News

Chandrababu Naidu ముందే చెబితే విన్నారా, ఇప్పుడు పరువుపోయింది.. జగన్ విషయంలో టీడీపీ హ్యాపీ



ఏపీ ముఖ్యమంత్రి, అధ్యక్షుడు జగన్‌కు కేంద్ర ఎన్నికల సంఘం ఊహించని ట్విస్ట్ ఇచ్చింది. ఆయనను పార్టీ శాశ్వత అధ్యక్షుడిగా ఎన్నుకోవడం చెల్లదని.. ప్రజాస్వామ్యంలో ఏ రాజకీయ పార్టీకీ శాశ్వత అధ్యక్షుడు, శాశ్వత పదవులు గానీ వర్తించవని తెలిపింది. దీనికి సంబంధించి ఉత్తర్వులను ఆ పార్టీ ప్రధాన కార్యదర్శికి పంపినట్లు ఈసీ ప్రకటన విడుదల చేసింది. అయితే ఈ విషయాన్ని ముందే చెప్పారని.. కానీ వినలేదని టీడీపీ అంటోంది. చంద్రబాబు వీడియోను టీడీపీ అధికారిక ట్విట్టర్‌లో ట్వీట్ చేస్తూ ప్రస్తావించింది.

చంద్రబాబు నగరి నియోజకవర్గంలో పర్యటించారు.. ఆ సమయంలో శాశ్వత అధ్యక్షుడి ఎన్నికపై స్పందించారు. ‘శాశ్వతంగా వైఎస్సార్‌సీపీ అధ్యక్షుడట.. ఎవరికైనా ఇలాంటి చెత్త ఆలోచనలు వచ్చాయా.. ఎన్టీఆర్ కూడా రెండేళ్లకు ఒకసారి మెంబర్‌షిప్ చేసేవారు. ప్రజాస్వామంగా అధ్యక్షుడిగా ఎన్నికయ్యేవారు. నేను 27 ఏళ్లు టీడీపీ అధ్యక్షుడిగా ఉన్నా.. ప్రతి రెండేళ్లకు ఒకసారి ఎన్నిక జరుగుతుంది. జగన్‌కు కొత్త ఆలోచన వచ్చింది.. ఎన్నికలే లేకుండా శాశ్వత అధ్యక్షుడట. ఇది ప్రజాస్వమ్యమా.. అది ఒక పార్టీనా అవి అసలు ఎన్నికలేనా.. ఏది చేసినా జరిగిపోతుందని భారం వేయడం’అంటూ చంద్రబాబు కామెంట్స్ చేశారు.

ఈ వీడియోను టీడీపీ అధికారిక ట్విట్టర్ అకౌంట్‌లో పోస్ట్ చేశారు. ‘ఇదంతా అవ్వదని ఆయన అప్పుడే చెప్పాడు.. విన్నారా? ఇప్పుడు పరువు పోయింది.. పదవి పోతుంది!’అంటూ టీడీపీ ఎద్దేవా చేసింది. చంద్రబాబు ముందే చెప్పారని.. కానీ వినలేదని.. ఇప్పుడు పరువు పోయింది, పదవి పోయిందని సెటైర్లు పేల్చారు. అంటే జగన్ విషయంలో చంద్రబాబు చెప్పిన మాటలు నిజయమయ్యాయి అనేది టీడీపీ వాదన.

ఇటీవల జరిగిన వైఎస్సార్‌సీపీ ప్లీనరీలో జగన్‌ను ఆ పార్టీ శాశ్వత అధ్యక్షుడిగా ఎన్నుకున్న సంగతి తెలిసిందే. అయితే ఈ ఎన్నిక చెల్లదని ఈసీ తేల్చి చెప్పింది. ప్రజాస్వామ్యంలో ఏ రాజకీయ పార్టీకీ శాశ్వత అధ్యక్షుడు.. శాశ్వత పదవులు గానీ వర్తించవనేది ఎన్నికల సంఘం చెబుతున్న మాట. వైఎస్సార్‌సీపీకి శాశ్వత అధ్యక్షుడిగా జగన్‌ ఎన్నికైనట్టుగా వచ్చిన వార్తలు, మీడియాలో కథనాల ఆధారంగా స్పందించినట్లు ఈసీ చెబుతోంది. శాశ్వత అధ్యక్షుడు, శాశ్వత పదవులు ప్రజాస్వామ్య వ్యతిరేకమని తాము లేఖ రాసినా వైఎస్సార్‌సీపీ పట్టించుకోలేదని ఉత్తర్వుల్లో ప్రస్తావించింది. వెంటనే అంతర్గత విచారణ జరిపి నివేదిక ఇవ్వాలని వైఎస్సార్‌సీపీ ప్రధాన కార్యదర్శికి ఆదేశాలు జారీ చేసింది ఈసీ.

పార్టీ అధ్యక్ష పదవికి ఎప్పటికప్పుడు పార్టీలో ఎన్నికలు జరగాలని ఎన్నికల సంఘం అంటోంది. అది కూడా ఎన్నికల నియమావళిని పాటించాలని గుర్తు చేసింది. ఈ దేశంలో ఈసీ ఇచ్చిన నియమావళి అంగీకరించిన తర్వాతే పార్టీల రిజిస్ట్రేషన్‌ వ్యవహారాలన్నీ జరుగుతున్నాయని చెబుతోంది. పార్టీకి శాశ్వత అధ్యక్షుడిగా నియమించడం ఈసీ నియమ నిబంధనలకు విరుద్ధం అంటోంది. వైఎస్సార్‌సీపీ ప్లీనరీలో జరిగిన శాశ్వత అధ్యక్షుడి ఎన్నిక చెల్లదనేది కేంద్ర ఎన్నికల సంఘం చెబుతున్న మాట.

Related Articles

Back to top button