News

సర్ఫరాజ్-షకీల్ అద్భుత పోరాటం.. పాక్, కివీస్‌తో దోబూచులాడిన విజయం.. కరాచీ టెస్ట్ డ్రా!



కరాచీ వేదికగా పాకిస్థాన్, న్యూజిలాండ్ మధ్య జరిగిన రెండో టెస్ట్ డ్రాగా ముగిసింది. విజయం కోసం ఇరు జట్లు తీవ్రంగా పోరాడినప్పటికీ.. మ్యాచ్ ఫలితం తేలకుండానే ముగిసింది. ఆఖరి సెషన్లో చివరి 21 బంతుల్లో పాక్ విజయానికి 32 పరుగులు అవసరం కాగా.. కివీస్ విజయానికి ఒక వికెట్ దూరంలో నిలిచాయి. వికెట్ ఇవ్వకుండా న్యూజిలాండ్ బౌలర్లను కాచుకున్న పాక్ చివరి వరుస బ్యాటర్లు మ్యాచ్‌ను డ్రాగా ముగించగలిగారు.

తొలి ఇన్నింగ్స్‌లో న్యూజిలాండ్ 449 పరుగులు చేయగా.. పాకిస్థాన్ 408 పరుగులకు ఆలౌటయ్యింది. 5 వికెట్ల నష్టానికి 277 పరుగుల వద్ద రెండో ఇన్నింగ్స్ డిక్లేర్ చేసిన కివీస్.. పాక్ ముందు 319 పరుగుల లక్ష్యాన్ని ఉంచింది. నాలుగో రోజు చివరి సెషన్లో 2.5 ఓవర్లు బ్యాటింగ్ చేసిన పాకిస్థాన్ పరుగులేమీ చేయకుండానే 2 వికెట్లు కోల్పోయింది. దీంతో ఐదో రోజు న్యూజిలాండ్ ఫేవరేట్‌గా బరిలోకి దిగింది.

మొదటి గంటలోనే ఇమామ్ ఉల్ హక్ (12)ను ఇష్ సోధీ ఔట్ చేయడంతో పాకిస్థాన్ 35 పరుగులకే మూడు వికెట్లు కోల్పోయి కష్టాల్లో పడింది. ఈ దశలో పాక్‌ను ఆదుకునేందుకు బాబర్ ఆజమ్ (27), షాన్ మసూద్ (35) ప్రయత్నించారు. కానీ వీరిద్దర్నీ బ్రాస్‌వెల్ వరుస ఓవర్లలో ఔట్ చేయడంతో పాకిస్థాన్ 80 పరుగులకే 5 వికెట్లు కోల్పోయింది.

ఈ దశలో (176 బంతుల్లో 118), సౌద్ షకీల్ (146 బంతుల్లో 32) పాక్‌ను ఆదుకున్నారు. 47 ఓవర్లకుపైగా ఓపికగా బ్యాటింగ్ చేసిన వీరిద్దరూ ఆరో వికెట్‌కు 123 పరుగులు జోడించారు. అద్భుతమైన డిఫెన్స్‌తో కివీస్ బౌలర్లను విసిగించిన ఈ జోడీ పాక్‌ను సురక్షిత స్థితికి చేర్చింది. చివరి సెషన్లో పాకిస్థాన్ విజయానికి 31 ఓవర్లలో 140 పరుగులు అవసరం కాగా.. పాక్ బ్యాటర్లు దూకుడుగా ఆడేందుకు ప్రయత్నించారు. బ్రాస్‌వెల్ బౌలింగ్‌లో సర్ఫరాజ్ ఓ సిక్స్, ఫోర్ కొట్టాడు. కాసేపటికే సౌద్ షకీల్‌ను ఔట్ చేసిన బ్రాస్‌వెల్.. 260 బంతుల భాగస్వామ్యానికి తెరదించాడు.

షకీల్ ఔటైనప్పటికీ మరో ఎండ్‌లో బౌండరీలు బాదిన సర్ఫరాజ్ ఖాన్ 135 బంతుల్లో సెంచరీ పూర్తి చేసుకున్నాడు. దాదాపు నాలుగేళ్ల తర్వాత టెస్టుల్లోకి ఎంట్రీ ఇచ్చిన అతడు.. ఈ సిరీస్‌లో నాలుగు ఇన్నింగ్స్‌ల్లోనూ 50 ప్లస్ స్కోర్లు నమోదు చేయడం గమనార్హం.

చివరి 10 ఓవర్లలో పాక్ విజయానికి 52 పరుగులు అవసరం కాగా.. న్యూజిలాండ్‌కు 4 వికెట్లు అవసరమయ్యాయి. ఈ దశలో కివీస్ బౌలర్లు స్వల్ప వ్యవధిలోనే సర్ఫరాజ్, అఘా సల్మాన్ (40 బంతుల్లో 30)ను ఔట్ చేశారు. 85వ ఓవర్లో హసన్ అలీ కూడా ఔట్ కావడంతో.. కివీస్ విజయానికి ఒక్క వికెట్ దూరంలో నిలిచింది. నసీమ్ షా (11 బంతుల్లో 15), అబ్రార్ అహ్మద్ (13 బంతుల్లో 7) చివరి వికెట్‌కు 27 బంతులను కాచుకోవడంతో.. 304/9తో ఐదో రోజు ఆటను ముగించిన పాక్ డ్రాతో గట్టెక్కింది. బాక్సింగ్ డే రోజు ప్రారంభమైన తొలి టెస్టు సైతం డ్రాగా ముగియడంతో సిరీస్ 0-0తో సమమైంది. ఈ ఏడాది పాకిస్థాన్‌కు సొంత గడ్డ మీద ఇదే తొలి, చివరి టెస్టు కావడం గమనార్హం.

Read More And

Advertisement

Related Articles

Back to top button