News
హెల్త్ వర్సిటీకి ఎన్టీఆర్ పేరును తొలగించడంపై నందమూరి ఫ్యామిలీ సీరియస్
విజయవాడలోని ‘ఎన్టీఆర్ హెల్త్ యూనివర్సిటీ’ పేరును వైఎస్సార్ ఆరోగ్య విశ్వవిద్యాలయంగా మార్చుతూ జగన్ ప్రభుత్వం తీసుకున్న నిర్ణయంపై నందమూరి కుటుంబం తీవ్ర అసహనం వ్యక్తం చేసింది. ఎన్టీఆర్ హెల్త్ వర్సిటీ పేరు మార్పుపై.. నందమూరి రామకృష్ణ పేరుతో బుధవారం నందమూరి కుటుంబం ప్రెస్ నోట్ విడుదల చేసింది.
హెల్త్ వర్సిటీకి ఎన్టీఆర్ పేరును తొలగించడాన్ని ఖండిస్తున్నామని పేర్కొన్నారు. హెల్త్ యూనివర్సిటీ వ్యవస్థాపకుడు ఎన్టీఆర్ అని.. 1986లో ఎన్టీఆర్ హెల్త్ వర్సిటీని స్థాపించారని గుర్తు చేశారు. 1998లో అప్పటి ముఖ్యమంత్రి చంద్రబాబునాయుడు ఆ వర్సిటీకి ఎన్టీఆర్ ఆరోగ్య విశ్వవిద్యాలయంగా పేరు పెట్టారని తెలిపారు.
దివంగత ముఖ్యమంత్రి వైఎస్ రాజశేఖరరెడ్డి ముఖ్యమంత్రిగా ఉన్నప్పుడు ఎన్టీఆర్‌పై గౌరవంతో ‘డాక్టర్’ ఎన్టీఆర్ మెడికల్ హెల్త్ వర్సిటీగా నామకరణం చేశారని నందమూరి రామకృష్ణ గుర్తు చేశారు. కానీ, ఆ పేరును నేడు జగన్మోహన్ రెడ్డి మార్చడం దురదృష్టకరమని అసంతృప్తి వ్యక్తం చేశారు. ఎన్టీఆర్ పేరును తొలగించడమంటే.. తెలుగు జాతిని అవమానించినట్లేనని దుయ్యబట్టారు. హెల్త్ వర్సిటీకి ఎన్టీఆర్ పేరును కొనసాగించాలని డిమాండ్ చేశారు.
