News

gst on crematoriums, శ్మశానవాటికలపై జీఎస్టీ లేదు: ఆర్థిక మంత్రి నిర్మలా సీతారామన్ ప్రకటన – netizens satires after nirmala sitharaman says no gst on crematoriums and funerals


జీఎస్టీ (GST) పెంపుపై విమర్శలు వస్తున్న వేళ కేంద్ర ఆర్థిక మంత్రి నిర్మలా సీతారామన్ (Nirmala Sitharaman) రాజ్యసభలో క్లారిటీ ఇచ్చారు. ఏయే వస్తువులు, పదార్థాలపై జీఎస్టీ పెరిగిందో, వేటిపై జీఎస్టీ లేదో వివరించారు. ఈ క్రమంలో శ్మశానవాటికలపైనా జీఎస్టీ లేదని (No GST on Crematoriums) వివరించారు. దేశంలో ధరల పెరుగుదల అంశంపై రాజ్యసభలో మంగళవారం (ఆగస్టు 2) జరిగిన స్వల్పకాలిక చర్చ సందర్భంగా మంత్రి నిర్మలా సీతారామన్ సమాధానం ఇచ్చారు. ఆమె వ్యాఖ్యలు ఇప్పుడు చర్చనీయాంశంగా మారాయి. నెటిజన్లు తమ క్రియేటివిటీకి పదును పెట్టారు. వ్యంగాస్త్రాలు సంధిస్తూ సోషల్ మీడియాలో పోస్టులు పెడుతున్నారు. మీమ్స్ క్రియేట్ చేసి పోస్టు చేస్తున్నారు.

పేదలు వినియోగించే ఏ వస్తువు పైనా ట్యాక్స్ విధించలేదని తెలిపిన నిర్మలా సీతారామన్.. పప్పులు, పెరుగు, లస్సీ, మజ్జిగ, తృణధాన్యాలు లాంటి ఆహార పదార్థాలపై జీఎస్టీ విధించినట్లు చెప్పారు. రాష్ట్రాలు వీటిపై ఇప్పటికే జీఎస్టీ వసూలు చేస్తున్నాయంటూ కేంద్రం నిర్ణయాన్ని సమర్థించుకున్నారు.

‘బ్యాంకుల నుంచి నగదు విత్‌డ్రా చేస్తే ఎలాంటి జీఎస్టీ లేదు. కస్టమర్ల చెక్‌బుక్‌లపై ఎలాంటి పన్ను ఉండదు. ఆస్పత్రుల్లో బెడ్స్, ఐసీయూలకు జీఎస్టీ లేదు. రోజుకు రూ.5000, అంతకంటే ఎక్కువ అద్దె చెల్లించే గదులకు మాత్రమే జీఎస్టీ విధించాం. శ్మశానవాటికలకు జీఎస్టీ లేదు. కొత్త శ్మశానవాటికల నిర్మాణంపై మాత్రం ట్యాక్స్ ఉంటుంది’ అని నిర్మలా సీతారామన్ తెలిపారు.

‘మీ ఉదారతకు ధన్యవాదాలు మేడమ్. మేము ఈ ఆఫర్ సమయంలోనే చచ్చిపోతాము’ అంటూ ఓ నెటిజన్ కామెంట్ పెట్టాడు. ‘పాలు, పెరుగు, పన్నీర్, బెడ్డులపై జీఎస్టీ విధించిన తర్వాత బిగ్ రిలాక్సేషన్.. అంత్యక్రియలు, శ్మశానవాటికల మీద జీఎస్టీ లేదు’ అని మరో నెటిజన్ పోస్టు పెట్టారు.

‘మీరు బతికుంటే, దేవుడికి ధన్యవాదాలు చెప్పుకోండి. లేకపోతే, మీ అంత్యక్రియలపై ఎలాంటి పన్ను విధించనందుకు నిర్మలా సీతారామన్‌కు ధన్యవాదాలు చెప్పుకోండి’ అంటూ మరొకరు ట్వీట్ చేశారు. పాలు, పెరుగు లాంటి నిత్యావసర వస్తువులపైనా జీఎస్టీ విధించడాన్ని తప్పుబడుతూ ఇలా పలువురు పలు రకాలుగా స్పందిస్తున్నారు.

మరోవైపు.. ప్యాక్‌ చేసి లేబుల్‌ వేసిన వస్తువులపై మాత్రమే 5 శాతం జీఎస్టీ విధిస్తున్నట్లు నిర్మలా సీతారామన్ వివరించారు. అలాంటి వస్తువులను విడిగా విక్రయిస్తే ఎలాంటి పన్నూ ఉండదని తెలిపారు. ప్యాక్‌ చేసి లేబుల్‌ వేసిన ఆహార పదార్థాలపై 5 శాతం జీఎస్టీ విధించే ప్రతిపాదనకు జీఎస్టీ కౌన్సిల్‌లో అన్ని రాష్ట్రాలు అంగీకరించాయని ఆమె తెలిపారు. ప్రింటింగ్ సంస్థల నుంచి బ్యాంకులు కొనుగోలు చేసే చెక్‌బుక్‌లపై జీఎస్టీ ఉంటుందని నిర్మలా సీతారామన్ వెల్లడించారు. ఇతర దేశాల్లో ద్రవ్యోల్బణాన్ని పోల్చుతూ.. ఆర్బీఐ, కేంద్ర ప్రభుత్వం చేసిన ప్రయత్నాల వల్లే భారత్‌లో ద్రవ్యోల్బణం రేటు 7 శాతంగా ఉందని చెప్పుకొచ్చారు..

Don’t Miss:

✦ తేళ్ల పంచమి.. వాటిని ముఖంపై వేసుకొని, వామ్మో ఇదేం పండుగ!

✦ కోమటిరెడ్డి వెంకట్‌రెడ్డి కాంగ్రెస్ జెండా వదలరు: రేవంత్ రెడ్డి

Advertisement

Related Articles

Back to top button