News

MUNUGODE EXIT POLLS, Munugode Survey: మునుగోడు ఉపఎన్నికపై ‘ఆరా’ మస్తాన్ ఎగ్జిట్ పోల్ సర్వే.. ఎవరూ ఊహించని ఫలితాలు.. ఆ పార్టీకి ఏకంగా.. – aaraa mastan survey on munugode by elections


Munugode Survey: మునుగోడు ఉపఎన్నిక కౌంటింగ్ రేపు జరగనుండగా.. గెలుపు ఎవరిదనేది ఉత్కంఠకరంగా మారింది. మెజార్టీ సర్వేలు టీఆర్ఎస్‌కే పట్టం కట్టగా… పొలిటికల్ ల్యాబొరేటరీతో పాటు రెండు, మూడు సర్వేలు బీజేపీకి ఎడ్జ్ ఉన్నట్లు వెల్లడించాయి. టీఆర్ఎస్, బీజేపీ మధ్య టఫ్ ఫైట్ నడించిందని, ఏ పార్టీ గెలిచినా స్వల్ప మెజార్టీతో నెగ్గుతుందని ఎగ్జిట్ పోల్స్‌ అన్నీ అంచనా వేశాయి. సాయంత్రం 3 గంటల వరకు మాత్రమే శాంపిల్స్ తీసుకుని కొన్ని సర్వే సంస్థలు ఎగ్జిట్ పోల్స్ ప్రకటించాయనే ఆరోపణలు కూడా వస్తోన్నాయి.

సాయంత్రం 10.30 వరకు పోలింగ్ జరగిందని, కొన్ని సర్వే సంస్థలు సాయంత్రం వరకు ఉన్న ట్రెండ్‌ని పరిశీలించి మాత్రమే ఎగ్జిట్ పోల్ సర్వేలను ప్రకటించాయనే వాదనలు వినిపిస్తోన్నాయి. ఈ క్రమంలో తెలుగు రాష్ట్రాల్లో మంచి గుర్తింపు తెచ్చుకున్న ‘ఆరా’ సంస్థ తాజాగా తన పోస్ట్ పోల్ సర్వే రిపోర్ట్‌ను బయటపెట్టింది. ఇందులో టీఆర్ఎస్‌కు 50.82 శాతం, బీజేపీకి 33.86 శాతం, కాంగ్రెస్‌కు 10.94 శాతం, ఇతరులకు 4.38 శాతం ఓట్లు వస్తాయని అంచనా వేసింది. టీఆర్ఎస్‌కు ఎవరూ ఊహించని విధంగా 50 శాతంకు పైగా ఓట్లు వస్తాయని చెప్పడం ఆసక్తిని రేకెత్తిస్తోంది. అలాగే వర్గాల వారీగా ఎవరు ఎటువైపు మొగ్గు చూపారనే అంశాన్ని కూడా ఆరా సంస్ధ అంచనా వేసింది. పురుషులు, మహిళల విషయానికొస్తే.. పురుషుల్లో 49.13 శాతం మంది , మహిళల్లో 58.13 శాతం మంది టీఆర్ఎస్ వైపు ఉన్నట్లు అంచనా వేసింది.

34.33 శాతం మంది పురుషులు, 29.12 శాతం మంది మహిళలు బీజేపీ వైపు ఉన్నట్లు తన సర్వే రిపోర్టులో పేర్కొంది. కాంగ్రెస్‌కు 11.7 శాతం పురుషులు, 8.56 శాతం మహిళలు ఓటేసినట్లు స్పష్టం చేసింది. వయస్సుల వారీగా చూస్తే.. 18 నుంచి 25 సంవత్సరాల మధ్య వయస్సు కలిగిన వారిలో టీఆర్ఎస్‌కు 40.79 శాతం మంది , 40.40 శాతం మంది బీజేపీకి, 12.67 శాతం మంది కాంగ్రెస్‌కు ఓటు వేసినట్లు అంచనా వేసింది. 26 నుంచి 40 ఏళ్ల మధ్య వయస్సు కలిగిన వారిలో టీఆర్ఎస్‌కు 49.17 శాతం మంది, బీజేపీకి 33.45 శాతం మంది, కాంగ్రెస్‌కు 11.91 శాతం మంది ఓటేసినట్లు తెలిపింది.

ఇక 41 నుంచి 60 ఏళ్ల మధ్య వారిలో 54.37 శాతం మంది టీఆర్ఎస్‌కు, 31.97 శాతం మంది బీజేపీకి, 8.94 శాతం మంది కాంగ్రెస్‌ వైపు ఉన్నట్లు తన సర్వే రిపోర్టులో ఆరా సంస్థ స్పష్టం చేసింది. 61 ఏళ్లు పైబడిన వారిలో టీఆర్ఎస్‌కు 64.46 శాతం మంది, బీజేపీకి 26.31 శాతం మంది, కాంగ్రెస్‌కు 4.92 శాతం మంది ఓటేసినట్లు పేర్కొంది. ఆరా సర్వే సంస్థకు వ్యవస్థాపకుడు, ఛైర్మన్‌గా షేక్ మస్తాన్ ఉండగా.. ఆయనను అందరూ ఆరా మస్తాన్‌గా పిలుస్తూ ఉంటారనే విషయం తెలిసిందే.

Related Articles

Back to top button