News

Pelosi Taiwan Visit, Nancy Pelosi అమెరికా, చైనా మధ్య అగ్గిరాజేసిన పెలోసీ పర్యటన… తైవాన్‌పైకి యుద్ధ విమానాలు పంపిన చైనా – china fighter jets enter taiwan air defence zone as us speaker nancy pelosi visit


అగ్రరాజ్యం ప్రతినిధుల సభ స్పీకర్‌ నాన్సీ పెలోసీ (Nancy Pelosi) ఆసియా పర్యటన చైనా, అమెరికాల (US China Conflict) మధ్య ఉద్రిక్తతలకు కారణమయ్యింది. చైనా హెచ్చరికలు బేఖాతరు చేస్తూ తైవాన్‌‌లోకి (Taiwan Tour) పెలోసీ అడుగుపెట్టారు. ‘తైవాన్‌ ప్రజాస్వామ్యానికి మద్దతు ఇవ్వడంలో అమెరికా నిబద్ధతకు మా పర్యటన నిదర్శనం.. దీర్ఘకాలంగా మేము అనుసరిస్తున్న విధానాలకు ఈ పర్యటన విరుద్ధం కాదు’ అని పెలోసీ వ్యాఖ్యానించారు. తైపీలో అడుగుపెట్టిన పెలోసీ బృందానికి అక్కడ ఘనస్వాగతం లభించింది. ‘వెల్‌కం టు తైవాన్‌, స్పీకర్‌ పెలోసీ’ అంటూ ఎల్‌ఈడీ విద్యుత్ దీపాలతో భవనాలపై అలంకరించారు.

* తైవాన్‌లో నాన్సీ పెలోసీ కాలుపెడితే తగిన మూల్యం చెల్లించుకోక తప్పదని చైనా పదే పదే హెచ్చరించినా అమెరికా మాత్రం వెనక్కు తగ్గలేదు. పెలోసీ తైవాన్‌ పర్యటన నేపథ్యంలో చైనా సైనిక కార్యకలాపాలను వేగవంతం చేసింది. అటు, అమెరికా సైతం తమ ఆసియా – పసిఫిక్‌ కమాండ్‌ను అప్రమత్తం చేసింది. దీంతో ఏం జరుగుతుందోననే ఆందోళన అంతర్జాతీయంగా వ్యక్తమవుతోంది.

పెలోసీ తైపీలో అడుపెట్టగానే 20కిపైగా చైనా యుద్ధ విమానాలు తమ గగనతల రక్షణ జోన్‌లోకి ప్రవేశించినట్టు తైవాన్ అధికారులు తెలిపారు. దీనిపై తైవాన్ రక్షణ శాఖ ట్విట్టర్‌లో ఓ ప్రకటన విడుదల చేసింది. ‘‘ఆగస్టు 2, 2022న 21 చైనా పీపుల్స్ లిబరేషన్ ఆర్మీ (CPLA) యుద్ధ విమానాలు తైవాన్ వాయువ్య గగనతల రక్షణ వ్యవస్థలోకి ప్రవేశించాయి’’ అని తెలిపింది.

అయితే, తైవాన్ ఎయిర్ డిఫెన్స్ గుర్తింపు ప్రాంతం (ADIZ ) అనేది తైవాన్ ప్రాదేశిక గగనతలంలా లేదు కానీ చైనా స్వంత ఎయిర్ డిఫెన్స్ ఐడెంటిఫికేషన్ జోన్‌లో కొంత భాగంతో వ్యాప్తి చెందుతుంది.. ప్రధాన భూభాగంలో కొంత భాగాన్ని కూడా కలిగి ఉంటుంది.

మరోవైపు, తైవాన్‌ తూర్పు తీరంలో అమెరికాకు చెందిన నాలుగు యుద్ధనౌకలను మోహరించినట్లు రాయిటర్స్‌ కథనం వెల్లడించింది. అమెరికా నౌకాదళానికి చెందిన విమాన వాహక నౌక ‘యూఎస్‌ఎస్‌ రొనాల్డ్‌ రీగన్‌’ దక్షిణ చైనా సముద్రాన్ని దాటుకొని ఫిలిప్పీన్స్‌ సముద్రంలోకి చేరిందని ఆ కథనం పేర్కొంది. 25 ఏళ్ల తర్వాత అమెరికా అత్యున్నత స్థాయి నేత తైవాన్‌లో పర్యటించడం ఇదే మొదటిసారి.

దీంతో నాన్సీ పెలోసీ పర్యటనపై చైనా విదేశాంగ మంత్రి వాంగ్ యీ నిప్పులు చెరిగారు. ‘అమెరికా జాతీయ విశ్వసనీయతకు ఇది విఘాతం.. ఆ దేశ రాజకీయ నేతలు కొందరు నిప్పుతో చెలగాటం ఆడుతున్నారు.. ఈ పరిణామం అమెరికాను ప్రపంచంలోనే అతిపెద్ద శాంతి విధ్వంసక దేశంగా నిలిపింది’ అని వాంగ్‌ యీ మండిపడ్డారు. అటు, ఈ విషయంలో చైనాకు రష్యా సంపూర్ణ సంఘీభావం ప్రకటించింది.

Related Articles

Back to top button