News

చంద్రబాబుకు అండగా జనసేనాని పవన్ కళ్యాణ్.. సీఎం జగన్‌పై ఫైర్



రాష్ట్రంలో ప్రతిపక్ష పార్టీల గొంతు వినిపించకూడదు, ఆ పార్టీలు కార్యక్రమాలు నిర్వహించకూడదు అనే ఉద్దేశంతోనే జీవో నంబర్ 1 తీసుకొచ్చారని జనసేన పార్టీ అధినేత పవన్‌ కళ్యాణ్‌ తీవ్ర విమర్శలు చేశారు. ఇలాంటి జీవో గతంలో ఉండి ఉంటే వైఎస్ జగన్మోహన్ రెడ్డి ప్రతిపక్ష నాయకుడిగా పాదయాత్ర చేయగలిగేవారా అని ప్రశ్నించారు. ఈ మేరకు బుధవారం ఓ ప్రకటన విడుదల చేశారు.

ప్రజా వ్యతిరేక విధానాలను పాలకులు అమలు చేస్తుంటే ప్రజాపక్షం వహించడం ప్రతిపక్ష పార్టీలుగా తమ బాధ్యత అని పవన్ కళ్యాణ్ అన్నారు. ఇలాంటి చీకటి ఉత్తర్వులు ఇవ్వకుండానే అందులోని దురుద్దేశాలను విశాఖ నగరంలో అక్టోబరు నెలలోనే వెల్లడించారని తనకు జరిగిన అనుభవాన్ని గుర్తు చేసుకున్నారు. వాహనంలో నుంచి కనిపించకూడదు, ప్రజలకు అభివాదం చేయకూడదు, హోటల్‌ నుంచి బయటకు రాకూడదు అని నిర్బంధాలు విధించారని తెలిపారు. ఇప్పటం వెళ్లరాదని అటకాయించారని.. ఆ పోకడలనే అక్షరాల్లో ఉంచి ఇప్పుడు జీవో ఇచ్చారని చెప్పారు. ఈ ఉత్తర్వుల బూచి చూపి తెలుగుదేశం అధినేత చంద్రబాబునాయుడు కుప్పం పర్యటనను అడ్డుకున్నారని తెలిపారు.

ఈ విషయంలో ప్రభుత్వ వైఖరిని ఖండిస్తున్నామని పవన్ కళ్యాణ్ అన్నారు. ఈ విధమైన చర్యలు ప్రజాస్వామ్యాన్ని పరిహాసం చేస్తాయన్నారు. చంద్రబాబునాయుడు ఎమ్మెల్యేగా తన నియోజకవర్గంలో పర్యటించి ప్రజలను కలవడం ఆయన విధి అన్నారు. ఆయన విధులను జీవో 1 ద్వారా అడ్డుకొంటున్నారా అని నిలదీశారు. ఈ ఉత్తర్వులు సీఎం జగన్‌కు కూడా వర్తిస్తాయా అని ప్రశ్నించారు. మంగళవారం రాజమహేంద్రవరంలో జనాన్ని రోడ్డుకు ఇరువైపులా నిలబెట్టి చేసిన షో.. ఈ ఉత్తర్వుల ఉల్లంఘన పరిధిలోకి వస్తాయో.. రావో పోలీసు ఉన్నతాధికారులు వివరణ ఇవ్వాలని డిమాండ్ చేశారు. చీకటి జీవోలతో రాష్ట్రంలో క్రమంగా నియంతృత్వం తీసుకొస్తున్న పాలకుల విధానాలను ప్రజాస్వామ్య వాదులు ప్రశ్నించాలని పవన్‌ కళ్యాణ్ అన్నారు.

Related Articles

Back to top button