News

NANDAKUMAR, TRS MLAల కొనుగోళ్ల కేసులో మరో ఇద్దరికి సిట్ నోటీసులు – sit notices to two more in trs mlas poaching case


TRS Mlas Poaching Case: తెలంగాణలో సంచలనం రేపుతోన్న టీఆర్ఎస్ ఎమ్మెల్యేల కొనుగోళ్ల కేసులో మరో కీలక పరిణామం చోటుచేసుకుంది. ఈ కేసులో మరో ఇద్దరికి ప్రత్యేక దర్యాప్తు బృందం(సిట్) అధికారులు నోటీసులు జారీ చేశారు. ఈ కేసులో కీలక నిందితుడిగా ఉన్న హైదరాబాద్‌కి చెందిన నందకుమార్ భార్య చిత్రలేఖకు కూడా బుధవారం సిట్ పోలీసులు నోటీసులు ఇచ్చారు. ఆమెతో పాటు అంబర్‌పేటకు చెందిన న్యాయవాది ప్రతాప్ గౌడ్‌కు కూడా నోటీసులు ఇచ్చారు.

బుధవారమే విచారణకు రావాలని చిత్రలేఖ, ప్రతాప్ గౌడ్‌లను సిట్ పోలీసులు నోటీసుల్లో ఆదేశించారు. ఈ కేసు దర్యాప్తులో దూకుడు మీదున్న సిట్.. వరుస పెట్టి నిందితులతో సంప్రదింపులు జరిపిన వారికి నోటీసుల జారీ చేస్తోంది. ఇప్పటికే బీజేపీ జాతీయ ప్రధాన కార్యదర్శి బీఎల్ సంతోష్, కేరళ డాక్టర్ జగ్గుస్వామి, భారతీయ ధర్మజనసేన చీఫ్ తుషార్, బండి సంజయ్ బంధువు, కరీంనగర్‌కు చెందిన న్యాయవాది శ్రీనివాస్‌లకు నోటీసులు జారీ చేసింది. అయితే శ్రీనివాస్ మినహా మిగతా ముగ్గురు విచారణకు డుమ్మా కొట్టారు. దీంతో విచారణకు హాజరవ్వని బీఎల్ సంతోష్, తుషార్, జగ్గుస్వామిపై లుకౌట్ నోటీసులు జారీ చేసింది.

నోటీసులకు స్పందించకపోవడంతో ఈ కేసులో తదుపరి కార్యారణకు సిట్ సిద్దమవుతోంది. విచారణకు హాజరుకాని వారిని అరెస్ట్ చేసేందుకు న్యాయ నిపుణులతో సిట్ అధికారులు చర్చలు జరుపుతోన్నట్లు వార్తలొస్తున్నాయి. విచారణకు హాజరుకాని విషయాన్ని కోర్టు దృష్టికి తీసుకెళ్లి అరెస్ట్ వారెంట్ జారీ చేయించుకుని అరెస్ట్ చేసే అవకాశముందని వార్తలొస్తున్నాయి. దీని కోసం ఎలాంటి సమస్యలు రాకుండా న్యాయ నిపుణులతో సిట్ పోలీసులు చర్చలు జరుపుతోన్నారు. త్వరలోనే ఆ ముగ్గురిని అరెస్ట్ చేసే అవకాశముందని ప్రచారం జరుగుతోంది. అలాగే కేంద్రహోంశాఖ మంత్రి అమిత్ షాకు కూడా నోటీసులు ఇచ్చే అవకాశముందని, ఈ విషయంపై కూడా న్యాయ సలహాలు తీసుకుంటున్నట్లు ప్రచారం జరుగుతోంది.

అయితే ఇతర రాష్ట్రాల్లో ఉంటున్న వారికి నోటీసులు అందించాలన్నా.. లేదా అరెస్ట్ చేయాలన్నా అక్కడి పోలీసుల సహకారం అవసరం. దీంతో ఇతర రాష్ట్రాల్లో సిట్ పోలీసులకు సహకారం అందటం లేదు. దీంతో హైకోర్టును సంప్రదించి అరెస్ట్ చేసే విషయాన్ని పరిశీలిస్తోన్నట్లు చెబుతున్నారు. బీఎల్ సంతోష్, జగ్గుస్వామి, తుషార్‌లకు జాతీయ స్థాయిలో బీజేపీ అండ ఉంది. ఇలాంటి సమయంలో వారిని అరెస్ట్ చేసే ప్రయత్నం చేస్తుందా? అనేది ప్రశ్నార్థకంగా మారింది.

Read More Telangana News And Telugu News

Related Articles

Back to top button