News

godavari floods, భద్రాద్రి: గోదావరి వరదలపై కమిటీ.. శాశ్వత పరిష్కారం దిశగా తొలి అడుగు – telangana govt forms 4 member committee on godavari floods and effect on bhadrachalam


గోదావరి వరదల నుంచి భద్రాచలం (Bhadrachalam) వాసులకు శాశ్వత పరిష్కారం చూపిస్తామని హామీ ఇచ్చిన ముఖ్యమంత్రి కె. చంద్రశేఖరరావు (KCR) ఆ దిశగా తొలి నిర్ణయం తీసుకున్నారు. నలుగురు సభ్యులతో ఈ అంశంపై కమిటీని నియమించారు. నలుగురు చీఫ్ ఇంజనీర్లతో ఈ కమిటీని ఏర్పాటు చేశారు. ఈ కమిటీ సభ్యులు భద్రాచలం, పరిసర ప్రాంతాల్లో పర్యటించి, క్షేత్ర స్థాయిలో గోదావరి వరద ప్రవాహానికి సంబంధించిన పరిస్థితుల గురించి తెలుసుకోనున్నారు. కొన్నేళ్లుగా భద్రాచలం వద్ద గోదావరి నీటి మట్టానికి సంబంధించిన గణాంకాలు, అక్కడి భౌగోళిక స్వరూపం, ఇతర అంశాలను తీసుకొని పరిష్కార మార్గాలు సూచించనున్నారు. ఈ కమిటీ చేయనున్న సూచనల ఆధారంగా రాష్ట్ర ప్రభుత్వం చర్యలు తీసుకుంటుంది.

జూలైలో గోదావరి వరదల కారణంగా భద్రాచలం వాసులు తీవ్రంగా నష్టపోయిన సంగతి తెలిసిందే. గోదావరి వరద నీళ్లు నివాసాలను ముంచెత్తడంతో వేలాది మంది ప్రజలు తట్టా బుట్టా సర్దుకొని సురక్షిత ప్రాంతాలకు, ప్రభుత్వం ఏర్పాటు చేసిన శిబిరాలకు తరలివెళ్లారు. వరద ప్రభావిత ప్రాంతాల్లో ముఖ్యమంత్రి కేసీఆర్ పర్యటించారు. శాశ్వత పరిష్కారం చూపిస్తామని హామీ ఇచ్చారు.

సీఎం కేసీఆర్ తాను ఇచ్చిన హామీ ప్రకారం.. గోదావరి వరదలపై కమిటీ నియమించారని పినపాక ఎమ్మెల్యే రేగా కాంతారావు తెలిపారు. ‘గోదావరి వరదల నుంచి భద్రాచలం ప్రజలకు శాశ్వత పరిష్కారం చూపిస్తామని మాటిచ్చిన సీఎం కేసీఆర్.. ఇచ్చిన మాట ప్రకారం నలుగురు చీఫ్ ఇంజనీర్లతో ప్రత్యేక కమిటీని నియమించారు’ అని ఆయన సోషల్ మీడియాలో పోస్టు చేశారు.

రేగా కాంతారావు పోస్టుకు స్పందిస్తూ.. ‘ప్రభుత్వ సాయం రూ.10,000 కొంత మందికే అందాయి. ఇంకా చాలా మందికి అందాల్సి ఉంది సార్’ అని ఓ నెటిజన్ కామెంట్ పెట్టారు. ‘అశ్వాపురం మండలంలో నిజంగా ఇళ్లు కూలిన వాళ్లకి పరిహారం అందలేదు’ అంటూ మరో నెటిజన్ కామెంట్ పెట్టారు. మరోవైపు.. ఇటీవల నాలుగు రోజుల పాటు కురిసిన భారీ వర్షాలు, ఎగువన మహారాష్ట్ర నుంచి వస్తున్న వరద ప్రవాహంతో భద్రాచలం వద్ద గోదావరి నీటి మట్టం మరోసారి ప్రమాదకర స్థితికి చేరుకుంది.

ఏపీ ప్రభుత్వం పోలవరం డ్యామ్ ఎత్తు పెంచడం వల్ల భద్రాచలం ముంపు బారినపడుతోందని తెలంగాణ ఆరోపిస్తోంది. ముంపు మండలాల్లో 5 గ్రామాలను తిరిగి తెలంగాణలో కలపాలని మంత్రి పువ్వాడ అజయ్ కుమార్ డిమాండ్ చేశారు. ఈ వ్యాఖ్యలను ఏపీ మంత్రులు తిప్పికొట్టారు. ఇదిలా ఉండగా.. కరకట్టల నిర్మాణం, తదితర చర్యల ద్వారా భద్రాచలం, దాని పరిసర గ్రామాలు ముంపు బారిన పడకుండా కాపాడాలని రాష్ట్ర ప్రభుత్వం భావిస్తోంది.

Related Articles

Back to top button