News

measles, మళ్లీ విజృంభిస్తున్న మీజిల్స్.. 13 మంది మృతి, ఒకరి నుంచి ఒకరికి వ్యాపించే ఈ వైరస్ లక్షణాలివే – measles outbreak in mumbai, 13 children died so far in maharashtra, all you need to know


తట్టు వ్యాధి (Measles) మళ్లీ విజృంభిస్తోంది. కొన్ని దశాబ్దాలుగా నియంత్రణలో ఉన్న ఈ వైరస్ మరోసారి పంజా విసురుతోంది. ముంబై నగరంలో నెల రోజుల వ్యవధిలోనే ఈ వ్యాధి 13 మంది చిన్నారులను బలి తీసుకుంది. ఆ నగరంలో ఏకంగా 233 మీజిల్స్ పాజిటివ్ కేసులు నమోదయ్యాయి. వీటిలో గత రెండు నెలల్లోనే 200 కేసులు నమోదయ్యాయి. గడిచిన కొన్నేళ్లుగా ఈ స్థాయిలో కేసులు నమోదవడం ఇదే తొలిసారి. మహారాష్ట్రతో పాటు బీహార్, గుజరాత్, హర్యానా, జార్ఖండ్, కేరళ రాష్ట్రాల్లోనూ మీజిల్స్ కేసులు నమోదవుతున్నాయి. తెలుగు రాష్ట్రాల్లోనూ మీజిల్స్ కేసులు నమోదయ్యాయి. కేసుల్లో పెరుగుదలకు కొవిడ్ సంక్షోభమే కారణమని వైద్య నిపుణులు చెబుతున్నారు.

ముంబైతో పాటు మాలేగావ్, భీవాండీ, థాణే, నాసిక్, అకోలా, కళ్యాణ్ తదితర ప్రాంతాల్లో మీజిల్స్ కేసులు నమోదవుతున్నాయి. మీజిల్స్ బారిన పడి బుధవారం (నవంబర్ 23) 8 నెలల చిన్నారి మృత్యువాతపడింది. దీంతో ముంబైలో ఈ వ్యాధి కారణంగా మరణించిన వారి సంఖ్య 13కు చేరింది.

మృతి చెందిన చిన్నారుల్లో 0 – 11 నెలల మధ్య వయసు వారు ముగ్గురు, 1 – 2 సంవత్సరాల మధ్య వయసు గల వారు 8 మంది, 3 – 5 ఏళ్ల మధ్య వయసు గల వారు ఇద్దరు ఉన్నారు.

ఇటీవలి కాలంలో వ్యాక్సినేషన్ సరిగ్గా జరగకపోవడమే మీజిల్స్ వ్యాధి విజృంభించడానికి కారణం అని వైద్యాధికారులు తెలిపారు. కోవిడ్ సంక్షోభం కారణంగా 2020, 2021లో చిన్నారులకు మీజిల్స్ వ్యాక్సిన్ వేయించేందుకు చాలా మంది తల్లిదండ్రులు ముందుకు రాలేదని, దీంతో ఆ వ్యాధి కేసులు పెరుగుతున్నాయని వెల్లడించారు. ఇలాంటి చిన్నారులు 20 వేల మంది ఉన్నట్లు గుర్తించామని ముంబై అధికారులు తెలిపారు. వారికి వ్యాక్సిన్ వేయించేందుకు యుద్ధ ప్రాతిపదికన చర్యలు చేపట్టినట్లు వివరించారు. మీజిల్స్ వ్యాధి నివారణకు MMR (Measles, Mumps, Rubella) Vaccination ఇస్తారు.

తట్టు వ్యాధి (Measles Symtoms) లక్షణాలు:
✦ పారామిక్సోవైరస్ కారణంగా తట్టు వ్యాధి సోకుతుంది.
✦ ఇది ఒకరి నుంచి మరొకరికి సోకుతుంది.
✦ మాట్లాడేటప్పుడు, దగ్గేటప్పుడు వెలువడే తుంపర్ల ద్వారా ఈ వైరస్ వ్యాపిస్తుంది.
✦ వ్యాధి సంక్రమించడానికి 10 నుంచి 14 రోజుల సమయం పడుతుంది.
✦ జలుబు, జ్వరం, తలనొప్పి, తుమ్ములు, చర్మంపై చిన్న చిన్న ఎర్రని గుల్లలు ఏర్పడటం ఈ వ్యాధి లక్షణాలు.
✦ వ్యాధి సోకిన 4 రోజుల తర్వాత చర్మంపై ఎర్రని గుల్లలు ఏర్పడతాయి.

Related Articles

Back to top button