News

cm kcr, కేసీఆర్ నిర్ణయం దురదృష్టకరం.. నీతి ఆయోగ్ కీలక కామెంట్స్ – kcr decision is unfortunate says niti aayog


Niti Aayog: తాను నీతి ఆయోగ్ సమావేశానికి దూరంగా ఉంటానని తెలంగాణ ముఖ్యమంత్రి కేసీఆర్ ప్రకటించారు. ఈ ప్రకటనపై నీతి ఆయోగ్ ఘాటుగానే స్పందించింది. నీతి ఆయోగ్ పాలక మండలి సమావేశంలో పాల్గొనకూడదని కేసీఆర్ నిర్ణయించడం దురదృష్టకరమని వ్యాఖ్యానించింది. నీతి ఆయోగ్ గవర్నింగ్ కౌన్సిల్ దేశంలోని అత్యున్నత రాజకీయ నాయకత్వం ఉండే వేదిక అని స్పష్టం చేసింది. రాష్ట్రస్థాయిల్లో కీలకమైన అభివృద్ధికి సంబంధించిన సమస్యలపై చర్చించి.. జాతీయ అభివృద్ధికి సంబంధించి నిర్ణయాలు తీసుకునే వేదిక అని వ్యాఖ్యానించింది.

మంచి స్పూర్తితో ఏర్పడిన సంస్థ..
బలమైన రాష్ట్రాలు.. బలమైన దేశాన్ని తయారు చేయాలనే స్పూర్తితో నీతి ఆయోగ్ ఒక సంస్థగా ఏర్పాటైందని స్పష్టం చేసింది. రాష్ట్రాలతో సన్నిహితంగా పనిచేసేందుకు ఇప్పటికే అనేక చర్యలు చేపట్టామని వెల్లడించింది. గత సంవత్సరంలోనే నీతి ఆయోగ్ వైస్ ఛైర్మన్, సభ్యులు రాష్ట్రాల ముఖ్యమంత్రులతో 30కి పైగా సమావేశాలు నిర్వహించారని స్పష్టం చేసింది. ఈ సమావేశాలు వివిధ కేంద్ర మంత్రిత్వ శాఖలతో రాష్ట్రాలకు సంబంధించిన అనేక సమస్యలను పరిష్కరించాయని వెల్లడించింది. నీతి ఆయోగ్ కేంద్ర-రాష్ట్రాల మధ్య మరింత సహకారానికి మార్గం సుగమం చేశాయని వివరించింది.

కేసీఆర్ స్పందించలేదు..
తెలంగాణ రాష్ట్రానికి సంబంధించిన అభివృద్ధి సమస్యలపై చర్చించేందుకు.. నీతి ఆయోగ్ వైస్ ఛైర్మన్ నేతృత్వంలోని ప్రతినిధి బృందం.. గతేడాది జనవరి 21న హైదరాబాద్‌లో తెలంగాణ ముఖ్యమంత్రిని కలిసిందని నీతి ఆయోగ్ వెల్లడించింది. ఇటీవల నీతి ఆయోగ్ సమావేశానికి రావాలని విజ్ఞప్తి చేసినప్పటికీ.. ముఖ్యమంత్రి కేసీఆర్ స్పందించలేదని తెలిపింది. భారత ప్రభుత్వం అన్ని మంత్రిత్వ శాఖలు, ప్రధానమంత్రి కార్యాలయం ద్వారా జాతీయ ప్రాముఖ్యత కలిగిన అన్ని సమస్యలపై రాష్ట్రాలు, కేంద్రపాలిత ప్రాంతాలతో మాట్లాడుతోందని నీతి ఆయోగ్ స్పష్టం చేసింది.

ముఖ్యమంత్రి ఆరోపణ సరికాదు..
నితి ఆయోగ్ పాలక మండలి సమావేశానికి సన్నాహకంగా.. తెలంగాణతో సహా కేంద్రం-రాష్ట్రాల మధ్య వివరణాత్మక సంప్రదింపులు జరిగాయని.. నితి ఆయోగ్ వెల్లడించింది. ఆదివారం జరిగే సమావేశానికి అనుసంధానంగానే.. జూన్ నెలలో ధర్మశాలలో ప్రధానమంత్రి నరేంద్ర మోదీ.. రాష్ట్రాల ప్రధాన కార్యదర్శులతో భేటీ అయ్యారని వివరించింది. తెలంగాణ ప్రభుత్వం ప్రధాన కార్యదర్శితో సహా.. అన్ని రాష్ట్రాల అధికారులు ఈ సమావేశానికి వచ్చారని స్పష్టం చేసింది. ఎజెండా తయారీలో సహకరించడం లేదన్న తెలంగాణ ముఖ్యమంత్రి ఆరోపణ సరికాదని వ్యాఖ్యానించింది.

తెలంగాణ నిధులు వినియోగించలేదు..
నీటి రంగానికి సంబంధించి.. నాలుగేళ్లుగా భారత ప్రభుత్వం.. తెలంగాణ రాష్ట్రానికి జల్ జీవన్ మిషన్ కింద 3వేల 982 కోట్ల రూపాయలను కేటాయించిందని నీతి ఆయోగ్ స్పష్టం చేసింది. వాటిలో తెలంగాణ కేవలం 200 కోట్లు మాత్రమే వినియోగించిందని తెలిపింది. 2014-2022 మధ్య కాలంలో.. తెలంగాణకు వివిధ పథకాల కింద 1195 కోట్లు విడుదలయ్యాయని వెల్లడించింది. జాతీయ ప్రాముఖ్యత కలిగిన ఫ్లాగ్‌షిప్ పథకాలతో సహా.. ఆర్థిక విషయాల్లో భారత ప్రభుత్వం రాష్ట్రాలకు మద్దతు ఇస్తోందని స్పష్టం చేసింది. కేంద్ర ప్రాయోజిత పథకాల కింద నిధులు కేటాయింపు గణనీయంగా పెరిగిందని.. 14వ ఆర్థిక సంఘం నిధులు 32 శాతం నుంచి 42 శాతానికి పెంచిన విషయాన్ని గుర్తు చేసింది. సీఎస్ఎస్ కింద కేటాయించిన నిధుల వినియోగానికి.. తగినంత సౌలభ్యం కూడా కల్పించిందని వివరించింది.

Related Articles

Back to top button