News

aindrila sharma, యువ నటి మృతి.. పాదాలను ముద్దాడి కన్నీటి వీడ్కోలు పలికిన నటుడు – aindrila sharma boyfriend sabyasachi chowdhury kisses her feet at funeral


మన మనసుకు బాగా దగ్గరైనవాళ్లు ఇక మనకు కనిపించరు అనే విషయాన్ని జీర్ణించుకోవడం ఎవరికైనా చాలా కష్టం. ఇక వాళ్లు లేరు, తిరిగి రారు అన్న ఆలోచన మనల్ని డిప్రెషన్‌లోకి నెట్టేస్తుంది. ప్రస్తుతం బెంగాలీ నటుడు సబ్యసాచి చౌదరి పరిస్థితి అలాంటిదే. తాను ప్రేమించిన అమ్మాయి ఈ లోకాన్ని విడిచిపెట్టి వెళ్లిపోయిందన్న బాధను ఆయన తట్టుకోలేకపోతున్నారు. ప్రేయసి మరణం తరవాత ఆయన ఎంతలా కుంగిపోతున్నారో మాటల్లో చెప్పలేం.

బెంగాలీ యువ నటి ఐండ్రిలా శర్మ (Aindrila Sharma) ఆదివారం కన్నుమూశారు. బ్రెయిన్ స్ట్రోక్‌తో కొన్ని రోజుల క్రితం హౌరాలోని ఓ ప్రైవేటు ఆసుపత్రిలో చేరిన ఐండ్రిలా.. అక్కడ చికిత్స పొందుతూ తుదిశ్వాస విడిచారు. చికిత్స తీసుకుంటున్న సమయంలో ఆమెకు పలుమార్లు గుండెపోటు వచ్చింది. అయితే, ఆదివారం మధ్యాహ్నం మరోసారి తీవ్ర గుండెపోటు రావడంతో ఐండ్రిలా మృతి చెందారు. అయితే, ఐండ్రిలా ఆసుపత్రిలో చేరినప్పటి నుంచీ ఆమె కోసం ప్రార్థించాలని ప్రియుడు సబ్యసాచి చౌదరి సోషల్ మీడియా ద్వారా అందరినీ కోరారు. ఆయన కూడా దేవుడిని ప్రార్థిస్తూ పోస్టులు పెట్టారు. అయితే, ఆ ప్రార్థనలేవీ ఫలించలేదు. క్యాన్సర్ నుంచి రెండు సార్లు కోలుకున్న ఐండ్రిలా.. 24 ఏళ్ల వయసులో బ్రెయిన్ స్ట్రోక్, గుండెపోటుకు గురై చనిపోయారు.

ఐండ్రిలా అకాల మరణంతో ఆమె కుటుంబ సభ్యులు, ప్రియుడు సబ్యసాచి చౌదరి తీవ్ర విషాదంలో కూరుకుపోయారు. బెంగాలీ సినీ పరిశ్రమ, టీవీ పరిశ్రమలు తీవ్ర దిగ్భ్రాంతి వ్యక్తం చేశాయి. ఇక, ఐండ్రిలా అంత్యక్రియలను ఆదివారం సాయంత్రం కుటుంబ సభ్యులు నిర్వహించారు. ఈ అంత్యక్రియల్లో ఆమె ప్రియుడు, నటుడు సబ్యసాచి చౌదరి కూడా పాల్గొన్నారు. తాను ప్రాణంగా ప్రేమించిన అమ్మాయి అచేతనంగా పడి ఉండటాన్ని చూసి సబ్యసాచి తట్టుకోలేకపోయారు. ప్రేయసి పాదాలను ముద్దాడి.. ఆమె పాదాలపై తన తల ఉంచి కన్నీటిపర్యంతమయ్యారు. సంప్రదాయం ప్రకారం అంత్యక్రియల్లో తాను చేయాల్సినవన్నీ చేశారు. ప్రస్తుతం ఆ ఎమోషనల్ వీడియో సోషల్ మీడియాలో వైరల్‌గా మారింది.

ప్రేయసి హఠాన్మరణంలో తీవ్ర విషాదంలోకి వెళ్లిపోయిన సబ్యసాచి చౌదరి.. సోషల్ మీడియాకు కూడా దూరంగా ఉండాలని నిర్ణయించుకున్నారు. అందుకే తన ఫేస్‌బుక్, ఇన్‌స్టాగ్రామ్ అకౌంట్లను డిలీట్ చేసేశారు. ఐండ్రిలా, సబ్యసాచి కలిసి పలు టీవీ సీరియల్స్‌లో నటించారు. అలాగే, ఇటీవల ఓటీటీలోకి అడుగుపెట్టిన ఐండ్రిలా ‘భగర్’ అనే వెబ్ సిరీస్ చేశారు. ఈ వెబ్ సిరీస్‌లో సబ్యసాచి చౌదరి కూడా నటించారు. ఇక ‘అమి దీదీ నెం.1’, ‘లవ్ కేఫ్’ లాంటి సినిమాల్లోనూ ఐండ్రిలా నటించారు. ఐండ్రిలా మృతికి బెంగాలీ సినీ పరిశ్రమకు చెందిన పలువురు ప్రముఖులు సోషల్ మీడియా ద్వారా సంతాపం తెలియజేశారు.

Related Articles

Back to top button