IND vs WI: నాలుగో టీ20లో మెరిసిన పంత్, అక్షర్.. విండీస్ టార్గెట్ 192

అమెరికాలోని ఫ్లోరిడా వేదికగా శనివారం రాత్రి జరుగుతున్న నాలుగో టీ20లో వెస్టిండీస్‌కి 192 పరుగుల లక్ష్యాన్ని భారత్ నిర్దేశించింది. మ్యాచ్‌లో టాస్ గెలిచిన కెప్టెన్ నికోలస్ పూరన్ ఫీల్డింగ్ ఎంచుకోగా.. మొదట బ్యాటింగ్ చేసిన భారత్ జట్టులో రిషబ్ పంత్ (44: 31 బంతుల్లో 6×4), అక్షర్ పటేల్ (20 నాటౌట్: 1×4, 2×6) దూకుడుగా ఆడేశారు. దాంతో.. భారత్ జట్టు నిర్ణీత 20 ఓవర్లలో 5 వికెట్ల నష్టానికి 191 పరుగులు చేసింది.

ప్రయోగాత్మక ఓపెనర్ సూర్యకుమార్ యాదవ్ (24: 14 బంతుల్లో 1×4, 2×6)తో కలిసి భారత్ ఇన్నింగ్స్‌ని ప్రారంభించిన కెప్టెన్ రోహిత్ శర్మ (33: 16 బంతుల్లో 2×4, 3×6) ఫస్ట్ నుంచి టాప్ గేర్‌లో ఆడేశాడు. మరీ ముఖ్యంగా.. వెస్టిండీస్ బౌలర్ల మెకాయ్‌ని టార్గెట్ చేసిన హిట్‌మ్యాన్ ఒకే ఓవర్‌లో రెండు సిక్సర్లు కొట్టగా.. సూర్య కూడా అతనికి ఒక సిక్స్ బాదేశాడు. ఓవరాల్‌గా మ్యాచ్‌లో మెకాయ్ 4 ఓవర్లు వేసి ఏకంగా 66 పరుగులు సమర్పించుకోవడం గమనార్హం.

దూకుడుగా ఆడిన సూర్య, రోహిత్ శర్మ బ్యాక్ టు బ్యాక్ ఓవర్లలో ఔటైపోగా.. అనంతరం వచ్చిన దీపక్ హుడా (21: 19 బంతుల్లో 2×4) నిరాశపరిచాడు. కానీ.. మిడిల్ ఓవర్లలో సమయోచితంగా ఆడిన రిషబ్ పంత్ ఆఫ్ సైడ్ బౌండరీలతో ఆకట్టుకోగా.. సంజు శాంసన్ (30 నాటౌట్: 23 బంతుల్లో 2×4, 1×6) ఆఖరి వరకూ క్రీజులో ఉన్నా గేర్ మార్చలేకపోయాడు. అలానే దినేశ్ కార్తీక్ (6: 9 బంతుల్లో) కూడా అభిమానుల్ని నిరాశపరిచాడు. కానీ.. ఆఖర్లో క్రీజులోకి వచ్చిన అక్షర్ పటేల్ రెండు కళ్లు చెదిరే సిక్సర్లతో భారత్‌కి మెరుగైన స్కోరుని అందించాడు.