News

krishna district police, కృష్ణా జిల్లాలో లోన్ యాప్ వేధింపులు.. నలుగురి అరెస్ట్! – krishna district police arrested four loan app accused


ఒక్క క్లిక్ తో రుణాలు అంటూ తెలుగు రాష్ట్రాల ప్రజలను మోసం చేసి వేధిస్తున్న రెండు కేసుల్లో నలుగురు కేటుగాళ్లును కృష్ణా జిల్లా పోలీసులు అదుపులోనికి తీసుకున్నారు. పెనమలూరులోని ఆత్కుర్ పోలీస్ స్టేషన్ పరిధిలో నమోదైన లోన్ యాప్ వేధింపుల కేసులను అత్యంత చాకచక్యంగా ఛేదించారు. ఈ కేసు వివరాలను జిల్లా ఎస్పీ శనివారం విలేకరుల సమావేశంలో వెల్లడించారు.

ఎస్పీ జాషువా మీడియాతో మాట్లాడుతూ.. ఈ లోన్ యాప్ నిర్వాహకులు కుటుంబ అవసరాల నిమిత్తం, పిల్లల చదువు కోసం, ఇతర పనుల కోసం నగదు అన్వేషన్లో ఉన్న అమాయక ప్రజల అవసరాలను పెట్టుబడిగా మార్చుకొని ఎలాంటి షూరిటీ ఇవ్వాల్సిన పనిలేదని నమ్మిస్తున్నారని తెలిపారు. డాక్యుమెంటేషన్ మాటే లేదని, ఒక్క క్లిక్ తో తక్షణ రుణం అంటూ లోన్ యాప్ ద్వారా రుణాలు మంజూరు చేస్తున్నారని వివరించారు. అయితే, సకాలంలో బకాయిలు చెల్లిస్తున్నప్పటికీ వడ్డీల పేరుతో అధిక డబ్బు వసూలు చేస్తూ, చెల్లించలేని పక్షంలో వారి ఫోటోలను అసభ్యంగా చిత్రీకరించి బెదిరింపులకు గురి చేస్తూ ఆత్మహత్యలు చేసుకునేలా ప్రేరేపిస్తున్న లోన్ యాప్ కేటుగాళ్లను అదుపులోనికి తీసుకున్నట్లు ఎస్పీ చెప్పారు.

తదుపరి విచారణలో మిగిలిన నేరస్తుల పాత్రను నిర్ధారించి చట్టపరమైన చర్యలు తీసుకుంటామని ఎస్పీ జాషువా వెల్లడించారు. లోన్ యాప్ వేధింపులపై తక్షణమే విచారణ చేసి సైబర్ నేరగాళ్ల ఆట కట్టించాలని డీజీపీ రాజేంద్రనాథ్ రెడ్డి ఆదేశించారని చెప్పారు.

ఇక, లోన్ యాప్ ఆగడాలకు సంబంధించి కృష్ణా జిల్లా ఎస్పీ జాషువా, అడిషనల్ ఎస్పీ వెంకట రామాంజనేయులు ఆధ్వర్యంలో ప్రత్యేక బృందాలను ఏర్పాటు చేసి పెనమలూరు, ఆత్కూర్ పోలీస్ స్టేషన్లో నమోదైన కేసు గురించి ప్రతిష్టాత్మకంగా స్వీకరించి విచారణ ప్రారంభించారు. ఇక, అనధికారికంగా చలామణి అవుతున్న నకిలీ లోన్ యాప్‌లను నమ్మి ప్రజలు మోసపోవద్దని, కేవలం రిజర్వ్ బ్యాంక్ ఆఫ్ ఇండియా వారితో నడపుతున్న బ్యాంకుల నుంచి సంబంధిత పత్రాలు సమర్పించి లోన్లు పొందాలని ఎస్పీ హితవు పలికారు. కేటుగాళ్లు పన్నిన వలలో చిక్కుకొని జీవితాలను బలి కానివ్వొద్దని సూచించారు. అమాయక ప్రజల అవసరాలను ఆసరాగా తీసుకొని బెదిరింపులకు పాల్పడితే సహించేది లేదని ఎస్పీ వార్నింగ్ ఇచ్చారు.

Related Articles

Back to top button