News

munugode politics, Revanth Reddy: మునుగోడు గడ్డమీద రాజగోపాల్‌రెడ్డిని పాతిపెడదాం.. పక్కన నిలబడండి – tpcc chief revanth reddy comments on komatireddy raj gopal reddy in chandur meeting in munugode


బీజేపీలోకి ఎందుకు వెళ్లావో సూటిగా సమాధానం చెప్పాలని కోమటిరెడ్డి రాజగోపాల్ రెడ్డిని టీపీసీసీ చీఫ్ రేవంత్ రెడ్డి (Revanth Reddy) ప్రశ్నించారు. ‘నెల రోజులు జైల్లో ఉన్న నాతో కలిసి పని చేయలేనని చెప్తున్నావు. మరి 90 రోజులు జైల్లో ఉన్న అమిత్‌ షాతో ఎలా కలిసి పని చేస్తావు?’ అని ఆయన ప్రశ్నించారు. పార్టీకి ద్రోహం చేసిన వారికి గట్టి గుణపాఠం చెప్పాలని కార్యకర్తలకు పిలుపునిచ్చారు. ఒక్క ఎమ్మెల్యే పోయినా.. కాంగ్రెస్‌ పార్టీకి పోయేదేమీ లేదని రేవంత్ రెడ్డి స్పష్టం చేశారు. మునుగోడు ప్రజల కోసమే రాజీనామా చేశానని చెబుతున్న రాజగోపాల్‌‌రెడ్డి.. ప్రధాని నరేంద్ర మోదీ, హోం మంత్రి అమిత్‌ షా నుంచి మునుగోడుకు నిధులు తెస్తాడా? అని ఆయన ప్రశ్నించారు. నల్గొండ జిల్లా మునుగోడు నియోజకవర్గంలోని చండూరులో శుక్రవారం (ఆగస్టు 5) సాయంత్రం నిర్వహించిన సభలో రేవంత్‌ రెడ్డి ప్రసంగించారు. కోమటిరెడ్డి రాజగోపాల్ రెడ్డి, బీజేపీపై నిప్పులు చెరిగారు.

‘ఇప్పుడు మోసం చేసిన వ్యక్తి.. రేపు మరోసారి మోసం చేయడా? రాజగోపాల్‌ రెడ్డి లాంటి విశ్వాసఘాతుకుడిని నేనెప్పుడూ చూడలేదు. చరిత్ర హీనుడు, నీచుడు, దుర్మార్గుడు. ఈ మునుగోడు గడ్డ మీద రాజగోపాల్‌ రెడ్డిని పాతిపెడదాం. మీరంతా కాంగ్రెస్‌ పక్కన నిలబడండి’ అని రేవంత్‌ రెడ్డి పిలుపునిచ్చారు.

అమ్ముడుబోయే సంస్కృతి తెలంగాణకు లేదన్నారు. ‘సాయం చేసే సంస్కృతి మనది. ఆ సంస్కృతిని కాపాడాల్సిన బాధ్యత మునుగోడు ప్రజలపై ఉంది. ఓట్లేసి గెలిపించిన ప్రజలకు అన్యాయం చేసే అధికారం నీకు ఎవరిచ్చారు?’ అని రేవంత్ రెడ్డి ప్రశ్నించారు. మునుగోడు గడ్డ మీద కాంగ్రెస్‌ పార్టీ జెండా ఎగురుతుందని ఆయన ధీమా వ్యక్తం చేశారు.

‘గతంలో పాల్వాయి స్రవంతికి ఇవ్వాల్సిన టికెట్‌ను రాజగోపాల్‌రెడ్డికి ఇచ్చారు. అప్పుడు వారి త్యాగాలు నీకు గుర్తుకు రాలేదా? అని ప్రశ్నించారు. 2014 నుంచి ఇప్పటివరకు టీఆర్‌ఎస్ పార్టీ తనపై 120 కేసులు పెట్టిందని.. అయినా భయపడలేదని రేవంత్ రెడ్డి చెప్పారు. కేసీఆర్‌ను గద్దె దించే వరకు పోరాటం చేస్తానని అన్నారు.

మన కన్నతల్లిని అవమానిస్తుంటే తట్టుకోగలమా?
‘తెలంగాణ రాష్ట్రం ఇచ్చిన సోనియా గాంధీనే మనకు తెలంగాణ తల్లి. రాష్ట్రం ఏర్పాటైన తర్వాత అసలు మన ప్రభుత్వం అధికారంలోకి రాలేదు. అయినా బాధపడలేదు. ప్రజల శ్రేయస్సే తప్ప అధికారం ముఖ్యం కాదని ఆమె భావించారు. అలాంటి సోనియా గాంధీని మోదీ, అమిత్ షా.. ఈడీ కేసులతో అవమానిస్తుంటే.. పోరాటం చేయాల్సింది పోయి అమిత్ షాతో కాంట్రాక్ట్ ఒప్పందాలు చేసుకున్నాడు రాజగోపాల్ రెడ్డి’ అని రేవంత్ రెడ్డి ధ్వజమెత్తారు.

కాంగ్రెస్‌ను ఎదుర్కొనే దమ్ము లేకనే మూసేసిన కేసును (National Herald Case) తెరిచారని రేవంత్ రెడ్డి అన్నారు. సోనియా గాంధీ, రాహుల్‌ గాంధీకి అన్యాయంగా నోటీసులు ఇచ్చారని.. కరోనాతో బాధపడుతుంటే, ఆమెను ఇబ్బందులకు గురి చేశారని చెప్పారు. ‘కాంగ్రెస్ కార్యకర్తలుగా పార్టీ అధినేత్రికి అండగా ఉండాల్సిన బాధ్యత మనందరిది. మన కన్నతల్లిని అవమానిస్తుంటే మనం తట్టుకోగలమా? మరి అలాంటి సమయంలో రాజగోపాల్‌ రెడ్డి.. అమిత్‌ షా దగ్గరికి వెళ్లాడు’ అని రేవంత్ రెడ్డి అన్నారు.

‘మునుగోడులో కాంగ్రెస్‌ కార్యకర్తలకు ఏ కష్టమొచ్చినా.. రాంరెడ్డి దామోదరెడ్డి (కాంగ్రెస్ సీనియర్ నేత, మాజీ మంత్రి) గంటలో వస్తారు. నేను రెండు గంటల్లో వస్తా’ అని రేవంత్ రెడ్డి అన్నారు. దామోదర్‌ రెడ్డితో చేతులు కలిపి సభావేదిక పైనుంచి కార్యకర్తలకు అభివాదం చేశారు.

Komatireddy: రేవంత్ రెడ్డి క్షమాపణ చెప్పాలి.. బ్రాందీ షాపు వ్యాఖ్యలపై కోమటిరెడ్డి వెంకట్‌రెడ్డి ఆగ్రహం

Advertisement

Related Articles

Back to top button