Andrey Botikov: కరోనా వ్యాక్సిన్‌ను కనిపెట్టిన శాస్త్రవేత్త హత్య.. ఇంట్లోకి దూరి బెల్ట్ సాయంతో..

రష్యా టాప్ సైంటిస్ట్, కోవిడ్ వ్యాక్సిన్ ‘స్పుత్నిక్ వి’ తయారీలో కీలక పాత్ర పోషించిన హత్యకు గురయ్యారు. మాస్కోలోని తన అపార్ట్‌మెంట్‌లో గురువారం ఆయన విగత జీవిగా కనిపించారు. 47 ఏళ్ల బొటికోవ్‌ను బెల్ట్‌తో ఊపిరి ఆడకుండా చేసి ఆయన్ను చంపేశారని రష్యన్ మీడియా సంస్థలు వెల్లడించాయి. గమలేయా నేషనల్ రీసెర్చ్ సెంటర్ ఫర్ ఎకాలజీ అండ్ మ్యాథమేటిక్స్‌లో ఆయన సీనియర్ రీసెర్చర్‌గా పని చేశారు. ప్రపంచంలోనే తొలి కోవిడ్ వ్యాక్సిన్‌ను తయారు చేసినందుకు గానూ 2021లో రష్యా అధ్యక్షుడు వ్లాదిమిర్ పుతిన్ చేతుల మీదుగా ‘ఆర్డర్ ఆఫ్ ది మెరిట్ ఫర్ ది ఫాదర్ లాండ్ అవార్డ్’ను బొటికోవ్ అందుకున్నారు. 2020లో స్పుత్నిక్ వ్యాక్సిన్‌ను అభివృద్ధి చేసిన 18 మంది శాస్త్రవేత్తల్లో బొటికోవ్ ఒకరు. వైరాలజిస్ట్ మరణాన్ని దర్యాప్తు చేస్తున్న రష్యా దర్యాప్తు సంస్థ.. ఆయనది హత్యేనని నిర్ధారించింది. బొటికోవ్‌తో గొడవ పడిన 29 ఏళ్ల యువకుడు బెల్ట్‌ను ఆయన మెడకు బిగించి హత్య చేసి పరారయ్యాడని దర్యాప్తు అధికారులు తెలిపారు. ఘర్షణ కారణంగానే ఈ హత్య జరిగిందని లా ఎన్‌ఫోర్స్‌మెంట్ ఏజెన్సీలు తెలిపాయి. బొటికోవ్ డెడ్ బాడీని గుర్తించిన గంటల వ్యవధిలోనే అనుమానితుణ్ని అదుపులోకి తీసుకున్నారు. ఇంటెరాగేషన్ సమయంలో హత్య తానే చేసినట్లు ఆ యువకుడు అంగీకరించాడు. అతడికి నేర చరిత్ర ఉందని సమాచారం. అతణ్ని కస్టడీలోకి తీసుకోవడానికి విచారణ అధికారులు కోర్టులో పిటిషన్ దాఖలు చేయనున్నారు.