News

jagan review meeting, విద్యార్థులు వరుసగా 3 రోజులు పాఠశాలకు వెళ్లకపోతే.. సీఎం జగన్ కీలక ఆదేశాలు – cm ys jagan mohan reddy key orders on school students absent


గ్రామ, వార్డు స్థాయిలో జరిగిన అభివృద్ధిని సచివాలయాల్లో పటిష్టంగా నమోదు చేయాలని అధికారులకు ముఖ్యమంత్రి వైఎస్ జగన్మోహన్ రెడ్డి ఆదేశాలు జారీ చేశారు. సుస్థిర అభివృద్ధిలో ఆంధ్రప్రదేశ్‌ను ప్రథమ స్థానంలో నిలపడమే లక్ష్యంగా తగిన చర్యలు తీసుకోవాలన్నారు. సుస్థిర ప్రగతి లక్ష్యాల సాధనపై సోమవారం సీఎం జగన్‌ సమీక్ష నిర్వహించారు.

ఈ సందర్భంగా సీఎం జగన్‌ మాట్లాడుతూ.. సుస్థిర లక్ష్యాల సాధనలో గ్రామ వార్డు సచివాలయాలను యూనిట్‌గా చేయాలని, అక్కడి సిబ్బందిని పూర్తి స్థాయిలో భాగస్వాములు చేయాలని ఆదేశించారు. ప్రగతి లక్ష్యాల సాధనపై ప్రతి నెలకోసారి వివరాలు నమోదు కావాలని, దీని కోసం ఆర్టిఫిషియల్‌ ఇంటెలిజెన్స్‌ లాంటి సాంకేతికతను వాడుకోవాలని సూచించారు. రాష్ట్రంలో ఎక్కడా పిల్లలు బడి మానేశారన్న మాట వినిపించకూడదని, దీనిపై అధికారులు ఎప్పటికప్పుడు దృష్టి పెట్టాలని సీఎం దిశానిర్దేశం చేశారు. పిల్లలు ఎవరైనా వరుసగా 3 రోజులు పాఠశాలకు రాకపోతే ఇంటికెళ్లి ఆరా తీయాలని, కచ్చితంగా తల్లిదండ్రులకు ఎస్‌ఎంఎస్‌లు పంపాలని అధికారులను ఆదేశించారు.

ప్రగతిని కేవలం అందమైన అంకెల రూపంలో చూపడం కాదని.. అవి వాస్తవ రూపంలో ఉండాలని సీఎం జగన్‌ అన్నారు. ప్రతి అంశంలోనూ సాధించాల్సిన ప్రగతిపై క్షేత్రస్థాయిలో నిశిత పరిశీలన, పర్యవేక్షణ చేయాలన్నారు. గ్రామ, వార్డు సచివాలయాల రూపంలో ప్రభుత్వం విప్లవాత్మక నిర్ణయాలతో గొప్ప వ్యవస్థను తీసుకువచ్చిందన్న సీఎం జగన్.. వీటి ద్వారా చేస్తోన్న ప్రగతికి సంబంధించిన వివరాలను ఎప్పటికప్పుడు నమోదు చేయడం చాలా ముఖ్యమైన అంశంగా పరిగణించాలన్నారు.

అలా చేయకపోతే సుస్థిర ప్రగతి లక్ష్యాలను చేరుకునే ప్రయాణంలో వాస్తవికత దూరం అవుతుందని సీఎం జగన్ చెప్పారు. ఆధార్‌ కార్డు నంబర్, వివరాలతో సహా డేటా నిక్షిప్తం చేయాలని సూచించారు. వీటి ద్వారా వచ్చిన మార్పులను చెప్పగలిగేలా ప్రగతి కనిపించాలన్నారు.

Related Articles

Back to top button