News

online tv order, 50 ఇంచుల టీవీ ఆర్డర్ చేస్తే 44 ఇంచులే.. ఇలా కూడా మోసం జరుగుతోందా? అసలు విషయం తెలిస్తే..! – man orders 50 inch tv online, but on measuring finds only 44 inches, know how to measure tv


ఆన్‌లైన్‌లో వస్తువులను ఆర్డర్ చేస్తున్నారా? ఆర్డర్ చేసిన ప్రోడక్ట్ మీరు ఎంచుకున్న సైజుల ప్రకారమే ఉందేమో డెలివరీ తర్వాత ఎప్పుడైనా చెక్ చేసుకున్నారా? మరీ ముఖ్యంగా టీవీ సైజు ఎప్పుడైనా కొలిచారా. ఇటీవల ఓ వ్యక్తి ఆన్‌లైన్‌లో 50 ఇంచుల టీవీని ఆర్డర్ చేశారు. తన ఇంటికి వచ్చిన టీవీ సైజు మాత్రం 44 ఇంచులు మాత్రమే ఉందని ఆయన అంటున్నారు. ఆ ఫొటోలను తీసి ఇన్‌స్టాగ్రామ్‌లో పెట్టడంతో ఈ ఇష్యూ వైరల్ అవుతోంది. ఆసక్తికర చర్చకు తావిచ్చింది. ఇంతకీ టీవీ సైజు ఎలా కొలవాలో తెలుసా..? ఇక్కడ ముఖ్యమైన అంశం ఇదే.

50 అంగుళాల (Inches) టీవీని ఆర్డర్ చేసానని, అయితే 44 ఇంచుల టీవీని అందుకున్నానని ఇన్‌స్టాగ్రామ్ వేదికగా ఆ కస్టమర్ ఫిర్యాదు చేశారు. అమెజాన్ రివ్యూ స్క్రీన్ షాట్‌ను కూడా తన పోస్టుకు జత చేశారు. అసలు ఆ టీవీని ప్యాక్ చేసిన బాక్స్ సైజే 49 ఇంచులు ఉందని ఆయన వాదన.

‘సామ్‌సంగ్ 8 సిరీస్ TU8000 50ని కొనుగోలు చేసాను. అన్‌ప్యాక్ చేసిన తర్వాత చూస్తే అది 44 ఇంచులు మాత్రమే ఉన్నట్లు తేలింది. అదెలా?! టీవీ బాక్స్ 49 ఇంచులు మాత్రమే ఉంది. ఫోమ్ ప్రొటెక్షన్‌తో TV 50 ఇంచులు ఉండొచ్చు’ అంటూ ఆ కస్టమర్ తన పోస్టులో సెటైరికల్‌గా రాసుకొచ్చాడు. ‘ఈ ఫోటోలు, వీడియో చూడండి. ఇదొక స్కామ్. నాకు నా డబ్బు తిరిగి ఇవ్వండి. లేదంటే 50 ఇంచుల సామ్‌సంగ్ TV అయినా పంపించండి’ అని డిమాండ్ చేశాడు.

అతడు టీవీ స్క్రీన్‌ను కొలిచే ఫోటోను గమనించారా..? స్క్రీన్‌ను అడ్డంగా కొలుస్తున్నట్లు ఫొటోలో స్పష్టమవుతోంది కదా! వాస్తవానికి టీవీ స్క్రీన్‌ను వికర్ణంగా (Diagonally) కొలుస్తారు. ఆ విషయం ఆయనకు తెలియదని ఫొటోను చూస్తేనే అర్థమవుతోంది.

దిమ్మ తిరిగింది!
ఈ పోస్టు కింద కొంత మంది నెటిజన్లు పెట్టిన కామెంట్ కూడా ఇదే. ‘టీవీని ఎలా కొలవాలో ముందు మీరు తెలుసుకోండి’ అని ఆయనకు సూచించారు. దానికి ఆ కస్టమర్ బదులిస్తూ.. ‘దిమ్మ తిరిగింది? టీవీ స్క్రీన్‌ను ఎలా కొలవాలో తెలుసుకోవడానికి నాకు ఇన్ని సంవత్సరాలు పట్టింది’ అని రాశారు.

ఇక్కడ మరింత ఆశ్చర్యకరమైన విషయం ఏమిటంటే.. 642 మందికి పైగా నెటిజన్లు అతడిని సమర్థిస్తూ కామెంట్లు పెట్టారు. ‘మేం కూడా ఆన్‌లైన్‌లో ఆర్డర్ చేసిన టీవీ సైజు కొలవట్లేదు. ఎంత మోసం జరుగుతోంది. మీ పోస్టు మాకు ఉపయోగపడింది’ అని కామెంట్ పెట్టారు. అంటే.. టీవీ సైజు ఎలా కొలవాలో తెలియని వారు చాలా మందే ఉన్నారన్నమాట.

‘టీవీ స్క్రీన్‌లు ఎల్లప్పుడూ వాటి కర్ణాల ఆధారంగా కొలుస్తారు. ఏదేమైనా మీరు ఒక సరైన పాయింట్‌ని చెప్పారు. ఈ విషయం గురించి చాలా మందికి తెలియదు. ఇప్పుడు మీరు తెలిసేలా చేశారు’ అని మరొక నెటిజన్ కామెంట్ చేశారు.

మరొక వింత అనుభవం
మరొక వ్యక్తి తనకు ఎదురైన వింత అనుభవం గురించి తెలిపారు. ‘గతంలో నేను పనిచేసిన న్యాయ సంస్థకు ఓ మహిళ నుంచి ఫోన్ కాల్ వచ్చింది. తాను ఆర్డర్ చేసిన దానికంటే చిన్న సైజు టీవీని డెలివరీ చేశారని ఆమె ఫిర్యాదు చేసింది. ఇంతకీ టీవీని ఎలా కొలిచారని నేను అడిగాను. కనీసం దాన్ని బాక్స్‌లో నుంచి కూడా తీయలేదని ఆమె చెప్పింది. వారు దాని పైభాగాన్ని కొలిచారు. టీవీలను కర్ణం పొడవు ఆధారంగా కొలుస్తారని చెప్పగానే ఆమె ఆశ్చర్యపోయింది. వెంటనే ఫోన్ పెట్టేసింది’ అని అతడు చెప్పుకొచ్చాడు.

కలెక్టర్‌ను ఆపి కుక్కలా అరుపులు.. ఇతడి సమస్య తెలిస్తే నవ్వాపుకోలేరు!

Advertisement

Related Articles

Back to top button