News

దేశంలో 4 కోట్ల ఉద్యోగాలు.. ఈ రెండు రంగాలే కీలకం: నితిన్ గడ్కరీ



దేశంలో ఆటోమొబైల్‌, ఎలక్ట్రిక్‌.. ఈ రెండు రంగాల్లోనే 4 కోట్లకు పైగా ఉద్యోగాలు ఉన్నాయని కేంద్ర రహదారుల శాఖ మంత్రి నితిన్‌ గడ్కరీ వ్యాఖ్యానించారు. దేశ సత్వర అభివృద్ధికి ఆ రెండు రంగాలే కీలకమని.. విద్యార్థులు ఈ అవకాశాన్ని సద్వినియోగం చేసుకోవాలని సూచించారు. ఈ మేరకు గుంటూరు వడ్లమూడిలోని విజ్ఞాన్‌ యూనివర్సిటీలో గురువారం నిర్వహించిన 10వ స్నాతకోత్సవంలో కేంద్ర మంత్రి ముఖ్య అతిథిగా పాల్గొని ప్రసంగించారు.

తక్కువ ఖర్చుతో ఇంధనం, విద్యుత్‌ను తయారు చేసి ప్రజలకు అందుబాటులోకి తీసుకురావాల్సిన అవసరం ఉందని నితిన్ గడ్కరీ అన్నారు. దేశంలో యువ ఇంజనీర్లకు కొదవలేదని.. విద్యుత్‌, ఇంధనాన్ని విదేశాలకు ఎగుమతి చేసే స్థాయికి దేశం తీసుకెళ్లేందుకు వారంతా కృషి చేయాలని పిలుపునిచ్చారు. దేశ యువత ఉద్యోగాలు చేసే స్థాయి నుంచి ఉద్యోగాలు ఇచ్చే స్థాయికి ఎదగాలన్నారు. అలాగే, చదువుతో పాటు దేశం పట్ల బాధ్యత కూడా ఉండాలని చెప్పారు.

యువత ఆలోచనల వైపు పరుగెత్తాలి: కృష్ణ ఎల్లఅప్పట్లో యూనివర్సిటీలో చదివాలంటే 100 మైళ్లు వెళ్లాల్సి వచ్చేదని భారత్‌ బయోటెక్‌ ఛైర్మన్‌, ఎండీ కృష్ణ ఎల్ల అన్నారు. ప్రస్తుతం యూనివర్సిటీలు అందరికీ అందుబాటులోనే ఉన్నాయని గుర్తు చేశారు. వడ్లమూడిలోని విజ్ఞాన్‌ విశ్వవిద్యాలయం పదో స్నాతకోత్సవంలో కృష్ణ ఎల్ల గౌరవ డాక్టరేట్‌ స్వీకరించారు. ఈ సందర్భంగా కృష్ణ ఎల్ల మాట్లాడుతూ.. నిశితమైన పరిశీలన నుంచే మంచి ఆలోచనలు వస్తాయన్నారు.

యువత డబ్బు వెంట కాదు.. ఆలోచనల వైపు పరిగెత్తాలని కృష్ణ ఎల్ల సూచించారు. సమాజంలో సమస్యలు పరిష్కరించే బాధ్యత యువతపైనే ఉందన్నారు. కృష్ణ ఎల్లతో పాటు ప్రముఖ సంగీత దర్శకుడు ఎంఎం కీరవాణి, బ్యాడ్మింటన్‌ క్రీడాకారుడు కిదాంబి శ్రీకాంత్‌, ఆస్ట్రా మైక్రోవేవ్‌ డైరెక్టర్‌ ఎంవీ రెడ్డిలకు గౌరవ డాక్టరేట్‌లను ప్రదానం చేశారు. అలాగే, వర్సిటీలోని 1842 మంది విద్యార్థులకు డిగ్రీ పట్టాలు ప్రదానం చేశారు.

Related Articles

Back to top button