News

ప్రధాని మోదీతో ఎంపీ జీవీఎల్ భేటీ.. విశాఖ పర్యటనకు రావాలని ఆహ్వానం



ప్రధాన మంత్రి నరేంద్ర మోదీతో భారతీయ జనతా పార్టీ (బీజేపీ) రాజ్యసభ సభ్యుడు జీవీఎల్‌ నరసింహారావు భేటీ అయ్యారు. ఈ సందర్భంగా ఆంధ్రప్రదేశ్‌లో పర్యటించాలని ఆహ్వానించారు. ఈ మేరకు గురువారం ప్రధాని మోదీతో సమావేశమైన ఎంపీ .. ఏపీలో త్వరలో అనేక ప్రతిష్టాత్మక జాతీయ అభివృద్ధి, మౌలిక సదుపాయాల ప్రాజెక్టులకు ప్రారంభోత్సవాలు, శంకుస్థాపనలు జరగనున్నాయని తెలిపారు. దీంతో విశాఖపట్నం పర్యటనకు రావాల్సిందిగా అభ్యర్థించారు.

అలాగే, ప్రధాని మోదీకి ఎంపీ జీవీఎల్‌ అందజేసిన లేఖలో విశాఖపట్నంలో పూర్తి కానున్న పలు కేంద్ర ప్రభుత్వ ప్రాజెక్టులను ప్రస్తావించారు. వాటిని ప్రధాని మోదీకి వివరించారు. విశాఖపట్నంలో రూ.26,000 కోట్లతో హెచ్‌పీసీఎల్‌ పెట్రోలియం రిఫైనరీ విస్తరణ, ఆధునికీకరణ ప్రాజెక్ట్, ఐఐఎం విశాఖపట్నం ఆధునిక, హరిత క్యాంపస్ మొదటి దశ, విశాఖపట్నంలో క్రూయిజ్ టెర్మినల్ మొదలైనవి వాటిలో ఉన్నాయి. విశాఖపట్నం ప్రధాన కార్యాలయంతో మంజూరైన సౌత్ కోస్ట్ రైల్ జోన్ కొత్త కార్యాలయ సముదాయంతో సహా విశాఖపట్నంలో మంజూరైన అనేక ప్రాజెక్టులకు శంకుస్థాపన చేయాలని ఆయన ప్రధాన మంత్రి నరేంద్ర మోదీని అభ్యర్థించారు.

సుమారు రూ.400 కోట్లతో విశాఖపట్నం రైల్వే స్టేషన్ ఆధునీకరణ ప్రాజెక్టు, రూ.385 కోట్ల వ్యయంతో 400 పడకల స్పెషాలిటీ ఈఎస్‌ఐ ఆస్పత్రి, విశాఖపట్నంలో ఆధునిక మెగా ఫిషింగ్ హార్బర్ మొదలైనవి కూడా జీవీఎల్ ఈ లేఖ ప్రస్తావించారు. అలాగే, విశాఖపట్నంలోని తూర్పు నౌకాదళ కమాండ్, ఇతర రక్షణ సంస్థల్లో అనేక ప్రాజెక్టులు, అభివృద్ధిని కూడా ప్రధాన మంత్రి పర్యటనలో భాగంగా చేర్చవచ్చని లేఖలో పేర్కొన్నారు. ప్రధాన మంత్రి మోదీ.. విశాఖపట్నం ప‌ర్యట‌నతో కేంద్ర ప్రభుత్వ ప‌థ‌కాల‌పై రాష్ట్ర ప్రజలు దృష్టి సారించమే కాకుండా.. ఈ ప్రాజెక్టులు కేవలం కేంద్ర ప్రభుత్వ చొరవతో మాత్రమే అని అర్థం చేసుకుంటారని జీవీఎల్ చెప్పారు.

Related Articles

Back to top button