News

No India Pakistan Matches,పాకిస్థాన్‌తో ద్వైపాక్షిక సిరీస్ అప్పుడే ఉంటుంది: కేంద్ర మంత్రి అనురాగ్ ఠాకూర్ – no india vs pakistan bilateral cricket matches untill they end terrorism says union sports minister anurag thakur


భారత్-పాకిస్థాన్ క్రికెట్ జట్ల మధ్య గత కొన్నేళ్లుగా ద్వైపాక్షిక సిరీస్‌లో జరగడం లేదనే విషయం తెలిసిందే. దీంతో కేవలం ఆసియా కప్, ఐసీసీ టోర్నీల్లో మాత్రమే ఇరు జట్లు తలపడుతున్నాయి. కొందరు ఫ్యాన్స్ మాత్రం ఇరు జట్ల మధ్య ద్వైపాక్షిక సిరీస్‌లు జరగాలని.. టెస్టు మ్యాచు ఆడితే చూడాలని ఉందంటూ తమ మనసులోనే మాటను బయటపెడుతుంటారు. అయితే వారి ఆశలు ఇప్పట్లో నెరవేరేలా కనిపించడం లేదు. భారత ప్రభుత్వ స్పందనే దీన్ని రుజువు చేస్తోంది.

రాజస్థాన్ పర్యటనలో భాగంగా కేంద్ర యువజన వ్యవహారాలు, క్రీడల శాఖ మంత్రి అనురాగ్ ఠాకూర్ ఈ మేరకు భారత్-పాక్ క్రికెట్ మ్యాచుల విషయంపై స్పందించారు. సీమాంతర ఉగ్రవాదాన్ని పాకిస్థాన్ అరికట్టే వరకు భారత్-పాకిస్థాన్ జట్ల మధ్య ద్వైపాక్షిక మ్యాచులు ఉండవని స్పష్టం చేశారు. దీనిపై బీసీసీఐ ఇప్పటికే నిర్ణయం తీసుకున్నట్లు వివరించారు. పాకిస్థాన్ పద్దతి మారే వరకు క్రికెట్‌తో పాటు ఎటువంటి క్రీడా కార్యక్రమాలు ఉండబోవని వెల్లడించారు.

ఈ విషయంపై బీసీసీఐ ఉపాధ్యక్షుడు రాజీవ్ శుక్లా సైతం ఇదే అభిప్రాయాన్ని వ్యక్తం చేశారు. పాకిస్థాన్‌ క్రికెట్ జట్టుతో ద్వైపాక్షిక సిరీస్‌లు ఉండవని స్పష్టం చేశారు. ఈ విషయంపై భారత్‌ దగ్గర స్పష్టమైన విధానం ఉందని వెల్లడించారు. ఉగ్రమూకలపై కఠినంగా వ్యవహరించాలని రాజీవ్ శుక్లా డిమాండ్ చేశారు.

భారత సరిహద్దుల్లో పాకిస్థాన్ ఉగ్రవాదులు తరచూ దాడులు చేస్తున్నారు. తాజాగా జమ్మూ కశ్మీర్‌లోని అనంతనాగ్‌లో ఉగ్రవాదులు, భద్రతా బలగాలకు మధ్య కఎదురు కాల్పులు జరిగాయి. ఇందులో కర్నల్ మన్‌ప్రీత్ సింగ్, మేజర్ ఆశిష్ ధోనక్, డీఎస్పీ హుమాయూన్ భట్‌తో పాటు మరో జవాన్ వీరమరణం పొందారు. ఈ ప్రాంతంలోనే ఇద్దరు ఉగ్రవాదులు నక్కి ఉన్నారనే సమాచారంతో భారత దళాలు ఆపరేషన్ చేపట్టాయి. ఉగ్రవాదులను మట్టుబెట్టేందుకు ప్రయత్నిస్తున్నాయి.

ఇక ఆసియా కప్ 2023లో భాగంగా భారత్-పాక్ జట్లు రెండు సార్లు తలపడ్డాయి. లీగ్ దశలో మ్యాచు వర్షం కారణంగా రద్దు అయింది. సూపర్-4లో 228 పరుగుల తేడాతో పాక్ చిత్తుగా ఓడింది. శ్రీలంకతో మ్యాచులోనూ ఓడిన పాక్.. టోర్నీ నుంచి నిష్క్రమించింది. భారత్-శ్రీలంక జట్ల మధ్య ఆదివారం ఫైనల్ మ్యాచు జరగనుంది.

Related Articles

Back to top button