News

india pakistan love story, పాకిస్తాన్ అమ్మాయి – హైదరాబాద్ అబ్బాయి.. సినిమాను తలపించే లవ్‌స్టోరీ, సరిహద్దుల్లో అలజడి – pakistan woman trying to enter india illegally to marry hyderabad boyfriend


పాకిస్థాన్(Pakistan) అమ్మాయి, హైదరాబాద్(Hyderabad) పాతబస్తీ అబ్బాయి. ఆన్‌లైన్‌లో పరిచయమైన వీరు ఒకరినొకరు ఇష్టపడి ప్రేమలో పడ్డారు. ప్రియుడిని పెళ్లి చేసుకునేందుకు దేశ సరిహద్దులు దాటి హైదరాబాద్ వచ్చేందుకు ప్రయత్నించిన యువతి పోలీసులు అడ్డంగా దొరికిపోయింది. సినిమా కథను తలపించే ఈ రియల్ లవ్ స్టోరీ ఇప్పుడు దాయాది దేశాల మధ్య హాట్‌టాపిక్‌గా మారింది.

హైదరాబాద్‌ పాతబస్తీలోని బహదూర్‌పురాకు చెందిన అహ్మద్‌ అనే యువకుడికి పాకిస్థాన్‌లోని పైసలాబాద్‌‌కు చెందిన ఖలీజా నూర్ అనే యువతితో ఆన్‌లైన్‌ పరిచయం ఏర్పడింది. వీరిద్దరు తరుచూ ఛాటింగ్ చేసుకుంటూ ప్రేమలో పడ్డారు. దీంతో ఇద్దరూ పెళ్లిచేసుకోవాలనుకున్నారు. అయితే అన్ని కథల మాదిరిగానే అమ్మాయి తల్లిదండ్రులు వీరి వివాహానికి నో చెప్పారు. దీంతో ఖలీజా నూర్ ఇండియాకు వచ్చేసి ప్రియుడిని పెళ్లాడాలని నిర్ణయించుకుంది. ఇదే విషయాన్ని అహ్మద్‌కి చెప్పగా.. అతడు తన సోదరుడు మహమూద్ సాయం కోరాడు. ఈ పనికోసం ఇద్దరూ కలిసి నేపాల్‌కి చెందిన జీవన్ సాయం తీసుకున్నారు.

వీరంతా కలిసి ఖలీజా నూర్‌ పేరుతో నకిలీ ఆధార్ కార్డుతో సహా ఇతర పత్రాలు సృష్టించారు. ఆమెను నేపాల్ మీదుగా ఇండియాలోకి తీసుకురావాలని పథకం వేశారు. మహమూద్ నేపాల్‌కి వెళ్లి ఖలీజాను అక్కడికి రప్పించాడు. వీరు ముగ్గురూ కలిసి ఈ నెల 8 భారత్‌- నేపాల్ సరిహద్దు ప్రాంతమైన బీహార్‌లోని సుర్సంద్ వద్దకు చేరుకున్నారు. అక్కడి నుంచి దేశంలోని చొరబడుతూ ఇండియన్ ఆర్మీకి చిక్కారు. వారిని క్షుణ్ణంగా తనిఖీ చేసిన సైనికులు.. అనంతరం స్థానిక పోలీసులకు అప్పగించారు. వీరి వ్యవహారంపై పూర్తిగా విచారణ చేపట్టిన సుర్సంద్ జిల్లా ఎస్పీ హర్‌కిషోర్ రాయ్ వివరాలను మీడియాకు వివరించారు.

‘హైదరాబాద్‌కు చెందిన అహ్మద్ కొంతకాలం సౌదీ అరేబియాలోని ఓ హోటల్‌లో పనిచేశాడు. అక్కడ పనిచేసిన నేపాల్ స్నేహితుల సాయంతో కలీజా నూర్‌‌ను అక్రమంగా ఇండియాలోకి తీసుకొచ్చేందుకు ప్రయత్నించాడు. క్రమంలోనే ఖలీజా నూర్‌కు అవసరమైన నకిలీ ఆధార్, ఇతర పత్రాలను మహమూద్ అహ్మద్ సహా మరికొందరు కలిసి సృష్టించారు. కలీజా నూర్ పాకిస్థాన్ నుంచి నేపాల్‌ చేరుకోగా.. అక్కడి నుంచి మహమూద్‌తో పాటు జీవన్ అనే వ్యక్తి ఆమెను ఇండియాలోకి తీసుకొచ్చేందుకు ప్రయత్నిస్తూ సరిహద్దుల్లో పట్టుబడ్డారు. ముందుగా వారిని గూఢచారులుగా భావించిన పోలీసులు లోతుగా ఆరా తీయగా ప్రేమ వ్యవహారం బయటపడింది’ అని ఎస్పీ తెలిపారు. బీహార్ పోలీసుల నుంచి సమాచారం అందుకున్న హైదరాబాద్‌ పోలీసులు అహ్మద్ కార్యకలాపాలు గురించి, ఖలీజా పేరుతో నకిలీ ధ్రువపత్రాలు సృష్టించిన వారి గురించి ఆరా తీస్తున్నారు. వీరి ప్రేమ వ్యవహారానికి సంబంధించిన బీహార్, హైదరాబాద్ పోలీసులతో పాటు ఇంటెలిజెన్స్ వర్గాలు కూడా దర్యాప్తు చేపట్టాయి.

Related Articles

Back to top button