News

komatireddy venkat reddy, Revanth Reddy: కోమటిరెడ్డి వెంకట్‌రెడ్డి కాంగ్రెస్ జెండా వదలరు – telangana congress chief revanth reddy comments on komatireddy venkat reddy


మునుగోడు ఎమ్మెల్యే కోమటిరెడ్డి రాజగోపాల్ రెడ్డి.. కాంగ్రెస్ పార్టీకి రాజీనామా చేస్తున్నట్లు ప్రకటించిన వేళ కోమటిరెడ్డి వెంకట్‌రెడ్డిని ఉద్దేశించి టీపీసీసీ చీఫ్ రేవంత్ రెడ్డి (Revanth Reddy) ఆసక్తికర వ్యాఖ్యలు చేశారు. కోమటిరెడ్డి వెంకట్ రెడ్డి కాంగ్రెస్ జెండాను వదలరని స్పష్టం చేశారు. ఆయన (Komatireddy Venkat Reddy) యూత్ కాంగ్రెస్ దశ నుంచి కాంగ్రెస్ పార్టీలోనే ఉన్నారని చెప్పారు. ఎమ్మెల్యే, ఎంపీ పదవులతో పాటు వివిధ హోదాల్లో పనిచేశారని గుర్తు చేశారు. సోనియా గాంధీ, రాహుల్ గాంధీ అంటే వెంకట్‌రెడ్డికి అమితమైన అభిమానం అని.. కాంగ్రెస్ పార్టీని వీడరని రేవంత్ రెడ్డి తెలిపారు. కాంగ్రెస్ పార్టీ జనరల్ సెక్రటరీ పీసీ వేణుగోపాల్ ముందు నిన్న (ఆగస్టు 1) ఆయనే స్వయంగా ఈ విషయం చెప్పారని తెలిపారు.

‘కోమటిరెడ్డి వెంకట్‌ రెడ్డిపై మాకు సంపూర్ణ విశ్వాసం ఉంది. మునుగోడు ఉపఎన్నికల్లో కాంగ్రెస్ శ్రేణులను ఆయన ముందుండి నడిపిస్తారు. పార్టీ కార్యకర్తలకు అండగా నిలబడతారు. ఎన్నికల్లో పార్టీని గెలిపించే బాధ్యత తీసుకుంటారు’ అని రేవంత్ రెడ్డి అన్నారు.

కోమటిరెడ్డి రాజగోపాల్ రెడ్డికి కాంగ్రెస్ పార్టీ గురించి మాట్లాడే నైతిక హక్కే లేదని రేవంత్ రెడ్డి మండిపడ్డారు. ‘రాజీనామాకు ఆయన చిల్లర మల్లర కారణాలు చెప్తున్నాడు. కాంగ్రెస్‌కు రాజీనామా చేసిన తర్వాత ఆయన చెల్లని చిత్తు కాగితంతో సమానం. ఆ తర్వాత ఏట్లకు పోతడా, గోదాట్లకు పోతడా, బంగాళాఖాతంలో కలుస్తడా మాకు సంబంధం లేదు. మనిషి అనే పదానికే అర్హుడు కాదు. తెలంగాణ సమాజం హర్షించదు. ఆయన వాదనలో పస ఉందా? మునుగోడు ప్రజలను మభ్య పెడదామని అనుకుంటున్నాడేమో.. ఈసారి అలా కుదరదు’ అని రేవంత్ రెడ్డి అన్నారు.

ఆగస్టు 5న మునుగోడులో కార్యకర్తల సమావేశం నిర్వహిస్తామని రేవంత్ రెడ్డి తెలిపారు. ఉత్తమ్ కుమార్ రెడ్డి, కోమటిరెడ్డి వెంకట్ రెడ్డి, మల్లు భట్టి విక్రమార్క సహా పార్టీ కీలక నేతలందరూ ఈ సమావేశానికి హాజరవుతారని చెప్పారు. ఉపఎన్నికలకు సిద్ధంగా ఉండాలని కార్యకర్తలకు పిలుపునిచ్చారు.

‘మునుగోడు ప్రజలు నరేంద్ర మోదీ గుండెలు అదిరేలా సమాధానం ఇస్తారు. మోదీ, కేసీఆర్.. ఇద్దరి దుర్మార్గాలకు పాతర వేయాల్సిన సమయం వచ్చింది. మునుగోడు గడ్డ తీర్పు ఇవ్వబోతోంది. ప్రజలు కొత్త చరిత్ర లిఖించబోతున్నారు. ముఠాలతో, మూటలతో; ఈడీలతో, ఇన్‌కమ్ టాక్స్ దాడులతో వచ్చినా.. గుణపాఠం వచ్చేలా తీర్పు ఇవ్వబోతున్నాం’ అని రేవంత్ రెడ్డి అన్నారు.

Also Read:బిడ్డను సంపులో వేసి, చైన్ స్నాచింగ్ డ్రామా.. కంటతడి పెట్టించే కారణం

Related Articles

Back to top button