News

bhopal bus conductor, Bhopal: కండక్టర్‌‌కు చుక్కలు చూపించిన ప్రయాణికుడు… రూ.5ల కోసం వీర బాదుడు – bus conductor thrashed by passenger in bhopal of madhya pradesh


Authored by Andaluri Veni | Samayam Telugu | Updated: Sep 15, 2022, 1:00 PM

మధ్యప్రదేశ్‌లో భోపాల్‌ (Bhopal) బస్సులో రగడ చోటుచేసుకుంది. ఒక స్టాప్‌లో ఎక్కిన ప్రయాణికుడి దగ్గర అదనపు ఛార్జ్ కోసం కండక్టర్ పట్టుబట్టాడు. దాంతో ప్రయాణికుడికి విపరీతమైన కోపం వచ్చింది. దాంతో కండక్టర్‌తో గొడవకు దిగాడు. ఏకంగా పిచ్చకొట్టుడు కొట్టాడు. అక్కడున్న తోటి ప్రయాణికులు అతనిని వారించేందుకు ప్రయత్నించారు. కానీ ఫలితం లేకపోయింది. కొట్టిన తర్వాత ఆ ప్రయాణికుడు బస్సు దిగి వెళ్లిపోయాడు. అయితే దీనికి సంబంధించిన దృశ్యాలు సీసీ టీవీ ఫుటేజీలో రికార్డ్ అయింది. ఆ వీడియో వైరల్ అవుతుంది.

 

ప్రధానాంశాలు:

  • బస్సులో అదనపు ఛార్జ్ అడిగిన కండక్టర్
  • కోపంతో కండక్టర్‌పై దాడి చేసిన ఎన్‌సీసీ క్యాడెట్‌
  • పోలీసులకు ఫిర్యాదు చేసిన రవాణా శాఖ
Bhopal: బస్సులు ఎక్కితే.. కండక్టర్లు దగ్గర చిల్లర దక్కించుకోవడం చాలా కష్టమైన పని. ప్రయాణికులు చిల్లర ఇవ్వకపోతే.. రూపాయి, రెండు రూపాయలను మరిచిపోవాల్సిందే. అంతేకాకుండా ఈ మధ్య బస్సు ఛార్జీలు దారుణం పెరిగాయి. అసలు ఏ స్టాప్ నుంచి ఎంత తీసుకుంటున్నారో కూడా తెలియనంతగా పెరిగాయి. దాంతో ఇప్పటికే బస్సులు ఎక్కేకంటే.. ఆటో ఎక్కడమే బెటర్ అని ప్రయాణికులు భావిస్తున్నారు. ప్రభుత్వ రవాణా వ్యవస్థపై అసహనంతో ఉన్నారు. అలాంటిది ఓ కండక్టర్ (Bus conductor) అదనపు ఛార్జీలు వసూలు చేసేందుకు ప్రయత్నించాడు. దాంతో ప్రయాణికుడు.. కండక్టర్‌ను చితకబాదాడు. ఈ ఘటన మధ్యప్రదేశ్‌లో (Madhya Pradesh) జరిగింది.

భోపాల్లో ఓ వ్యక్తి మంగళవారం ఉదయం పోలీస్ హెడ్‌ క్వార్టర్స్ బస్టాప్ దగ్గర బస్సు ఎక్కాడు. తాను దిగాల్సిన స్టాప్‌కు పది రూపాయలే టికెట్. కానీ కండక్టర్ మాత్రం ముందు స్టాప్ నుంచి టికెట్ కొట్టి.. మరో ఐదు రూపాయలు ఎక్కువగా వసూలు చేసే ప్రయత్నం చేశాడు. ఎన్‌సీసీ క్యాడెట్‌కు చెందిన ఆ ప్రయాణికుడు.. ఎక్కువ ఛార్జ్‌ చేయడంపై ప్రశ్నించాడు. అదనంగా రూ.5లు ఇచ్చే ప్రసక్తే లేదని తేల్చి చెప్పాడు. కానీ కండక్టర్ వదల్లేదు. ఐదు రూపాయలు ఇవ్వాలని లేదంటే దిగిపోవాలని గట్టిగా చెప్పాడు.

దాంతో ఆ ప్రయాణికుడికి విపరీతమైన కోపం వచ్చింది. ఆ ఆగ్రహంతో కండక్టర్‌ను ఓ చూపు చూశాడు. అందరూ ముందు ఓ లెవల్లో చితక బాదేశాడు. అయితే బస్సులో ఉండే ఇతర ప్రయాణికులు అతనిని ఆపేందుకు ప్రయత్నం చేశారు. కానీ ఫలితం లేకపోయింది. అయితే కండక్టర్‌‌ను కొట్టిన తర్వాత ఆ ప్రయాణికుడు బస్సు దిగిపోయాడు. ఆ వెనకాలే కండక్టర్ పరుగులు తీశాడు. ఇదంతా సీసీ టీవీ ఫుటేజీలో రికార్డ్ అయింది. ఈ వీడియో సోషల్ మీడియాలో చక్కర్లు కొడుతుంది. దీనిపై నెటిజన్లు మిశ్రమంగా స్పందిస్తున్నారు. మరోవైపు ఈ చర్యపై రవాణా శాఖ పోలీసులను ఆశ్రయించింది. ఆ ప్రయాణికుడిపై పోలీసులకు ఫిర్యాదు చేశారు. అతనిపై చర్యలు తీసుకోవాలని కోరింది.

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.

Related Articles

Back to top button