News

balakrishna, Veera Simha Reddy: రాజసం నీ ఇంటిపేరు.. జై బాలయ్య.. అప్‌డేట్ అదిరిందయ్యా! – balakrishna veera simha reddy first song jai balayya on november 25th


నటసింహా నందమూరి బాలకృష్ణ (Balakrishna) అభిమానులకు ఉత్సహాన్నిచ్చే వార్త ఇది. నందమూరి అభిమానులు ఎప్పుడెప్పుడా అని ఎదురుచూస్తోన్న అప్‌డేట్ వచ్చేసింది. బాలయ్య హీరోగా రూపొందుతోన్న ‘వీరసింహారెడ్డి’ (Veera Simha Reddy) సినిమా నుంచి తొలిపాట రాబోతోంది. ‘జై బాలయ్య’ అంటూ సాగే ఈ పాటను నవంబర్ 25న విడుదల చేయనున్నట్టు నిర్మాణ సంస్థ మైత్రీ మూవీ మేకర్స్ ప్రకటించింది.

గోప్‌చంద్ మలినేని దర్శకత్వంలో మైత్రీ మూవీ మేకర్స్ పతాకంపై ప్రతిష్టాత్మకంగా తెరకెక్కుతున్న ‘వీరసింహారెడ్డి’ చిత్రం సంక్రాంతికి ప్రేక్షకుల ముందుకు రావడానికి సిద్ధమవుతోంది. ఈ సినిమా షూటింగ్ ప్రస్తుతం హైదరాబాద్‌‌లో జరుగుతోంది. నిర్మాతలు ఈ సినిమా గురించి ఎప్పటికప్పుడు అప్‌డేట్‌ ఇస్తూ సినిమాపై అంచనాలను పెంచుతున్నారు. అయితే, ఇప్పుడు మ్యూజికల్ ప్రమోషన్స్ షురూ చేయడానికి అంతా సిద్ధం చేశారు. ‘వీరసింహారెడ్డి’ ఫస్ట్ సింగిల్ ‘జై బాలయ్య’ నవంబర్ 25న ఉదయం 10:29 గంటలకు విడుదల కానుంది.

ఈ సందర్భంగా ‘రాజసం నీ ఇంటి పేరు’ అని పేర్కొంటూ నిర్మాతలు ఒక పోస్టర్‌ను విడుదల చేశారు. ఈ పోస్టర్‌లో బాలకృష్ణ లుక్ ఫ్యాన్స్‌ను మంత్రముగ్ధుల్ని చేసేలా ఉంది. వైట్ అండ్ వైట్ డ్రెస్‌లో ట్రాక్టర్ నడుపుతూ రాయల్‌గా కనిపించారు బాలకృష్ణ. ‘సమరసింహారెడ్డి’ టైమ్‌లో బాలయ్యలా కనిపిస్తున్నారు. ఈ పోస్టర్ ప్రస్తుతం సోషల్ మీడియాలో వైరల్ అవుతోంది.

ప్రస్తుతం బయట ఎక్కడ చూసినా ‘జై బాలయ్య’ నినాదమే. సమయం ఏదైనా, సందర్భం ఏదైనా ‘జై బాలయ్య’ నినాదం మోగిందంటే అక్కడ అంతా సందడే. ఇదే నినాదంతో సంగీత దర్శకుడు తమన్ ఇప్పటికే ఒక పాట కంపోజ్ చేశారు. ‘అఖండ’లో ఆయన కంపోజ్ చేసిన ‘యా యా యా జై బాలయ్య’ సాంగ్ ఎంత పాపులర్ అయ్యిందో అందరికీ తెలిసిందే. ఇప్పుడు అదే నినాదంతో మరో మాస్ నంబర్‌ను తమన్ కంపోజ్ చేశారు. ఇది నందమూరి అభిమానులకు మరో బొనాంజా అని చెప్పుకోవచ్చు. రేపు పాట విడుదలైన తరవాత మోత మోగిపోవడం ఖాయం.

ఈ సినిమాలో బాలకృష్ణ సరసన శృతి హాసన్ కథానాయికగా నటిస్తున్నారు. కన్నడ నటుడు దునియా విజయ్ ప్రతినాయకుడి పాత్రను పోషిస్తున్నారు. తమిళ చిరుత వరలక్ష్మీ శరత్‌కుమార్ కీలక పాత్రలో కనిపించనున్నారు. రిషి పంజాబీ సినిమాటోగ్రఫీ అందిస్తున్న ఈ సినిమాకు సాయి మాధవ్ బుర్రా మాటలు అందిస్తున్నారు. గతంలో ‘గౌతమీపుత్ర శాతకర్ణి’ సినిమాకు సాయి మాధవ్ డైలాగులు రాశారు. అవి ఎంత పాపులర్ అయ్యాయో ప్రత్యేకంగా చెప్పాల్సిన అవసరం లేదు. ఇప్పుడు మరొకసారి బాలయ్య నోట సాయి మాధవ్ బుర్రా పవర్‌ఫుల్ డైలాగులు పలకబోతున్నాయి.

ఒక వైపు చిరంజీవితో ‘వాల్తేరు వీరయ్య’ సినిమాను తెరకెక్కిస్తోన్న మైత్రీ మూవీ మేకర్స్ నిర్మాతలు నవీన్ యెర్నేని, వై.రవిశంకర్.. ఇంకోవైపు ‘వీరసింహారెడ్డి’నీ రూపొందిస్తున్నారు. ఈ రెండు సినిమాలూ సంక్రాంతి రేసులో నిలవబోతున్నాయి. ‘వీరసింహారెడ్డి’కి రామ్-లక్ష్మణ్ మాస్టర్లు ఫైట్లు కంపోజ్ చేస్తున్నారు. అంటే, వెండితెరపై మళ్లీ దడిబిదిబిడే. ఈ సినిమాకు కథ, స్క్రీన్‌ప్లే, దర్శకత్వం గోపీచంద్ మలినేని.

  • Read more Cinema News and Telugu News

Related Articles

Back to top button