News

నేను మాట్లాడితే వైసీపీ ప్రభుత్వంపై ప్రజలు తిరగబడతారు: లోకేష్



చంద్రబాబునాయుడు ముఖ్యమంత్రిగా ఉన్నప్పుడు వైఎస్ రాజశేఖరరెడ్డి, వైఎస్ జగన్మోహన్ రెడ్డి, వైఎస్ షర్మిల పాదయాత్రలు చేశారని.. కానీ, ఏనాడూ వారిని అడ్డుకోలేదని తెలుగు దేశం పార్టీ ప్రధాన కార్యదర్శి అన్నారు. ఇప్పుడు తాను ఓ చిన్న గ్రామంలో మాట్లాడినా తాడేపల్లి ప్యాలస్‌ పిల్లి వణికిపోతోందని ముఖ్యమంత్రి వైఎస్ జగన్మోహన్ రెడ్డిని దుయ్యబట్టారు. తాను మాట్లాడితే ప్రజలు ప్రభుత్వంపై తిరగబడతారనే భయం ప్యాలస్‌ పిల్లిని వెంటాడుతోందన్నారు. తనను ఎంత అడ్డుకుంటే తాను అంత ఎక్కువ మాట్లాడతానని హెచ్చరించారు. నారా లోకేష్ యువగళం పాదయాత్ర గురువారం 25వ రోజు తిరుపతి జిల్లా శ్రీకాళహస్తి నియోజకవర్గం నుంచి తిరుపతి నియోజకవర్గంలోకి ప్రవేశించింది. అంతకు ముందు శ్రీకాళహస్తి నియోజకవర్గం నీలిసానిపేటలో లోకేష్ మాట్లాడుతుండగా పోలీసులు అడ్డుకున్నారు. ఆయన నిలబడి మాట్లాడిన స్టూల్‌ను సీజ్‌ చేశారు. గాజులమండ్యం గ్రామంలో కూడా లోకేష్ ప్రసంగాన్ని పోలీసులు అడ్డుకున్నారు. దీంతో పోలీసుల తీరుపై లోకేష్ భగ్గుమన్నారు. చంద్రబాబు హయాంలో రాష్ట్రానికి కంపెనీలు వస్తే ఇప్పుడు జగన్‌ వీధికో జే బ్రాండ్‌ లిక్కర్‌ షాపులు తెరిచారని లోకేష్ దుయ్యబట్టారు. ఈ ప్రభుత్వంలో రైతులు, యువత, మహిళలు, ఉద్యోగస్తులు అనేక ఇబ్బందులు పడుతున్నారని చెప్పారు. వారి సమస్యల్ని తెలుసుకోవడానికి వస్తే తనను అడ్డుకుంటున్నారని పేర్కొన్నారు. ఊరూరా తిరిగి పాదయాత్ర చేసి అనేక హామీలు ఇచ్చిన జగన్మోహన్ రెడ్డి ఇప్పుడు అన్నీ మర్చిపోయారని వ్యాఖ్యానించారు. జగన్ ఇచ్చిన ప్రతి హామీని గుర్తుచేస్తానని.. చేసిన ప్రతి మోసాన్ని ఎండగడతానని వెల్లడించారు. జగన్‌ పాదయాత్ర చేసినప్పుడు 9 మంది చనిపోయారని.. అప్పుడు లేని నిబంధనలు ఇప్పుడు ఎందుకొచ్చాయని లోకేష్ ప్రశ్నించారు. రాజ్యాంగం ఇచ్చిన హక్కులను కాలరాసే అధికారం ఎవరికీ లేదన్నారు. చట్టాన్ని ఉల్లంఘించి ప్రవర్తించిన అధికారులపై జ్యుడీషియల్‌ విచారణ వేసి చర్యలు తీసుకుంటామని హెచ్చరించారు. తాను మైక్‌లో మాట్లాడటంలేదని.. ప్రజలతో మాట్లాడే హక్కు రాజ్యాంగం ద్వారా వచ్చిందన్నారు. తన హక్కులను హరించే అధికారం పోలీసులకు లేదని వార్నింగ్ ఇచ్చారు.

Related Articles

Back to top button