివరకు అందరూ తెలుగువారిని మద్రాసీలు అనేవారన్నారు. అటువంటి తెలుగు వారికి ఆత్మగౌరవాన్ని తీసుకువచ్చిన వ్యక్తి ఎన్టీఆర్.. తెలుగువారికి ఆత్మ గౌరవాన్ని తీసుకువచ్చిన ఎన్టీఆర్ ఆత్మగౌరవం నడివీధిలో ఉంది అన్నారు. ఎన్టీఆర్ ఆత్మ గౌరవాన్ని కాపాడాల్సిన బాధ్యత ప్రపంచ నలుమూలలా ఉన్న తెలుగు వారందరిపై ఉందన్నారు. ఎన్టీఆర్ పేరును తిరిగి పునరుద్ధరించే వరకు.. రాష్ట్ర ప్రభుత్వం తన నిర్ణయం వెనక్కి తీసుకునే వరకు.. శాంతియుత పద్ధతిలో పోరాడుదామని పిలుపునిచ్చారు. ఎన్టీఆర్ హెల్త్ యూనివర్సిటీ పేరు మార్పును నిలిపివేసేలా మధ్యంతర ఉత్తర్వులు జారీ చేయాలని కోరుతూ తక్షణమే కోర్టును ఆశ్రయించాలని పూర్వ విద్యార్థులకు సూచించారు.

వైఎస్ జగన్ రాగద్వేషాలకు, బంధు ప్రీతికి అతీతంగా వ్యవహరిస్తానని ముఖ్యమంత్రిగా ప్రమాణ స్వీకారం చేశారని గుర్తు చేశారు. కానీ ఇప్పుడు తాను చేసిన ప్రమాణస్వీకారానికి భిన్నంగా వ్యవహరిస్తున్నారని విమర్శించారు. ఎన్టీఆర్ హెల్త్ యూనివర్సిటీ పేరు మార్పుపై తాను త్వరలోనే యుజిసి ఛైర్మన్‌ని కలిసి చర్చిస్తానని తెలిపారు. తాను శాశ్వత అధ్యక్షుడ్ని కాదు బాబోయ్ అని కేంద్ర ఎన్నికల కమిషన్‌కు చెప్పినట్టుగానే.. తనకు సలహాదారులు సరైన సలహాలు ఇవ్వలేదన్నారు. తప్పు చేయడం మానవ సహజం అని చెప్పి తన తప్పును ఒప్పుకొని ఎన్టీఆర్ హెల్త్ యూనివర్సిటీ పేరు మార్పు నిర్ణయాన్ని వెనక్కి తీసుకోవాలన్నారు. తిరిగి ఎన్టీఆర్ పేరును పునరుద్ధరించాలన్నారు.

ఆంధ్రప్రదేశ్ ముఖ్యమంత్రులుగా టంగుటూరి ప్రకాశం పంతులు నుంచి ఎంతోమంది పనిచేశారని.. వీరిలో దివంగత ముఖ్యమంత్రి వైఎస్ రాజశేఖర్ రెడ్డికి ఉన్న అదనపు అర్హత ఏమిటంటే.. ఈ మహానుభావుడైన జగన్ తండ్రి కావడమే అన్నారు. వస్తాయో రావో తెలియని 17 మెడికల్ కాలేజీలను నిర్మిస్తున్నామని.. అలాగే ఎన్టీ రామారావు ఎంబీబీఎస్ చదవలేదు కాబట్టి వైఎస్ రాజశేఖర్ రెడ్డి ఎంబీబీఎస్ చదివినందుకు హెల్త్ యూనివర్సిటీకి ఆయన పేరు పెడుతున్నట్లుగా జగన్ పేర్కొనడం హాస్యాస్పదంగా ఉందన్నారు. పథకాలకు పేరు పెట్టడం వేరు, వ్యవస్థల పేర్లు మార్చడం వేరు అన్నారు. రాష్ట్రంలో అమలవుతున్న 20 పథకాలు జగన్ పేరిట కొనసాగుతుండగా.. మరో 55 పథకాలు వైఎస్ రాజశేఖర్ రెడ్డి పేరిట కొనసాగుతున్నాయని తెలిపారు. ప్రతిదానికి తండ్రి కొడుకుల పేర్లు పెట్టడం ఏమిటని ప్రశ్నించారు. ప్రభుత్వం మారితే పథకాల పేర్లు కూడా మారిపోతాయి అన్నారు.

యూనివర్సిటీ గ్రాంట్ కమిషన్ (యు జి సి), నేషనల్ మెడికల్ కౌన్సిల్ (ఎన్ ఎం సి)ల ఆమోదం పొందిన తర్వాతే పేరు మార్పు పై ఒక స్పష్టత వచ్చే అవకాశం ఉందన్నారు రఘురామ. తాను ఇప్పటికే పలువురు మాజీ యుజిసి, ప్రస్తుత యుజిసి అధికారులతో ఈ విషయమై చర్చించానన్నారు. యూనివర్సిటీ పేరు మార్పు వల్ల విదేశాలకు వెళ్లిన విద్యార్థుల సర్టిఫికెట్ల పరిశీలనలో గందరగోళం ఉంటుందని.. అప్పుడు వారు ఇబ్బందుల్లో పడతారని ఆవేదన వ్యక్తం చేశారు.

కేంద్ర ఎన్నికల కమిషన్ ఆడిగిన వాటికి వివరణ ఇవ్వకపోతే పార్టీ గుర్తింపు రద్దు అవుతుందని రఘురామకృష్ణ రాజు అన్నారు. పార్టీ గుర్తింపును రద్దు చేసుకోరు కనుక నాలుగేళ్ల కాలానికి అధ్యక్ష పదవికి ఎన్నిక నిర్వహిస్తే తాను కూడా పోటీ చేస్తాను అన్నారు. పార్టీలో ఒక పద్దతి తీసుకురావడానికే తాను పోటీ చేయాలనుకుంటున్నాను అన్నారు. కాంగ్రెస్ పార్టీ అధ్యక్ష పదవి కోసం ప్రజాస్వామ్య పద్ధతిలో ఎన్నిక నిర్వహిస్తున్నారని.. వైఎస్సార్‌సీపీలోనూ అంతర్గత ప్రజాస్వామ్యం ఉండాలని ఆకాంక్షించారు. శాశ్వత అధ్యక్షుడు అనే పదం పార్టీ రాజ్యాంగానికి, ప్రజాస్వామ్య వ్యవస్థకు విరుద్ధమని.. అందుకే తాను అధ్యక్ష ఎన్నికకు ప్రజాస్వామ్యాన్ని గౌరవించే వ్యక్తిగా నామినేషన్ దాఖలు చేయలేదన్నారు.

కుప్పంలో ముఖ్యమంత్రి వైఎస్ జగన్ పర్యటన సందర్భంగా, రాష్ట్ర నలుమూలల నుంచి ప్రజలను అక్కడికి తరలించేందుకు ఏర్పాట్లు చేస్తున్నారని రఘురామకృష్ణ రాజు అన్నారు. స్కూలు బస్సులలో ప్రజలను తరలించేందుకు వీలుగా పాఠశాలలకు సెలవులు ప్రకటించారని.. కుప్పంలో ఓట్లు వేయడానికి పొరుగు రాష్ట్రమైన తమిళనాడు నుంచి ప్రజలను తరలించినట్టుగానే.. ఇప్పుడు కుప్పంలో జగన్ పర్యటన కోసం రాష్ట్రవ్యాప్తంగా ప్రజలను బస్సులలో తరలించేందుకు ఏర్పాట్లు చేయడం విడ్డూరంగా ఉందన్నారు. కుప్పం ప్రజలు ఎలాగో జగన్ పర్యటనకు దూరంగా ఉంటారని తెలిసే ఇతర ప్రాంతాలు ప్రజలను తరలిస్తున్నారని సెటైర్లు పేల్చారు.

Related Articles

Back to top button