Balakrishna: బాలయ్య సినిమాలో మరో బాలీవుడ్ స్టార్.. పవర్‏ఫుల్ విలన్‏గా ఎవరంటే..

నందమూరి నటసింహం బాలకృష్ణ ఓవైపు వెండితెరపై.. మరోవైపు బుల్లితెరపై సందడి చేస్తున్న సంగతి తెలిసిందే. ఇటీవలే అకండ సినిమాతో బ్లాక్ బస్టర్ హిట్ అందుకున్న బాలయ్య.. ప్రస్తుతం గోపిచంద్ మలినేని దర్శకత్వంలో వీరసింహ రెడ్డి సినిమా చేస్తున్నారు. ఇటీవల విడుదలైన ఈ మూవీ టైటిల్ వీడియో సినిమాపై అంచనాలను పెంచేసింది. ఇందులో స్రుతిహాసన్ కథానాయికగా నటిస్తోంది. ప్రస్తుతం ఈ మూవీ షూటింగ్ శరవేగంగా జరుగుతుంది. మరోవైపు ఆహా ఓటీటీలో అన్‏స్టాపబుల్ టాక్ షోతో యాంకరింగ్‏లో కొత్తదనం తీసుకువచ్చారు. ఎప్పుడూ యాక్షన్ చిత్రాలతో ఆడియన్స్ ను అలరించిన బాలయ్య.. తనదైన కామెడీ టైమింగ్‏తో ప్రేక్షకులను ఆకట్టుకుంటున్నారు. అయితే ఇప్పుడు వరుస చిత్రాలతో బిజీగా ఉన్న బాలయ్య సినిమాతో ఓ బాలీవుడ్ స్టార్ తెలుగు తెరకు పరిచయం కాబోతున్నారట.

డైరెక్టర్ అనిల్ రావిపూడి దర్శకత్వంలో బాలయ్య ఓ ప్రాజెక్ట్ చేయనున్న సంగతి తెలిసిందే. ఇక లేటేస్ట్ సమాచారం ప్రకారం ఈ సినిమాలో పవర్ ఫుల్ విలన్ పాత్ర కోసం.. బాలీవుడ్ స్టార్ బాబీ దేఓల్ తో చర్చలు జరిపారట. ఇక ప్రతినాయకుడి పాత్ర కోసం బాబీ కూడా అంగీకరించినట్లుగా సమాచారం. ఇప్పటికే స్క్రిప్ట్ వర్క్ పూర్తయిన ఈ సినిమా షూటింగ్ త్వరలోనే ప్రారంభం కానుంది. ఇందుకు సంబంధించిన అధికారిక ప్రకటన త్వరలోనే రానున్నట్లు తెలుస్తోంది.

ఇక ఈ సినిమాలోనే కాకుండా.. పవర్ స్టార్ పవన్ కళ్యాణ్ నటిస్తోన్న హరి హర వీరమల్లు చిత్రంలోని బాబీ ప్రతినాయకుడిగా కనిపించనున్నాడట. అయితే ముందు ఈ మూవీలో బీటౌన్ నటుడు అర్జున్ రాంపాల్ నటించాల్సి ఉంది. కానీ అనివార్య కారణాలతో అతని స్థానంలో బాబీ దేఓల్ ఎంపికైనట్లు సమాచారం.