Bigg Boss Telugu 7 TRP: గతేడాది దారుణం.. ఈ ఏడాది అద్భుతం.. ఉల్టా పుల్టా! – bigg boss telugu 7 grand launch episode achieved the highest trp rating
గతేడాదితో పోలిస్తే భారీ తేడా
బిగ్ బాస్ సీజన్ 6 లాంఛింగ్ ఎపిసోడ్ తెలుగు బిగ్ బాస్ చరిత్రలోనే తక్కువ టీవీఆర్‌ను (TRP Rating) నమోదు చేసింది. గతేడాది సెప్టెంబర్ 4వ తేదీ ఆదివారం నాడు ప్రసారమైన బిగ్ బాస్ సీజన్ 6 లాంఛింగ్ ఎపిసోడ్ కేవలం 8.86 టీవీఆర్‌ను మాత్రమే సాధించింది. గత ఐదు సీజన్ల లాంఛింగ్ ఎపిసోడ్లతో పోలిస్తే 6వ సీజన్‌కే అతి తక్కువ టీవీఆర్ రావడం గమనార్హం. అయితే, బిగ్ బాస్ సీజన్ 7కు వచ్చే సరికి సీన్ మారిపోయింది. ఏకంగా 18.1 టీవీఆర్‌తో బిగ్ బాస్ సీజన్ 7 లాంఛింగ్ ఎపిసోడ్ అదరగొట్టింది. తెలుగు బిగ్ బాస్ చరిత్రలో లాంఛింగ్ ఎపిసోడ్‌కి నాలుగో సీజన్ తరవాత అత్యధిక టీవీఆర్ రావడం ఇదే.
జూనియర్ ఎన్టీఆర్ హోస్ట్‌గా వ్యవహరించిన బిగ్ బాస్ మొదటి సీజన్ లాంఛింగ్ ఎపిసోడ్‌కి 16.18 టీవీఆర్ రాగా.. నాని హోస్ట్ చేసిన రెండో సీజన్ 15.05 టీవీఆర్ సొంతం చేసుకుంది. ఇక అక్కినేని నాగార్జున రంగంలోకి దిగి మూడో సీజన్ లాంఛింగ్ ఎపిసోడ్‌కు 17.9 టీవీఆర్ రాబట్టారు. నాలుగో సీజన్ 18.5 టీవీఆర్‌తో అదరగొట్టింది. బిగ్ బాస్ హిస్టరీలో లాంఛింగ్ ఎపిసోడ్‌కు ఇదే అత్యధిక టీవీఆర్. ఇక ఐదో సీజన్ కూడా 18 టీవీఆర్‌తో సత్తా చాటింది. కానీ, ఆరో సీజన్ మాత్రం దారుణంగా 8.86 టీవీఆర్ సాధించి నిరాశపరిచింది. ఇప్పుడు మళ్లీ ఏడో సీజన్ లాంఛింగ్ ఎపిసోడ్‌కు 18.1 టీవీఆర్ రావడంతో బిగ్ బాస్ షోకు పూర్వ వైభవం వచ్చినట్టయ్యింది.
ఈ 7వ సీజన్ లాంఛింగ్ ఎపిసోడ్‌ని సుమారు 3 కోట్ల మంది ప్రేక్షకులు చూడడం విశేషం. దీంతో గతంలో క్రికెట్ మ్యాచ్‌లకు నమోదైన వ్యూయర్‌షిప్ రికార్డులను సైతం తెలుగులో ‘బిగ్ బాస్ సీజన్ 7’ అధిగమించడం విశేషం. గత సీజన్‌తో పోలిస్తే ఈ సీజన్ వ్యూయర్‌షిప్ 40 శాతం అధిక రేటింగ్‌తో దూసుకుపోతోందని స్టార్ మా పేర్కొంది. ఈ సీజన్ ‘ఉల్టా పుల్టా’గా ఉండబోతోంది అని కింగ్ నాగార్జున ప్రోమోలో చెప్పిన నాటి నుంచి విపరీతమైన అంచనాలు పెరిగాయి. ఆ అంచనాలు ఈ గణాంకాలలో కనిపిస్తున్నాయి. ‘బిగ్ బాస్ సీజన్ 7’ వీకెండ్ ఎపిసోడ్‌కు సుమారు 7.1 టీవీఆర్ రాగా.. హైదరాబాద్‌లో అత్యధికంగా 8.7 టీవీఆర్ రావడం విశేషం.
