News

axar patel, IND vs SL: అక్షర్ పటేల్ అద్బుత బ్యాటింగ్.. చిత్తుగా ఓడాల్సిన మ్యాచ్‌లో పోరాడి ఓడిన భారత్ – axar patel half century in vain, sri lanka beat india by 16 runs in second t20i


పుణే వేదికగా శ్రీలంకతో జరిగిన రెండో వన్డేలో భారత్ పోరాడి ఓడింది. 207 పరుగుల లక్ష్యంలో బరిలోకి దిగిన టీమిండియా.. 20 ఓవర్లలో 8 వికెట్ల నష్టానికి 190 పరుగులకే పరిమితమైంది. ఓ దశలో 9.1 ఓవర్లలో 57 పరుగులకే 5 వికెట్లు కోల్పోయి పీకల్లోతు కష్టాల్లో పడిన టీమిండియాను దశలో అక్షర్ పటేల్ (31 బంతుల్లో 65), సూర్యకుమార్ యాదవ్ (36 బంతుల్లో 51) ఆదుకున్నారు. లంక బౌలర్లపై ఎదురు దాడికి దిగిన వీరిద్దరూ 40 బంతుల్లోనే 91 పరుగులు జోడించడంతో భారత్ రేసులోకి వచ్చింది. సూర్య ఔటయ్యే సమయానికి భారత్ 15.5 ఓవర్లో 148/6తో నిలిచింది. యువ ఆటగాడు శివమ్ మావి 18వ ఓవర్లో 6,4,6 బాదడంతో.. ఆఖరి రెండు ఓవర్లో భారత్ విజయానికి 33 పరుగులు అవసరమయ్యాయి.

19వ ఓవర్లో రజిత 12 పరగులు ఇవ్వడంతో.. చివరి ఓవర్లో టీమిండియా విజయానికి 21 పరుగులు అవసరమయ్యాయి. 19 ఓవర్లు ముగిసే సరికి భారత్‌‌తోపాటు శ్రీలంక కూడా 186/6గా నిలవడం విశేషం. ఆఖరి ఓవర్లో అక్షర్ పటేల్ సిక్సర్‌కు యత్నించి ఔట్ కావడంతో భారత్ విజయానికి 17 పరుగుల దూరంలో నిలిచింది.

టాప్ ఆర్డర్ విఫలం..
భారీ లక్ష్యంతో బరిలోకి దిగిన భారత్‌‌కు పేలవ ఆరంభం లభించింది. ఇన్నింగ్స్ రెండో ఓవర్ తొలి బంతికే ఇషాన్ కిషన్‌ను ఔట్ చేసిన కసున్ రజిత.. చివరి బంతికి శుభ్‌మన్ గిల్‌ పెవిలియన్ చేర్చాడు. తర్వాతి బంతికే రాహుల్ త్రిపాఠి‌ని మదుషంక ఔట్ చేయడంతో భారత్ 21 పరుగులకే 3 వికెట్లు కోల్పోయింది. ఈ దశలో హార్దిక్ పాండ్య (12), సూర్యకుమార్ యాదవ్‌తో కలిసి ఇన్నింగ్స్‌ను చక్కదిద్దే ప్రయత్నం చేశాడు. కానీ ఐదో ఓవర్లో కీపర్‌కు క్యాచ్ ఇచ్చిన హార్దిక్ ఔటయ్యాడు. దీంతో పవర్ ప్లే ముగిసే సమయానికి భారత్ 39 పరుగులకే 4 వికెట్లు కోల్పోయి కష్టాల్లో పడింది. దీపక్ హుడా (12 బంతుల్లో 9) సైతం ఒత్తిడిలో ఔట్ కావడంతో.. భారత్ 9.1 ఓవర్లలో 57 పరుగులకే సగం వికెట్లను చేజార్చుకుంది.

ఈ దశలో అక్షర్ పటేల్, సూర్యకుమార్ యాదవ్ శ్రీలంక బౌలర్లపై ఎదురు దాడికి దిగారు. ముఖ్యంగా అక్షర్ పటేల్ సిక్సర్లతోనే డీల్ చేశాడు. హసరంగ వేసిన ఇన్నింగ్స్ 14వ ఓవర్లో అక్షర్ పటేల్ హ్యాట్రిక్ సిక్స్‌లు బాదాడు. సూర్యకుమార్ యాదవ్ కూడా ఓ సిక్స్ బాదడంతో.. ఆ ఓవర్లో 26 పరుగులొచ్చాయి. ఇదే దూకుడు కొనసాగించిన అక్షర్ 20 బంతుల్లోనే హాఫ్ సెంచరీ పూర్తి చేసుకున్నాడు. దీంతో 11-15 ఓవర్ల మధ్య భారత్ 75 పరుగులు రాబట్టడంతో మ్యాచ్ ఆసక్తికరంగా మారింది.

మరో ఎండ్‌లో ఆచితూచి బ్యాటింగ్ చేసిన సూర్య సైతం అక్షర్‌ను చూసి దూకుడు పెంచాడు. 15.1వ ఓవరలో సిక్స్ బాది 33 బంతుల్లో హాఫ్ సెంచరీ పూర్తి చేసుకున్న సూర్య (36 బంతుల్లో 51) అదే ఓవర్లో మరో సిక్స్‌కు యత్నించి ఔటయ్యాడు. సూర్య స్థానంలో బ్యాటింగ్‌కు దిగిన శివమ్ మావి (15 బంతుల్లో 26) బ్యాట్‌తోనూ ఆకట్టుకునే ప్రదర్శన చేయడంతో భారత్ చివరి ఓవర్ వరకు విజయం కోసం ప్రయత్నించింది.

లంక బ్యాటర్ల వీరవిహారం..
అంతకు ముందు టాస్ ఓడి ముందు బ్యాటింగ్ చేసిన శ్రీలంక 20 ఓవర్లలో 6 వికెట్ల నష్టానికి 206 పరుగులు చేసింది. ఓపెనర్లు నిస్సంక, కుశాల్ మెండిస్ (52) తొలి వికెట్‌కు 8.1 ఓవర్లలోనే 80 పరుగులు జోడించి భారీ స్కోరుకు బాటలు వేశారు. మెండిస్‌ను ఔట్ చేసిన చాహల్ భారత్‌కు బ్రేక్ ఇవ్వగా.. కాసేపటికే రాజపక్సేను ఉమ్రాన్ బౌల్డ్ చేశాడు. ధనంజయ డిసిల్వా నిరాశపర్చాడు. కానీ అసలంక (19 బంతుల్లో 37) దూకుడుగా ఆడాడు. ఆఖర్లో కెప్టెన్ షనక (22 బంతుల్లో 56 నాటౌట్) మెరుపులు మెరిపించడంతో శ్రీలంక 200 పరుగులు దాటింది. షనక విధ్వంసంతో చివరి 3 ఓవర్లలోనే లంక 59 పరుగులు రాబట్టింది. 2010 జనవరి తర్వాత శ్రీలంక భారత్‌పై టీ20ల్లో 200కిపైగా పరుగులు చేయడం ఇదే తొలిసారి కావడం గమనార్హం. ఈ మ్యాచ్‌లో భారత బౌలర్లు 7 నోబాల్స్ వేయడం మైనస్‌గా మారింది.

Read More Sports News And Telugu News

Advertisement

Related Articles

Back to top button