News

chintakayala vijay, చింతకాయల విజయ్‌కు ఊరట.. సీఐడీపై ఏపీ హైకోర్టు సీరియస్! – ap high court comments on tdp leader chintakayala vijay petition over cid case


టీడీపీ నేత చింతకాయల విజయ్‌ (Chintakayala Vijay)కు ఏపీ హైకోర్టులో ఊరట లభించింది. సోషల్ మీడియాలో పోస్టు విషయంలో సీఐడీ ఇచ్చిన నోటీసును సవాల్ చేస్తూ వేసిన పిటిషన్‌పై కోర్టులో విచారణ జరిగింది. పిటిషనర్‌ నర్సీపట్నంలో నివాసం ఉంటే హైదరాబాద్‌లోని కుటుంబ సభ్యులకు నోటీసులు ఇవ్వడం వేధింపులకు గురి చేయడమేనని కోర్టు అభిప్రాయపడింది. అలాగే పిటిషనర్‌పై తొందరపాటు చర్యలు తీసుకోవద్దని సీఐడీకి తేల్చిచెప్పింది.

సోషల్ మీడియాలో పోస్టు చేసేందుకు ఉపయోగించిన ఎలక్ట్రానిక్‌ పరికరాలతో హాజరుకావాలని.. విఫలమైతే అరెస్టు చేస్తామని చింతకాయల విజయ్‌కి సీఆర్‌పీసీ 41ఏ కింద ఇచ్చిన నోటీసులో సీఐడీ పేర్కొనడాన్ని హైకోర్టు ఆక్షేపించింది. అలాగే దర్యాప్తులో భాగంగా సేకరించాల్సిన ఆధారాలను నిందితులే తీసుకురావాలని ఆదేశించడం ఏంటని.. ఇలాంటి చర్యలకు అనుమతిస్తే, భవిష్యత్తులో కన్‌ఫెషన్‌ స్టేట్‌మెంట్ ఇవ్వాలంటారని సీఐడీపై సీరియస్ అయ్యింది. ఈ కేసులో పిటిషనర్ తరపు లాయర్ వాదనలు వినిపించగా.. సీఐడీ తరఫు న్యాయవాది వాదనల కోసం ఈ కేసు విచారణ సోమవారానికి వాయిదా పడింది.

ముఖ్యమంత్రి వైఎస్ జగన్ సతీమణిపై సోషల్ మీడియాలో ఐటీడీపీ ట్విటర్‌ అకౌంట్ నుంచి అభ్యంతరకరమైన పోస్టులు పెట్టారని.. దీని వెనుక చింతకాయల విజయ్‌ పాత్ర ఉన్నట్లు సీఐడీ చెబుతోంది. ఈ ఆరోపణలతో టీడీపీ నేత విజయ్‌పై సీఐడీ కేసు నమోదు చేసిన సంగతి తెలిసిందే. సీఐడీ క్రైమ్‌ నంబర్‌ 14/2022 ఐపీఎసీ సెక్షన్లు 419, 469, 153–ఎ, 505(2), 120–బి రెడ్‌విత్‌ 34, ఐటీ చట్టం సెక్షన్‌ 66(సి) కింద కేసు ఫైల్ చేసింది.

ఏపీ సీఐడీ సీఐడీ అధికారులు హైదరాబాద్‌లోని విజయ్ నివాసానికి నోటీసులు ఇచ్చే ప్రయత్నం చేశారు.. అక్కడ కొన్ని పరిణామాలు జరిగాయి. విజయ్ మంగళగిరిలోని సీఐడీ కార్యాలయంలో విచారణకు వెళ్లలేదు. ఆయన తరఫు లాయర్లు సీఐడీ కార్యాలయానికి వెళ్లి.. ఎఫ్‌ఐఆర్‌ కాపీతో పాటు, ఇతర వివరాలు ఇవ్వాలని కోరారు. అయితే ఈ కేసులో సీఐడీ ఇచ్చిన 41ఏ నోటీసును సవాలు చేస్తూ విజయ్‌ హైకోర్టులో అత్యవసరంగా పిటిషన్ దాఖలు చేయగా విచారణ జరిగింది.

Related Articles

Back to top button