News

చంద్రబాబుపై ఏపీ మహిళా కమిషన్‌కు ఫిర్యాదు



తెలుగు దేశం పార్టీ అధినేత, ప్రతిపక్ష నాయకుడు చంద్రబాబునాయుడుపై ఏపీ మహిళా కమిషన్‌కు సచివాలయాల మహిళా పోలీస్ వెల్ఫేర్ అసోసియేషన్ ఫిర్యాదు చేసింది. సచివాలయంలోని మహిళా పోలీసులపై అభ్యంతరకర వ్యాఖ్యలు చేశారని అసోసియేషన్ సభ్యులు పేర్కొన్నారు. ఈ మేరకు మహిళా కమిషన్ ఛైర్‌పర్సన్ వాసిరెడ్డి పద్మకు గ్రామ, వార్డు సెక్రటేరియట్ మహిళా పోలీస్ వెల్ఫేర్ అసోసియేషన్ ప్రెసిడెంట్ ఎస్.మహాలక్ష్మి, జనరల్ సెక్రటరీ డి.మధులత, గుంటూరు జిల్లా అధ్యక్షురాలు ఎంవీఎన్ దుర్గా, గౌస్యా బేగం, మంగళగిరి గీత తదితరులు ఫిర్యాదు చేశారు.

గ్రామ స్థాయిలో మహిళల రక్షణ కోసం సీఎం జగన్మోహన్ రెడ్డి సచివాలయ మహిళా పోలీస్ వ్యవస్థ ఏర్పాటు చేశారని అసోసియేషన్ సభ్యులు తెలిపారు. అయితే, సచివాలయ మహిళా పోలీస్ వ్యవస్థకు సహకరించవద్దని, వారు వస్తే తలుపులు వేసేయాలని, వారు ఇంటింటికి తిరిగి భార్యభర్తల అక్రమ సంబంధాలపై సర్వే చేస్తున్నారంటూ ప్రజల్లో భయాందోళనలు కలిగేంచేలా చంద్రబాబు వ్యాఖ్యలు చేశారన్నారు. మాజీ ముఖ్యమంత్రి హోదాలో ఉన్న చంద్రబాబు.. సచివాలయం మహిళా పోలీసులపై ఇలాంటి వ్యాఖ్యలు చేయడం గర్హనీయమన్నారు.

చంద్రబాబు వ్యాఖ్యలు సచివాలయ మహిళా పోలీసులను తీవ్రంగా మనోవేదన గురి చేసిందని అసోసియేషన్ సభ్యులు తెలిపారు. ఈ విషయాన్ని మహిళా కమిషన్ సభ్యుల దృష్టికి తీసుకొచ్చినట్లు చెప్పారు. ఈ వ్యాఖ్యలపై మహిళా కమిషన్ ఛైర్‌పర్సన్ సీరియస్‌గా స్పందించారు. చంద్రబాబు మాటలపై వాసిరెడ్డి పద్మ అభ్యంతరం తెలిపారు. చంద్రబాబు వైఖరిని అంతా ఖండించాలని వాసిరెడ్డి పద్మ పిలుపునిచ్చారు. దీనిపై విచారణ చేపట్టి తగిన చర్యలు తీసుకుంటామని వాసిరెడ్డి పద్మ హామీ ఇచ్చారు.

Related Articles

Back to top button