News

తెలంగాణ కరోనా కేసులు, Telangana Corona: తెలంగాణలో మరోమారు 1000కి పైగా కేసులు.. యాక్టివ్ కేసులు ఎన్నంటే? – telangana reports 1061 covid 19 cases on thursday making total active cases tally to 6357


తెలంగాణ రాష్ట్రంలో కరోనా వైరస్ వ్యాప్తి (Telangana Corona Cases) పెరుగుతోంది. రోజూవారీ కేసుల సంఖ్య మరోసారి 1000 మార్క్‌ను దాటింది. గురువారం (ఆగస్టు 4) రాష్ట్రంలో కొత్తగా 1,061 కేసులు నమోదయ్యాయి. ప్రస్తుతం రాష్ట్రంలో 6,357 యాక్టివ్‌ కేసులు ఉన్నట్లు తెలంగాణ వైద్య, ఆరోగ్య శాఖ విడుదల చేసిన బులెటిన్‌లో పేర్కొన్నారు. గడిచిన 24 గంటల్లో 836 మంది కొవిడ్ నుంచి కోలుకొని డిశ్చార్జ్ అయ్యారు. రాష్ట్రంలో రికవరీ రేటు 98.75 శాతంగా ఉందని వెల్లడించారు. ప్రస్తుతం రాష్ట్రంలో కొవిడ్ మహమ్మారి బారిన పడి 236 మంది హాస్పిటళ్లలో చికిత్స పొందుతున్నారు. వీరిలో ఐసీయూలో 40 మంది ఉండగా.. 92 మంది ఆక్సిజన్ పడకలపై ఉన్నారు.

రాష్ట్రంలో గత రెండు వారాలుగా కరోనా కేసులు క్రమంగా పెరుగుతున్నాయి. మంగళవారం రోజూవారీ కేసులు ఆరు నెలత తర్వాత తొలిసారిగా 1000 మార్క్ దాటిన విషయం తెలిసిందే. తాజాగా నేడు మరోసారి 1000కి పైగా కేసులు నమోదయ్యాయి. హుస్నాబాద్‌లోని సాంఘిక సంక్షేమ హాస్టల్‌లో ఇటీవల 20 మందికి పైగా విద్యార్థినిలు, సిబ్బంది వైరస్ బారిన పడిన ఘటన అలజడి రేపగా.. నిన్న నల్గొండ జిల్లాలోని నేరేడుగొమ్మ కస్తూర్బా గాంధీ పాఠశాలలో కరోనా కలకలం రేగింది. 16 మంది విద్యార్థినులకు, ఒక ఉపాధ్యాయురాలికి వైరస్ సోకింది.

ఇక కొత్తగా నమోదైన కేసుల్లో అత్యధికంగా హైదరాబాద్‌లో 401 కేసులు నమోదయ్యాయి. రంగారెడ్డి జిల్లాలో 63, మేడ్చల్‌ మల్కాజిగిరిలో 56, నల్గొండ జిల్లాలో 51, రాజన్న సిరిసిల్లలో 46, కరీంనగర్‌ జిల్లాలో 43 కేసులు నిర్ధరణ అయ్యాయి. గడిచిన 24 గంటల్లో 43,318 మందికి కొవిడ్‌ నిర్ధారణ పరీక్షలు చేయగా.. ఇంకా 740 పరీక్షల ఫలితాలు రావాల్సి ఉంది. కొవిడ్ వైరస్ వ్యాప్తి పెరుగుతున్న నేపథ్యంలో తగిన జాగ్రత్తలు తీసుకోవాలని నిపుణులు సూచిస్తున్నారు. మరోవైపు.. వైరల్ జ్వరాలు కూడా విజృంభిస్తుండటంతో ఏ జ్వరం ఏమిటోనని కొంత మంది గందరగోళానికి, ఆందోళనకు గురవుతున్నారు.

Related Articles

Back to top button