News

Planet Killer Asteroid, Planet Killer భూమి దిశగా దూసుకొస్తున్న భారీ గ్రహశకలం.. సూర్య కాంతిలో గుర్తించలేకపోయిన శాస్త్రవేత్తలు – astronomers detect huge planet killer asteroid that could be threaten earth


Planet Killer సూర్యుడి (Sun) కాంతి వల్ల ఇప్పటి వరకూ కనిపించని భూమికి సమీపంలోని ఉన్న మూడు భారీ గ్రహశకలాలను (Asteroid) అంతరిక్ష శాస్త్రవేత్తల బృందం గుర్తించింది. భూమి (Earth), శుక్రుడి (Venus) కక్ష్య మధ్యలో తిరుగుతున్న ఈ గ్రహశకలాలు భూమివైపు దూసుకొస్తున్నాయని, ఈ మూడింటిలో ఒకదాని వ్యాసం 1.1 కిలోమీటర్ల నుంచి 2.3 కిలోమీటర్లు ఉంటుందని తెలిపారు. దీనిని 2022 ఏపీ7 (2022 AP7) అని వ్యవహరిస్తున్నట్లు పేర్కొన్నారు. 2014 తర్వాత ఇంత పెద్ద గ్రహశకలాన్ని గుర్తించలేదని, ఇప్పటి వరకు గుర్తించిన వాటిల్లోని టాప్ 5% లో ఇది కూడా ఉంటుందని వివరించారు. ఇంత భారీస్థాయిలో ఉండే గ్రహశకలాలను ‘ప్లానెట్ కిల్లర్’‌గా (Planet Killer) వ్యవహరిస్తారని కార్నెగీ ఇనిస్టిట్యూషన్ ఫర్ సైన్స్ పరిశోధకుడు స్కాట్ షెపర్డ్ (Scott Shepard) వెల్లడించారు.

ఇంతటి భారీ గ్రహశకలాలు తిరుగుతున్నా ఇప్పటి వరకు గుర్తించకపోవడానికి సూర్యుడి కాంతే కారణమని అని శాస్త్రవేత్తలు తెలిపారు. ప్రకాశవంతమైన కాంతి వల్ల ఈ గ్రహశకలాన్ని టెలిస్కోప్‌లలో గుర్తించలేకపోయామని పేర్కొన్నారు. ఈ పరిశోధన వివరాలను ‘ది ఆస్ట్రోనామికల్ జర్నల్’‌లో ప్రచురించారు. భూకక్ష్యలోనే తిరుగుతున్నప్పటికీ సూర్యుడి కాంతి కప్పేయడం వల్ల ఈ భారీ గ్రహశకలాలను ఇప్పటి వరకూ గుర్తించలేకపోయినట్టు పరిశోధకులు చెప్పారు. అయితే, డార్క్ ఎనర్జీ కెమెరా సాయంతో సూర్యుడి కాంతి ప్రభావం తక్కువగా ఉన్న సమయంలో వీటిని గుర్తించినట్లు వివరించారు. విండో ఆఫ్ ట్విలైట్‌గా వ్యవహరించే ఈ సమయం రోజు మొత్తమ్మీద కేవలం 10 నిమిషాలు మాత్రమే ఉంటుందని పరిశోధకులు చెప్పారు.

ఆ సమయంలో చిలీలోని సెర్రో టోలోలో ఇంటర్-అమెరికా అబ్జర్వేటరీ‌లోని డార్క్ ఎనర్జీ కెమెరాను ఉపయోగించి ఈ గ్రహశకలాలను గుర్తించినట్టు తెలిపారు. మిగతా 2021 LJ4, 2021 PH27 గ్రహశకలాలు భూ కక్ష్య పరిమితుల్లో సురక్షిత నిర్బంధ కక్ష్యలను కలిగి ఉన్నాయి. ఒక కిలోమీటరు కంటే తక్కువ వ్యాసంలో ఉండే 2021 LJ4 పరిమాణంలో అతి చిన్నది. 2021 PH27 సూర్యుడికి అత్యంత సమీపంలో ఉండటం వల్ల దాని ఉపరితలం సీసం కరిగేంత వేడిగా ఉంటుందని పేర్కొన్నారు. ప్రస్తుతానికి 2022ఏపీ 7 గ్రహశకలం భూమిని ఢీ కొట్టే ముప్పు లేదని షెపర్డ్ వివరించారు. ఈ గ్రహశకలం భూమికి సమీపంలో నుంచి భూకక్ష్య ను దాటుకుంటూ పోతుందని, భూమికి దగ్గరగా రావడానికి చాలా ఏళ్లు పడుతుందని, అప్పటికి దీని వల్ల ముప్పు ఉంటుందా? లేదా? అనేది ఇప్పుడే చెప్పలేమని వ్యాఖ్యానించారు.

US నేషనల్ సైన్స్ ఫౌండేషన్ (NSF) NOIRLAB హై-టెక్ కెమెరా సాయంతో ఆకాశంలోని ఈ పెద్ద గ్రహశకలాలను గుర్తించగలిగారు. వాస్తవానికి 2013- 2019 మధ్య అమెరికా డిపార్ట్‌మెంట్ ఆఫ్ ఎనర్జీ, NSF నిర్వహించిన డార్క్ ఎనర్జీ సర్వే కోసం ఈ కెమెరాను రూపొందించారు. కాగా, ఇప్పటి వరకూ భూకక్ష్యలో 25 గ్రహశకలాలను శాస్త్రవేత్తలు గుర్తించారు.

Related Articles

Back to top button