News

modi chandrababu meeting, Delhi: చంద్రబాబు, మోదీ ప్రత్యేక భేటీ.. సుదీర్ఘ కాలం తర్వాత, హాట్ టాపిక్ – tdp chief chandrababu naidu meets pm narendra modi in delhi grabs political attension in andhra pradesh


ఢిల్లీలో కీలక పరిణామం చోటు చేసుకుంది. ప్రధాన మంత్రి నరేంద్ర మోదీ (Narendra Modi), టీడీపీ జాతీయ అధ్యక్షుడు చంద్రబాబు నాయుడు (Chandrababu Naidu) ప్రత్యేకంగా భేటీ అయ్యారు. తాజా రాజకీయ పరిణామాలు, వివిధ అంశాలపై మాట్లాడినట్లు తెలుస్తోంది. ప్రధాని మోదీ అధ్యక్షతన దేశ రాజధాని ఢిల్లీలో శనివారం (ఆగస్టు 6) సాయంత్రం ఆజాదీ కా అమృత్‌ మహోత్సవ్‌ సమావేశం జరిగింది. ఢిల్లీ నుంచి అందిన ఆహ్వానం మేరకు టీడీపీ చీఫ్ చంద్రబాబు నాయుడు ఈ సమావేశాల్లో పాల్గొన్నారు. పలువురు ప్రముఖులు, కేంద్ర మంత్రులు సహా వివిధ పార్టీల నేతలు ఈ సమావేశంలో పాల్గొన్నారు. ఈ సమావేశం ముగిసిన తర్వాత.. ప్రధాని మోదీ, చంద్రబాబు నాయుడు ప్రత్యేకంగా భేటీ అయ్యారు. సుమారు 10 నిమిషాల పాటు వీరిద్దరూ మాట్లాడుకోవడం చర్చనీయాంశంగా మారింది.

2019 సార్వత్రిక ఎన్నికలకు ముందు నుంచి బీజేపీ, టీడీపీ మధ్య దూరం పెరిగింది. ఏపీకి ప్రత్యేక హోదా అంశాన్ని ప్రస్తావిస్తూ నాటి ఎన్నికల ప్రచారంలో బీజేపీని టీడీపీ తీవ్ర స్థాయిలో దుయ్యబట్టింది. ఆ ఎన్నికల తర్వాత నుంచి నేటి వరకు చంద్రబాబు నాయుడు, నరేంద్ర మోదీ ప్రత్యేకంగా సమావేశమైన సందర్భాలు లేవు. తాజాగా ఈ ఇద్దరూ నేతలు ప్రత్యేకంగా భేటీ కావడం రాజకీయ వర్గాలతో పాటు తెలుగు రాష్ట్రాల్లో హాట్ టాపిక్‌గా మారింది. వచ్చే ఎన్నికల్లో ఏపీలో టీడీపీ, బీజేపీ, జనసేన మధ్య పొత్తు ఉండే అవకాశం ఉందని ప్రచారం జరుగుతున్న వేళ మోదీ, చంద్రబాబు ప్రత్యేకంగా భేటీ కావడం ప్రాధాన్యం సంతరించుకుంది. అంతేకాదు.. ఈ భేటీ అనంతరం పలువురు జాతీయ మీడియా ప్రతినిధులు చంద్రబాబు నాయుడిని కలవగా.. వారితో మాట్లాడుతూ కేంద్ర ప్రభుత్వంపై చంద్రబాబు నాయుడు పరోక్షంగా ప్రశంసలు కురిపించడం గమనార్హం.

కొవిడ్ సంక్షోభం, రష్యా – ఉక్రెయిన్ యుద్ధం సహా అనేక విపత్తులు ఎదురైనా పలు దేశాలతో పోలిస్తే భారత్ తట్టుకుని నిలబడగలిగిందని జాతీయ మీడియా ప్రతినిధులతో చంద్రబాబు నాయుడు అన్నారు. యూరప్ సహా అనేక దేశాల ఆర్థిక వ్యవస్థలతో పోలిస్తే భారత ఆర్థిక వ్యవస్థ గట్టిగా నిలబడిందని పేర్కొన్నారు. అనేక దేశాలతో పోలిస్తే, భారత్‌లో ప్రజల తలసరి ఆదాయం ఎక్కువగా ఉందన్నారు. ఏపీలో వైఎస్ జగన్ పాలనపై విమర్శలు చేశారు.

చంద్రబాబు నాయుడును కలిసిన వారిలో ప్రెస్ క్లబ్ ఆఫ్ ఇండియా సభ్యులతో పాటు జాతీయ మీడియాకు చెందిన పలువురు సీనియర్ జర్నలిస్టులు ఉన్నారు. సినీ స్టార్, ఎంపీ రజినీకాంత్, కేంద్ర మంత్రి గడ్కరీ, సీతారాం ఏచూరి సహా పలువురు నేతలు, ప్రముఖులతో చంద్రబాబు నాయుడు ఇష్టాగోష్టిగా మాట్లాడుతూ కనిపించారు.

Related Articles

Back to top button