ap jio 5g cities, ఏపీలో మరో 2 నగరాల్లో జియో 5G సేవలు.. అందరికీ వెల్‌కమ్ ఆఫర్‌! – reliance jio starts 5g services in tirupati and nellore

దేశంలో ప్రముఖ టెలికాం నెట్‌వర్క్ రిలయన్స్ జియో 5జీ సేవల విషయంలో దూకుడు చూపిస్తోంది. సోమవారం దేశవ్యాప్తంగా మరో 10 నగరాల్లో ట్రూ 5జీ సేవలను ప్రారంభించింది. ఇక, ఆంధ్రప్రదేశ్‌లోని తిరుపతి, నెల్లూరు పట్టణాల్లో సోమవారం లాంఛనంగా తన సేవలను ప్రారంభిస్తున్నట్లు జియో ప్రకటించింది. ఇప్పటికే తిరుమ‌ల‌, విశాఖ‌ప‌ట్నం, విజ‌య‌వాడ‌, గుంటూరు పట్టణాల్లో రిల‌య‌న్స్ జియో త‌న ట్రూ 5జీ సేవ‌ల‌ను లాంచ్‌ చేసిన సంగతి తెలిసిందే. తాజాగా, మరో రెండు నగరాలకు విస్తరించింది.

అలాగే, ఉత్తరప్రదేశ్‌లోని ఆగ్రా, కాన్పూర్, మీరట్, ప్రయాగ్‌రాజ్, కేరళలోని కోజికోడ్, త్రిసూర్‌తో పాటు నాగ్‌పూర్ వంటి మొత్తం 10 నగరాల్లో సోమవారం జియో ట్రూ 5జీ సేవలు ప్రారంభించింది. దీంతో రిలయన్స్ జియో అత్యధికంగా 5జీ సేవలను ప్రారంభించిన ఆపరేటర్‌గా ఎయిర్‌టెల్‌ను అధిగమించింది.

ఇక, 10 నగరాల్లోని జియో వినియోగదారులు సోమవారం నుంచి ఎలాంటి అదనపు ఖర్చు లేకుండా గరిష్టంగా 1 జీబీపీఎస్‌+ వేగంతో అపరిమిత డేటాను పొందేందుకు జియో వెల్‌కమ్ ఆఫర్‌కు ఆహ్వానిస్తోంది. ఈ సేవలపై జియో ప్రతినిధి మాట్లాడుతూ.. 4 రాష్ట్రాల్లోని ఈ 10 నగరాల్లో జియో ట్రూ 5జీ సేవలను అందుబాటులోకి తీసుకొస్తున్నట్లు తెలిపారు. కొత్త సంవత్సరం 2023లో ప్రతి జియో వినియోగదారుడికి 5జీ ప్రయోజనాలను అందించాలని భావిస్తున్నట్లు చెప్పారు. కాబట్టి తాము దేశవ్యాప్తంగా 5జీ రోల్‌ అవుట్ వేగాన్ని పెంచుతామన్నారు.

కొత్తగా 5 జీ సేవలు ప్రారంభించిన నగరాలు దేశంలోనే ముఖ్యమైన పర్యాటక, వాణిజ్య గమ్యస్థానాలు అని.. ముఖ్యమైన విద్యా కేంద్రాలని జియో ప్రతినిధి తెలిపారు. దీంతో ఈ ప్రాంతంలోని వినియోగదారులు ఉత్తమ టెలీకమ్యూనికేషన్ నెట్‌వర్క్‌ను పొందుతారని పేర్కొన్నారు.