News

chinta mohan, 2024 ఎన్నికల్లో ఊహించని పరిణామాలు.. ‘కాపు’ ముఖ్యమంత్రి: చింతా మోహన్ – congress leader chinta mohan hot comments on next elections


ఆంధ్రప్రదేశ్‌లో భారత రాష్ట్ర సమితి (బీఆర్ఎస్) పార్టీ ఎంట్రీకి ఇద్దరు చంద్రుల మధ్య వివాదమే కారణమని కాంగ్రెస్‌ పార్టీ సీనియర్‌ నాయకుడు, మాజీ ఎంపీ చింతా మోహన్ విశ్లేషించారు. చంద్రబాబునాయుడు అక్కడ (తెలంగాణలో) సభ పెడితే.. కేసీఆర్‌ ఇక్కడ (ఆంధ్రప్రదేశ్‌లో) పెడుతున్నారని పేర్కొన్నారు. మాజీ ముఖ్యమంత్రి ఎన్టీ రామారావు మాదిరిగా కేసీఆర్‌కు కూడా ప్రధాన మంత్రి కావాలనే ఆశ ఉందేమో అని పేర్కొన్నారు.

ఇక, రాష్ట్రంలో వైసీపీ ప్రభుత్వం మళ్లీ రానేరాదని చింతా మోహన్ జోస్యం చెప్పారు. వైసీపీ పైకి ఎన్ని‌ గొప్పలు చెప్పినా.. పతనం మాత్రం ఖాయమన్నారు. 2024 ఎన్నికల్లో ఎవరూ ఊహించని పరిణామాలు ఉంటాయని వ్యాఖ్యానించారు. తాను గుడిసె గుడిసె తిరిగాను.. ప్రజలంతా ముఖ్యమంత్రి వైఎస్ జగన్మోహన్ రెడ్డిని తిడుతున్నారని చెప్పారు. టీడీపీ, వైసీపీ విధానాల వల్ల ప్రతి పేదవాడు అప్పుల పాలయ్యాడని.. ఫ్యాన్ తమను మోసం‌ చేసిందనే ఆక్రోశం ప్రజల్లో ఉందన్నారు. పేద ప్రజల్లో ఎంతో మార్పు వచ్చింది.. వైసీపీని సాగనంపేందుకు సిద్ధంగా ఉన్నారని తెలిపారు.

ఇక, వచ్చే ఎన్నికల్లో కాంగ్రెస్ పార్టీ అధికారంలోకి వస్తుందని.. చంద్రబాబు ప్రతిపక్షంలో ఉంటారని చింతా మోహన్ తెలిపారు. కాపులంతా కాంగ్రెస్ పార్టీలోకి రావాలని.. మిమ్మల్ని ముఖ్యమంత్రిని చేస్తామని పిలుపునిచ్చారు. గతంలో పెట్రోల్ ధర రూ. 100 కావాలంటే రూపాయి విలువ పతనం‌ కావాలని మన్మోహన్ సింగ్ ఆనాడే చెప్పారని గుర్తుచేశారు. ఇక, దేశంలో బీజేపీ పతనం ప్రారంభమైందని.. తిరిగి కోలుకోలేదని జోస్యం చెప్పారు. నేడు ఏపీలో కాంగ్రెస్ రాజకీయ పరిస్థితిని 18 ఏళ్ల క్రితమే ఊహించానని.. ఆనాడే మా అధిష్టానానికి వివరంగా లేఖ రాశాను అని గుర్తు చేసుకున్నారు. 2004 లోనే ఈ విషయాన్ని తమ పార్టీ వాళ్లకు తానే చదివి స్వయంగా వినిపించానని తెలిపారు.

చంద్రబాబు సభలకు వస్తున్న జనం చూస్తే.. దేశంలో పేదోళ్ల పరిస్థితి అర్థం అవుతుందని చింతా మోహన్ పేర్కొన్నారు. సంక్రాంతి కానుకగా రూ. 1,500 విలువ చేసేవి ఇచ్చారని.. 3,500 మందికి ఏర్పాటు చేస్తే, వేల మంది తరలివచ్చారని తెలిపారు. టోకెన్లు ఇచ్చే సమయంలో తొక్కిసలాట జరిగిందని వివరించారు. మరోవైపు, ఉచితంగా ఇస్తామంటే రాని పేదవాళ్లు ఉండరని.. వీటిని‌ సాకుగా చూపి జగన్ ప్రభుత్వం జీవో ఇవ్వడం కరెక్ట్ కాదని హితవుపలికారు. స్వేచ్ఛ ఉన్న దేశంలో మీటింగ్‌లు పెట్టకూడదని ఆంక్షలు విధించడం సరికాదన్నారు. రాష్ట్ర ప్రభుత్వం తీసుకున్న నిర్ణయాన్ని వెంటనే వెనక్కి తీసుకోవాలని డిమాండ్‌ చేశారు. తిట్లు కూడా దీవెనలుగా తీసుకుంటే జగన్‌కే మంచిదన్నారు.

Related Articles

Back to top button