News

ktr, #AskKTR: తదుపరి సీఎం అభ్యర్థి మీరేనా? ఏపీ నుంచి పోటీ చేస్తారా.. కేటీఆర్ ఆసక్తికర సమాధానం – minister k taraka rama rao interesting answers in askktr in twitter


తెలంగాణ ఐటీ, మున్సిపల్ శాఖా మంత్రి కేటీ రామారావు (KTR) సోషల్ మీడియాలో ఎప్పుడూ చురుగ్గా ఉండే విషయం తెలిసిందే. కాలికి గాయం కావడంతో గత కొన్ని రోజులుగా ఇంట్లోనే ఉంటూ విశ్రాంతి తీసుకుంటున్న కేటీఆర్.. శుక్రవారం (ఆగస్టు 4) సాయంత్రం ట్విటర్‌ వేదికగా #AskKTR పేరుతో నెటిజన్లతో ఇంటరాక్ట్ అయ్యారు. ఈ సందర్భంగా పలువురు నెటిజన్లు అడిగిన ప్రశ్నలకు ఆయన ఆసక్తికరంగా బదులిచ్చారు.

వచ్చే ఎన్నికల్లో టీఆర్‌ఎస్ పార్టీ తరఫున ముఖ్యమంత్రి అభ్యర్థి మీరేనా? అని ఓ నెటిజన్ ప్రశ్నించారు. ఎన్నికలకు ఎలా సిద్ధమవుతున్నారని అడిగారు. దీనికి కేటీఆర్ బదులిస్తూ.. ‘కేసీఆర్‌ గారి రూపంలో సమర్థుడైన ముఖ్యమంత్రి మనకు ఉన్నారు. తెలంగాణ ప్రజల దీవెనలతో ఆయన హ్యాట్రిక్‌ కొడతారు’ అని బదులిచ్చారు.

మీరు ఆంధ్రా నుంచి పోటీ చేయండి సార్ అంటూ గోవర్ధన్ అనే నెటిజన్ కేటీఆర్‌ను విజ్ఞప్తి చేశారు. ‘థాంక్స్ ఫర్ ది ఇన్వైట్’ అంటూ కేటీఆర్ బదులిచ్చారు. నవ్వుతున్న ఎమోజీ జత చేశారు. ‘దయచేసి మీరు ఈసారి మా కామారెడ్డి నియోజకవర్గం నుంచి పోటీ చేయండి సార్’ అంటూ కేపీ రెడ్డి అనే మరో నెటిజన్ కోరారు. దీనికి కూడా ‘మీ ఆహ్వానానికి ధన్యవాదాలు’ అంటూ కేటీఆర్ బదులిచ్చారు.

‘నేటి యువత రాజకీయాల్లోకి రావచ్చా? ఎలాంటి నేపథ్యం లేకుండా రాజకీయాల్లోకి రావాలనుకునే యువతకు మీరేం చెబుతారు?’ అంటూ మరో నెటిజన్ ప్రశ్నించారు. దీనికి కేటీఆర్ బదులిస్తూ.. ప్రస్తుత పరిస్థితుల్లో యువత కచ్చితంగా రాజకీయాల్లో రావాలని పిలుపునిచ్చారు. ‘ఎలాంటి నేపథ్యం లేకుండా మన సీఎం సార్‌, ఇంకా ఎంతో మంది రాజకీయాల్లోకి వచ్చారు’ అని ఆయన పేర్కొన్నారు.

‘కేసీఆర్ స్పీచ్ అంటే నాకు చాలా ఇష్టం. ఆయన ప్రసంగం ఎప్పుడూ బోర్ కొట్టలేదు’ అంటూ మరో నెటిజన్ కామెంట్ పెట్టారు. ‘సెక్రటేరియట్‌ ఎప్పుడు రెడీ అవుతుంది సర్‌?’ అంటూ ఓ నెటిజన్ అడిగిన ప్రశ్నకు.. ‘దసరా పండుగ వరకు సిద్ధం అవుతుందని నేను ఆశిస్తున్నా’ అని కేటీఆర్ బదులిచ్చారు.

ప్రధాని మోదీ రాష్ట్రానికి వస్తే సీఎం కేసీఆర్ ప్రొటోకాల్ పాటించరా?
‘ప్రధాని నరేంద్ర మోదీ.. తెలంగాణ రాష్ట్రానికి వస్తే సాదరంగా ఆహ్వానించరా? 6 నెలల్లో సీఎం కేసీఆర్‌ మూడుసార్లు ప్రొటోకాల్‌ ఉల్లంఘించారు. తెలంగాణ సీఎం.. ప్రధాని కంటే గొప్పవారా? హిందీలో సమాధానం ఇవ్వగలరు’ అంటూ మరో నెటిజన్ ప్రశ్నించాడు. దీనికి కేటీఆర్ బదులిస్తూ.. ‘ప్రొటోకాల్‌ను తూ.చ. తప్పకుండా పాటించాం. ప్రైవేట్ పర్యటనలకు వచ్చిన ప్రధానిని సీఎం సాదరంగా ఆహ్వానించాల్సిన అవసరం లేదు. మరొక విషయం దీన్ని హిందీలో చెప్పాల్సిన అవసరం కూడా లేదు’ అని పేర్కొన్నారు.

‘జాతీయ జెండాను వాట్సప్‌ డీపీగా మార్చాలని ప్రధాని చెప్పడం వల్ల దేశ జీడీపీ పెరుగుతుందా?’ అంటూ ఓ నెటిజన్ ప్రశ్నించారు. దీనికి కేటీఆర్ బదులిస్తూ.. ‘డీపీ బదల్నే సే క్యా హోగా..? జీడీపీ బదల్నే సే దేశ్ ఆగే బడేగా’ (డీపీ మారిస్తే ఏం జరుగుతుంది? జీడీపీ మారితేనే దేశం ముందుకు వెళ్తుంది) అన్నారు.

Advertisement

Related Articles

Back to top button