News

ఫుడ్‌ డెలివరీకి వచ్చి, యువతికి ముద్దు పెట్టాడు



మొబైల్ యాప్ ద్వారా ఆర్డర్‌ చేసిన ఆహారాన్ని డెలివరీ చేసేందుకు వచ్చిన .. యువతితో అసభ్యంగా ప్రవర్తించాడు. 19 ఏళ్ల ఆ యువతి ఇంట్లో ఒంటరిగా ఉన్నట్లు గుర్తించి మాట కలిపాడు. తాగేందుకు నీళ్లు ఇవ్వమని అడిగాడు. గ్లాసులో నీళ్లు తెచ్చివ్వగా తాగి, మరో గ్లాస్ వాటర్ అడిగాడు. మంచినీళ్లు తెచ్చేందుకు యువతి వెనక్కి తిరగ్గానే, వెనక నుంచి పట్టుకొని ఆమె చెంపపై బలవంతంగా రెండుసార్లు ముద్దు పెట్టాడు. ఆ హఠాత్పరిణామానికి యువతి షాక్‌కు గురైంది. కేకలు వేయడంతో అతడు పారిపోయాడు. నగరంలో శనివారం (సెప్టెంబర్ 17) రాత్రి 9.30 గంటల సమయంలో చోటు చేసుకున్న ఈ ఘటన సంచలనంగా మారింది.

బాధితురాలు కేకలు విని అప్రమత్తమైన ఇరుగు పొరుగు వారు.. పారిపోతున్న నిందితుడుని పట్టుకున్నారు. ఆ తర్వాత పోలీసులకు అప్పగించారు. ఈ ఘటనతో నిశ్చేష్టురాలై, మౌనం వహించిన యువతికి నచ్చజెప్పి పోలీసులకు ఫిర్యాదు చేయాల్సిందిగా పురమాయించారు. మరో అమ్మాయికి ఇలా జరగకుండా చూసేందుకైనా ఫిర్యాదు చేయాలని నచ్చజెప్పారు. దీంతో స్నేహితుడి సాయంతో ఆమె పోలీసులను ఆశ్రయించింది.

బాధితురాలు తన ఫిర్యాదులో పేర్కొన్న వివరాల ప్రకారం.. డెలివరీ చేసిన ఆహారాన్ని అందించిన తర్వాత ఆ వ్యక్తి, ఇంట్లో తల్లిదండ్రులు లేరా అని ఆరా తీశాడు. ఇద్దరు స్నేహితురాళ్లతో కలిసి తాను అక్కడ అద్దెకు ఉంటున్నానని, ఆ సమయంలో వాళ్లిద్దరూ బయటకు వెళ్లారని ఆమె చెప్పింది. ఆ తర్వాత తాగేందుకు నీళ్లు ఇవ్వమని అడిగి, తనతో అసభ్యంగా ప్రవర్తించాడని తెలిపింది. వెంటనే తేరుకొని ప్రతిఘటించానని, గట్టిగా అరిచేసరికి.. ‘నీకు అంకుల్ లాంటి వాడినమ్మా’ అంటూ అతడు బయటకు పరుగెత్తాడని నాటి రాత్రి జరిగిన ఘటనను వివరించింది.

పోలీసులు నిందితుడిని అరెస్టు చేసి కేసు నమోదు చేశారు. నిందితుడిని రాయిస్‌ షేక్‌ (40)గా గుర్తించారు‌. ఆ తర్వాత బెయిల్‌పై అతడిని విడుదల చేశారు. ఈ వ్యవహారంపై ఫుడ్‌ డెలివరీ సంస్థ జొమాటోను పోలీసులు వివరణ కోరారు. అయితే, అతడు తమ ఉద్యోగి కాదని జొమాటో చెప్పడం గమనార్హం.

‘సదరు యువతి ఆర్డర్‌ డెలివరీ బాధ్యత మరో సంస్థకు మారింది. ఒక యాప్ నుంచి మరొక యాప్‌కి ఆర్డర్ చైన్‌ ఎలా మారిందనే విషయంపై మాకు అనుమానం ఉంది. విచారణ నిమిత్తం పోలీసులకు అన్ని విధాలుగా సహకరించేందుకు మేం సిద్ధం’ అని జొమాటో తెలిపింది.

అపరిచితులతో జాగ్రత్త..
ఇంట్లో ఒంటరిగా ఉన్న సమయంలో మహిళలు జాగ్రత్తగా ఉండాలని పుణే పోలీసులు సూచించారు. అపరిచితుల పట్ల అప్రమత్తంగా వ్యవహరించాలని హెచ్చరించారు. దగ్గరివాళ్లు, పోలీసుల నంబర్లను సేవ్ చేసి పెట్టుకోవాలని, ఆపద ఎదురైతే వెంటనే కాల్ చేసి సంప్రదించాలని సూచించారు.

Also Read:

Advertisement

Related Articles

Back to top button