News

Liger Movie Review, Rating {2/5} – లైగర్ మూవీ రివ్యూ, రేటింగ్ {2/5}


Liger Movie Review : చిన్న చిన్న క్యారెక్టర్స్ చేస్తున్న స‌మ‌యంలో విజ‌య్ దేవ‌ర‌కొండ‌కు ‘ఎవ‌డే సుబ్ర‌మ‌ణ్యం’ సినిమాతో మంచి బ్రేక్ వ‌చ్చింది. ‘పెళ్లి చూపులు’ చిత్రంతో హీరోగా సక్సెస్ కొట్టి ఇండస్ట్రీ దృష్టిలో పడ్డాడీ యంగ్ హీరో. ఆ తర్వాత వచ్చిన ‘అర్జున్ రెడ్డి’ బ్లాక్ బస్టర్ అయ్యింది. దీంతో స్టార్ హీరోగా మారిపోయాడు. యూత్‌కి కనెక్ట్ అయిపోయాడు. అక్క‌డ నుంచి జ‌యాప‌జ‌యాల‌కు సంబంధం లేకుండా క్రేజీ ప్రాజెక్ట్స్ చేసుకుంటూ త‌న క్రేజ్‌ను పెంచుకున్నాడు విజ‌య్ దేవ‌ర‌కొండ‌.

ఈ క్ర‌మంలో విజ‌య్ దేవ‌ర‌కొండ (Vijay Deverakonda) వంటి హీరోతో పూరి జ‌గ‌న్నాథ్ (Puri Jagannadh) వంటి డైరెక్ట‌ర్ చేతులు క‌లిపాడు. పూరి గురించి ప్ర‌త్యేకంగా చెప్ప‌న‌క్క‌ర్లేదు. ఇప్పుడున్న స్టార్ హీరోలంద‌రూ ఆయ‌న‌తో వ‌ర్క్ చేసిన వారే. అంద‌రికీ డిఫ‌రెంట్ బాడీ లాంగ్వేజ్, మాస్ క్రేజ్ తీసుకొచ్చిన డైరెక్టర్. వీరిద్దరి కాంబినేషన్‌లో పాన్ ఇండియా మూవీగా లైగర్ సినిమా పట్టాలెక్కింది. వీరికి తోడుగా కరణ్ జోహార్ తోడు కావటంతో లైగర్ ప్రాజెక్ట్‌పై క్రేజ్ పీక్స్‌కి చేరింది.

సినిమాపై ఉన్న హైప్స్‌ని పెంచటంలో పూరి జగన్నాథ్ ఏమాత్రం వెనక్కి తగ్గలేదు. బాలీవుడ్ బ్యూటీ అనన్య పాండే (Ananya Panday)ను హీరోయిన్‌గా తీసుకోవటమే కాదు.. ఏకంగా బాక్సింగ్ లెజెండ్ మైక్ టైసన్‌ (Mike Tyson)ను సినిమాలో నటింప చేశాడు. బాక్సింగ్ బ్యాక్ డ్రాప్ కథ.. హీరోకి నత్తి ఉండటం అనే అంశాలతో లైగర్ సినిమా టీజర్, ట్రైలర్ అన్ని సినిమాపై ఉన్న ఎక్స్‌పెక్టేషన్స్‌ను పెంచుకుంటూ పోయాయి. ఈ మధ్య కాలంలో ఆర్ఆర్ఆర్, కె.జి.యఫ్ 2 తర్వాత అంతటి హైప్‌తో రిలీజ్ అయిన సినిమా లైగర్ అని చెప్పొచ్చు. మరి సినిమా అంచనాలను ఏ మేరకు అందుకుంది.. విజయ్ దేవరకొండ పాన్ ఇండియా హీరోగా సత్తా చాటాడా.. లైగ‌ర్ ఆడియెన్స్‌ను మెప్పించాడా? అనేది తెలుసుకోవాలంటే సినిమా క‌థ‌లోకి వెళ‌దాం ముందు..

కథ:
బాలామ‌ణి (ర‌మ్య‌కృష్ణ‌) భ‌ర్త బ‌ల‌రాం మిక్స్‌డ్ మార్ష‌ల్ ఆర్ట్స్ (ఎం.ఎం.ఎ ) జాతీయ పోటీల్లో ఫైన‌ల్ రౌండులో చ‌నిపోతాడు. అయితే త‌న కొడుకు లైగ‌ర్ (విజ‌య్ దేవ‌ర‌కొండ‌) మాత్రం విన్న‌ర్ కావాల‌ని కోరుకుంటాడు. భర్త చివ‌రి కోరిక‌ను తీర్చ‌టానికి బాలామ‌ణి.. టీ దుకాణం పెట్టుకుని కొడుకుని పెంచి పెద్ద చేస్తుంది. మార్ష‌ల్ ఆర్ట్స్‌లో శిక్ష‌ణ ఇప్పిస్తుంది. ఎం.ఎం.ఎ శిక్ష‌ణ కోసం కొడుకుతో స‌హా ముంబై వ‌స్తుంది. అక్క‌డ త‌న భ‌ర్త‌కు తెలిసిన వ్య‌క్తే ఎం.ఎం.ఎ కోచింగ్ సెంట‌ర్ ర‌న్ చేస్తుంటాడు. బాలామ‌ణి గురించి తెలుసుకుని డ‌బ్బులు లేక‌పోయినా విజ‌య్ దేవ‌ర‌కొండ‌ను ప‌నిలో పెట్టుకుంటాడు. నెమ్మ‌దిగా ఎం.ఎం.ఎ లో శిక్ష‌ణ ఇస్తాన‌ని చెబుతాడు. లైగ‌ర్‌కు ఎం.ఎం.ఎ లో లెజెండ్ అయిన అండ‌ర్స‌న్ (మైక్ టైస‌న్‌) అంటే ఎంతో ఇష్టం.. గౌర‌వం. చాలా ఫోక‌స్‌గా ఉండాల‌ని..అమ్మాయిలు, ప్రేమ అని వెళితే ల‌క్ష్యం దెబ్బ తింటుంది. కాబ‌ట్టి జాగ్ర‌త్త‌గా ఉండాల‌ని లైగ‌ర్‌కి కోచ్‌, త‌ల్లి బాలామ‌ణి చెబుతారు. లైగ‌ర్ కూడా స‌రేన‌ని త‌న ప‌ని తాను చూసుకుంటూ ఉంటాడు.

అదే స‌మ‌యంలో వీరి కోచింగ్ సెంట‌ర్‌కు పోటీగా స‌న్నీ(విషు శ‌ర్మ‌) మ‌రో కోచింగ్ సెంట‌ర్ ర‌న్ చేస్తుంటాడు. అత‌ను కోటీశ్వ‌రుడు. అత‌ని చెల్లెలు తాన్యా (అన‌న్య పాండే) అనుకోకుండా ఓ సంద‌ర్భంలో లైగ‌ర్‌తో దెబ్బ‌లాడుతుంది. కానీ ఎం.ఎం.ఎలో అత‌ని ఫోకస్ చూసిన త‌ర్వాత అత‌నితో ప్రేమ‌లో ప‌డుతుంది. కానీ లైగ‌ర్‌కి ఓ స‌మ‌స్య ఉంటుంది. ఆ స‌మ‌స్య వ‌ల్ల తాన్యా అత‌న్ని విడిచి పెట్టేస్తుంది. దాంతో లైగ‌ర్ బాధ‌ప‌డ‌తాడు. కానీ త‌ల్లి చెప్పిన మాట‌ల‌తో మ‌ళ్లీ ఎం.ఎం.ఎపై దృష్టి పెట్టి నేష‌న‌ల్ విజేత‌గా నిలుస్తాడు. అక్క‌డ నుంచి అంత‌ర్జాతీయ స్థాయి పోటీల‌కు వెళ్లాల‌నుకుంటాడు. అత‌ని ద‌గ్గ‌ర డ‌బ్బులు ఉండ‌వు. అప్పుడు లైగ‌ర్‌కి ఎవ‌రు స‌పోర్ట్ చేస్తారు.. నిజంగానే తాన్యా..లైగ‌ర్‌ని విడిచి పెట్టేసి వెళ్లిపోతుందా.. లైగ‌ర్‌కున్న ప్ర‌ధాన స‌మ‌స్యేంటి? లైగ‌ర్ చివ‌ర‌కు త‌న ల‌క్ష్యాన్ని చేరుకుంటాడా? త‌నేంతో ఆరాధించే అండ‌ర్స‌న్‌తో లైగ‌ర్ ఎందుకు గొడ‌వ ప‌డ‌తాడు? అనే విష‌యాలు తెలియాలంటే సినిమా చూడాల్సిందే..

విశ్లేష‌ణ‌:
టాలీవుడ్‌లో ప్ర‌స్తుతం ఉన్న స్టార్ హీరోలంద‌రికీ ఆడియెన్స్‌లో ఓ మాస్ ఇమేజ్‌ను తెచ్చి పెట్టిన ద‌ర్శ‌కుడు పూరి జ‌గ‌న్నాథ్‌. ఆయ‌న డైరెక్ట‌రే కాదు.. మంచి రైట‌ర్ కూడా. సినిమాలో స‌న్నివేశాల‌కు ప‌దునైన సంభాష‌ణ‌లు రాయ‌టం ఆయ‌న స్పెషాలిటీ. అందుకే ఆయ‌న సినిమాల‌కు యూత్ క‌నెక్ట్ అవుతారు. సాధార‌ణంగా పూరి జ‌గ‌న్నాథ్ ఓ సినిమాను తెర‌కెక్కించ‌టానికి మూడు నాలుగు నెల‌ల స‌మ‌యం కంటే ఎక్కువ తీసుకోడు. కానీ త‌న కెరీర్‌లోనే ఎక్కువ రోజులు స‌మ‌యం తీసుకుని డైరెక్ట్ చేసిన సినిమా లైగ‌ర్‌. ఆల‌స్యానికి క‌రోనా కూడా ఓ కార‌ణ‌మైన‌ప్ప‌టికీ లైగ‌ర్ మూవీ కోసం పూరి అండ్ టీమ్ ఎక్కువ స‌మ‌యాన్ని తీసుకుంది.

పూరి జ‌గ‌న్నాథ్ వ‌రుస ప‌రాజయాల‌తో ఇబ్బంది ప‌డుతోన్న స‌మ‌యంలో.. ఆయ‌న డైరెక్ట్ చేసిన ఇస్మార్ట్ శంక‌ర్ బాక్సాఫీస్ ద‌గ్గ‌ర తిరుగులేని విజ‌యాన్ని సాధించ‌టంతో పూరి మ‌ళ్లీ ఫామ్‌లోకి వ‌చ్చాడ‌నుకున్నారు. త‌దుప‌రి ఆయ‌న ఎవ‌రితో సినిమా చేస్తాడోన‌ని అంద‌రూ ఆస‌క్తిగా ఎదురు చూశారు. ఆ స‌మ‌యంలో విజ‌య్ దేవ‌ర‌కొండ హీరోగా పూరి .. లైగ‌ర్ సినిమాను అనౌన్స్ చేశాడు. అంత‌కు ముందు సినిమా ఇచ్చిన స‌క్సెస్ కిక్కో లేక ట్రెండ్‌ను ఫాలో అవుతూ సెన్సేష‌న్ క్రియేట్ చేద్దామ‌నుకున్నాడో ఏమో కానీ.. పూరి తొలిసారి పాన్ ఇండియా ప్రాజెక్ట్‌గా లైగ‌ర్‌ను సెట్స్‌పైకి తీసుకెళ్లాడు. బాలీవుడ్ ద‌ర్శ‌క నిర్మాత క‌ర‌ణ్ జోహార్‌, అజ‌య్ మెహ‌తా, హీరూ వంటి వారు జ‌త కావ‌టంతో లైగ‌ర్ సినిమా స్పాన్ మేకింగ్ ద‌శ‌లోనే పెరిగిపోయింది. అన‌న్య‌, మైక్ టైస‌న్ వంటి వారు ప్రాజెక్ట్‌లో యాడ్ కావ‌టంతో అంచ‌నాలు ఆటోమెటిక్‌గా నెక్ట్స్ రేంజ్‌కు చేరుకున్నాయి.

భారీ బడ్జెట్.. ఎక్స్‌పెక్టేష‌న్స్‌కు త‌గ్గ‌ట్టు మూవీ క‌థ‌ను పూరి జ‌గ‌న్నాథ్ త‌యారు చేసుకున్నాడా? అంటే లేద‌నే చెప్పాలి. సాధార‌ణ ప్రేమ క‌థ‌కి పూరి మిక్స్‌డ్ మార్ష‌ల్ ఆర్ట్స్ అనే కాన్సెప్ట్‌ను యాడ్ చేశాడు. అయితే ఎప్పుడైతే మైక్ టైస‌న్ సినిమాల న‌టిస్తున్నాడ‌నే అనౌన్స్ చేశారో .. ఫ్యాన్స్ క‌థ‌ను మ‌రో రేంజ్‌లో ఊహించుకున్నారు క్లైమాక్స్‌లో విజ‌య్..మైక్ టైస‌న్ అద్భుతంగా ఫైట్ చేసుకుంటారేమో.. ఆ సీన్ ఐ ఫీస్ట్‌లా ఉంటుందేమోన‌ని భావించారు. కానీ మైక్ టైస‌న్ న‌టించిన ఆ సీన్ ప్రేక్ష‌కుల‌ను ఉత్సాహాన్ని నీరుగార్చేసింది. ఏంటి దీనికేనా మైక్ టైస‌న్‌ను న‌టింప చేశారు అని అంద‌రూ అనుకున్నారు. ఎం.ఎం.ఎ క్లైమాక్స్ ఫైట్ సీన్ ఏటో తిర‌గేసింది. దీంతో సినిమాను నెక్ట్స్ రేంజ్‌కు తీసుకెళుతుంద‌నుకున్న సీన్ చ‌ప్ప‌బ‌డిపోయింది. ఇలాగే ప్ర‌తి సీన్‌ను ప్రేక్ష‌కుడు హై ఎక్స్‌పెక్ట్ చేస్తే.. పూరి అందుకు డిఫ‌రెట్‌గా ఏమాత్రం ర‌క్తి క‌ట్టించ‌లేని స్క్రీన్‌ప్లేను రాసుకున్నాడు. హీరో పాత్ర‌కు న‌త్తి ఉన్న‌ట్లు చూపించాడు. దాన్ని పూర్తిగా కంటిన్యూ చేయ‌టం కాస్త కొత్త‌గా ఉన్న‌ప్ప‌టికీ ఆస‌క్తిక‌రంగా మాత్రం లేద‌నే చెప్పాలి.

సాధార‌ణంగా పూరి సినిమాల్లో హీరో క్యారెక్ట‌రైజేష‌న్ చాలా డిఫ‌రెంట్‌గా ఉంటుంది. కానీ ఈ సినిమాలో అలా ఏం ఉండ‌దు. సినిమా ఫ‌స్టాఫ్ ఏదో అలా సాగిందిలే.. సెకండాఫ్‌లో అయినా కిక్ ఇచ్చే సీన్స్ ఉంటాయ‌నుకుంటే.. నీర‌స‌మొచ్చే సీన్స్ మాత్ర‌మే క‌నిపిస్తాయి. ఎంగేజింగ్ సీన్స్ లేవ‌నే చెప్పాలి. పూరి నుంచి ఈ త‌ర‌హా పాన్ ఇండియా రేంజ్ మూవీని క‌చ్చితంగా ప్రేక్ష‌కుడు ఊహించ‌డ‌నేది మాత్రం క‌చ్చితంగా చెప్పొచ్చు.

Advertisement

విజ‌య్ దేవ‌ర‌కొండ గురించి చెప్పాలంటే పాత్ర లుక్ కోసం సిక్స్ ప్యాక్‌డ్ బాడీ షేప్‌లో క‌నిపించాడు. ద‌ర్శ‌కుడు ఏం చెబితే దాన్ని చేసుకుంటూ వ‌చ్చాడ‌నేది క్లియ‌ర్ క‌ట్‌గా ఫాలో అవుతూ వ‌చ్చాడు. న‌త్తి ఉన్న పాత్ర‌లో త‌న బెస్ట్ ఔట్‌పుట్ ఇచ్చే ప్ర‌య‌త్నం చేశాడు. కానీ హీరో క్యారెక్ట‌ర్‌ను పూరి బ‌లంగా.. ప్రేక్ష‌కుల‌కు క‌నెక్ట్ అయ్యేలా మ‌ల‌చ‌లేక‌పోవ‌టంతో విజ‌య్ దేవ‌ర‌కొండ క‌ష్టం వృథా అయ్యింద‌నే చెప్పాలి. ఇక అన‌న్య పాండే గ్లామ‌ర్ డాల్‌గా క‌నిపించిందంతే.. పూరి ఇది వ‌ర‌కు సినిమాల్లో హీరోయిన్‌లాగానే అనిపించింది. మైక్ టైస‌న్ పాత్ర గురించి ఇది వ‌ర‌కే ప్ర‌స్తావించాం. ఇక ర‌మ్యకృష్ణ రోల్ కాస్త కొత్త‌గా ఉంటుంది. ఆమె ఇలాంటి త‌ర‌హా పాత్ర‌లో క‌నిపించ‌లేదు. అయితే అక్క‌డ‌క్క‌డా ఓవ‌ర్ యాక్ష‌న్ క‌నిపించింది. ఇక పూరి సినిమాల్లో కొన్ని పాత్ర‌లు చేయాల్సిన దాని కంటే ఎక్కువ‌గా న‌టిస్తున్న‌ట్లు మ‌న‌కు అనిపిస్తాయి. అలాంటి పాత్ర‌లు ఈ సినిమాలోనూ క‌నిపించాయి.

సాంకేతికంగా చూస్తే నేప‌థ్య సంగీతం కాస్త బెట‌ర్‌. సినిమాటోగ్ర‌ఫీ ఓకే. పాట‌ల‌న్నీ అర్థం అవుతూ కాన‌ట్లు అనిపించాయి. హాలీవుడ్ త‌ర‌హా యాక్ష‌న్ మూవీ చేయాల‌నుకోవ‌టం త‌ప్పు కాదు. ఏ సినిమా అయినా మ‌న ప్రేక్ష‌కులకు ఎమోష‌న్‌కు క‌నెక్ట్ అవుతారు. ఆ పాయింట్ లైగ‌ర్‌లో మిస్ అయ్యిందేది సుస్ప‌ష్టం.

చివరగా.. బాక్సాఫీస్ రింగులో కుప్ప కూలిన ‘లైగర్’

Related Articles

Back to top button