News

bjp warangal meeting, BJP వరంగల్ సభకు ఝలక్.. ఆర్ట్స్ కాలేజీ అనుమతి నిరాకరణ – hanamkonda arts and science college denies permission for bjp public meeting


న్మకొండలో ఈ నెల 27న బీజేపీ తలపెట్టిన బహిరంగ సభకు (BJP Warangal Sabha) ఆర్ట్స్ కాలేజీ అనుమతి నిరాకరించింది. కాలేజీ గ్రౌండ్స్‌లో సభ నిర్వహించేందుకు అనుమతి ఇవ్వలేమని ఆర్ట్స్ కాలేజీ ప్రిన్సిపాల్ తెలిపారు. ఈ మేరకు గురువారం (ఆగస్టు 25) సాయంత్రం వరంగల్ జిల్లా బీజేపీ అధ్యక్షురాలు పద్మారెడ్డికి లేఖ రాశారు. సభ కోసం బీజేపీ చెల్లించిన రూ.5 లక్షలను తిరిగి ఇవ్వనున్నట్లు తెలిపారు. అనుమతులకు సంబంధించి పోలీసుల నుంచి తమకు ఇప్పటివరకు ఎలాంటి సమాచారం లేదని.. అందువల్ల ఈ నిర్ణయం తీసుకున్నట్లు లేఖలో పేర్కొన్నారు. బీజేపీ నాయకత్వం దీన్ని సీరియస్‌గా తీసుకున్నట్లు తెలుస్తోంది. కోర్టులో కేసు వేయనున్నట్లు సమాచారం.

బండి సంజయ్‌ చేపట్టిన మూడో విడత ప్రజా సంగ్రామ యాత్ర ముగింపు సభను ఆగస్టు 27న హన్మకొండలోని ఆర్ట్స్ కాలేజీ గ్రౌండ్‌లో నిర్వహించాలని బీజేపీ రాష్ట్ర నాయకత్వం నిర్ణయించింది. సభకు ముఖ్య అథితిగా బీజేపీ జాతీయ అధ్యక్షుడు జేపీ నడ్డా హాజరు కానుండటంతో బీజేపీ శ్రేణులు ఈ సభను ప్రతిష్టాత్మకంగా తీసుకున్నాయి. భారీ జన సమీకరణపై దృష్టి పెట్టాయి.

అటు బండి సంజయ్‌ ప్రజాసంగ్రామ యాత్రకు హైకోర్టు కూడా అనుమతి ఇవ్వడం బీజేపీ శ్రేణుల్లో మరింత ఉత్సాహం నింపింది. యాత్రను నిలుపు చేయాలని ఆదేశిస్తూ వరంగల్‌ పోలీసులు జారీ చేసిన ఆదేశాలను హైకోర్టు సస్పెండ్‌ చేసింది. యాత్రను యథావిధిగా కొనసాగించవచ్చని తెలిపింది. ఈ నేపథ్యంలో శుక్రవారం నుంచి పాదయాత్రను తిరిగి ప్రారంభించేందుకు బండి సంజయ్‌ ఏర్పాట్లు చేసుకున్నారు.

వరంగల్‌ సమీపంలో బొల్లికుంట నుంచి యాత్రను మొదలుపెట్టి శనివారం మధ్యాహ్నం వరకు పాదయాత్ర నిర్వహించి, భద్రకాళి అమ్మవారిని దర్శించుకొని.. ఆర్ట్స్ కాలేజీ మైదానానికి చేరుకోవాలని బండి సంజయ్ ఆలోచన. అదే సమయంలో అక్కడికి చేరుకోనున్న జె.పి. నడ్డాకు ఘనంగా ఆహ్వానం పలికేందుకు ఏర్పాట్లు చేశారు. ఇప్పటికే 50 శాతం పనులు పూర్తి చేసినట్లు తెలుస్తోంది. సభ ఏర్పాట్లను మాజీ ఎంపీ జితేందర్ రెడ్డి, వరంగల్ జిల్లా అధ్యక్షురాలు పద్మారెడ్డి పరిశీలించారు. ఈ సభా వేదికగా భారీగా చేరికలు కూడా ఉన్నట్లు తెలుస్తోంది. ఇలాంటి సమయంలో సభకు 40 గంటల ముందు ఆర్ట్స్ కాలేజీ తీసుకున్న నిర్ణయం ప్రాధాన్యం సంతరించుకుంది. ఈ నేపథ్యంలో మరో వేదికను ఎంచుకొని సభ నిర్వహిస్తారా? వాయిదా వేస్తారా అనే సందిగ్ధత నెలకొంది.

Related Articles

Back to top button